بالكاشين اۋىلىنداعى دۇكەن, ءدامحانا يەلەرى, جەكەلەگەن كاسىپكەرلەر ءبىر جەڭنەن قول, ءبىر جاعادان باس شىعارىپ, زەينەتكەرلەرگە, الەۋمەتتىك جاعىنان از قامتىلعان جانە كوپ بالالى وتباسىلارىنا كوپ-كورىم كومەك كورسەتتى. ءتىپتى, ءال-اۋقاتى بار ازاماتتار ءبىر-بىرىمەن جارىسقا تۇسكەندەي. قاراپ تۇرساڭ, جاقسىلىق جاساۋدان جارىسۋ – ءتىلىڭ جەتكەنشە تامسانا ايتا جۇرەتىن تاماشا جارىس. كوپۇلتتى ەلدى مەكەندەگى اۋىل شارۋاشىلىعى قۇرىلىمدارىنىڭ جەتەكشىلەرى دە قوڭتورعاي ساتتە ىرگەسىن الىس سالىپ قاراپ قالعان جوق. وسى وڭىردەگى تۇگىن تارتسا ماي شىعاتىن قۇنارلى جەردىڭ يگىلىگىن كورىپ وتىرعان سوڭ اۋىلداستارىنىڭ داستارقانىنا ادال ءدام بۇيىرتۋدى ءوز پارىزدارى ساناعان ولار قاپ-قاپ ۇندى, جاشىك-جاشىك ازىق-ت ۇلىكتى ءۇيىپ تاستادى. ءسوزىمىزدى ناقتى دەرەكپەن شەگەلەۋ ءۇشىن كامەنكا سەلولىق وكرۋگىندەگى «كامەنكا جانە د» جاۋاپكەرشىلىگى شەكتەۋلى سەرىكتەستىگىنىڭ ديرەكتورى ا.دجەيرانوۆ ءجۇز وتباسىنا ءبىر-ءبىر قاپ ۇننان اپارىپ بەرگەندىگىن ايتساق تا جەتكىلىكتى. «ۋني» سەرىكتەستىگىنىڭ ديرەكتورى م.مۋستافاەۆ بوگوسلاۆكا اۋىلىنداعى 17 وتباسىن قامقورلىعىنا الىپ, ءبىر-ءبىر قاپ ۇن جەتكىزىپ بەردى. وعان قوسا وسى سەرىكتەستىك بالكاشين اۋىلدىق وكرۋگىندەگى 50 وتباسىعا ۇن تاراتسا, وكرۋگتەگى دۇكەندەر مەن ءدامحانالاردىڭ يەلەرى دامگە تولى ازىق-ت ۇلىك سەبەتتەرىن جەتكىزدى. وسى ارادا ءبىر-بىرىمەن قاناتتاسا جەرلەستەرىن قامقورلىققا العان م.گۋسەينوۆ, ۆ.دىنكو, م.ابۋەۆ, ە.سەزبەكوۆ, ي.سەزبەكوۆ, س.دجەيرانوۆ ءتارىزدى شارۋاشىلىق باسشىلارىنىڭ ەسىمدەرىن قۇرمەتپەن اتاي كەتۋگە بولادى.
بالكاشيننىڭ بەلدى جىگىتتەرى مۇقتاج جانداردى ازىق-ت ۇلىكپەن قامتاماسىز ەتىپ قانا قويماي, اۋدانداعى ىرگەلى ىستەرگە ۇيىتقى بولۋدا. قازاقتىڭ «بىرلىك بار جەردە تىرلىك بار» دەيتىنى وسىنداي جاناشىرلىق لەبى ەسىپ تۇراتىن ءىس-قيمىلدان كورىنەدى. بىرلىگى بەكەم بولعان سوڭ بۇل ولكەدەگى كەي شارۋا ەل جايىن ويلاعان ازاماتتاردىڭ ىمىرالاسقان قولعابىسىمەن-اق شەشىلىپ جاتىر. ايتالىق, كاسىپكەر, اۋداندىق ءماسليحاتتىڭ دەپۋتاتى ا.بەلۋحا ساندىقتاۋ اۋىلدىق وكرۋگىندەگى مادەنيەت ءۇيىنىڭ شاتىرىن جاڭارتىپ بەرۋگە قاراجات ءبولدى. ۆەسەلوە سەلولىق وكرۋگىندەگى «بايدالى» سەرىكتەستىگىنىڭ ديرەكتورى ب.ورازالين اۋىلداستارىنا ازىق-ت ۇلىكپەن كومەكتەسۋمەن قاتار كوكتەمگى سۋ تاسقىنىنىڭ الدىن الۋعا دا ءبىر ادامداي ەڭبەگىن ءسىڭىردى. بيىل بۇل ولكەدە قار قالىڭ ءتۇستى. سەرىكتەستىك باسشىسى زەينەتكەرلەر مەن جالعىزىلىكتى ادامداردىڭ اۋلالارىن قاردان تازالاۋعا, كوكتەمگى قىزىل سۋدىڭ ارناسىن بۇرۋعا اتسالىستى.
سارالاپ قاراساڭىز, ەلدى ويلاعان شارۋادان بىردە-ءبىر كاسىپكەر سىرت قالماعان ەكەن. ارينە, ءوز ەرىكتەرىمەن, ءوز پەيىلدەرىمەن. وسىنىڭ ءوزى-اق قۋانتادى. «US-AGRO» سەرىكتەستىگىنىڭ ديرەكتورى ءۋاليحان ءارىپوۆ باراقكول اۋىلدىق وكرۋگىندەگى 41 وتباسىنا ازىق-ت ۇلىك جەتكىزسە, ج.مۇسقانوۆ, ش.دوقاەۆ, ە.ۋسەنكو ءتارىزدى لەسنوي سەلولىق وكرۋگىنىڭ شارۋاشىلىق باسشىلارى دا ءوز ماڭىنداعى ەل-جۇرتتى قامقورلىقتارىنا العان.
اتام قازاقتا, «كورشى حاقىسى ءتاڭىر اقىسى» دەيتۇعىن استارىنا اتان تۇيەگە جۇك بولار مازمۇن ۇيالاتقان اتالى ءسوز بار. توتەنشە جاعداي كەزىندە جۇرت بىرلىگى ارتا ءتۇستى. ساندىقتاۋلىق ەلەنا جانە ۆيكتور كارپوۆتار ورتا مەكتەپتىڭ وقۋشىلارىنا كومپيۋتەر ساتىپ اپەردى.
ءاپ ەتكەن بەتتە بەتپەردەنىڭ دە تاپشى بولعاندىعىن ەلدىڭ ءبارى بىلەدى. مىنە, وسى ساتتە بويىندا كۇش-قۋاتى بار اعا بۋىن وكىلدەرى دە قاراپ قالعان جوق. جاستار قايىرىمدىلىق جاساپ جاتقاندا جايباراقات وتىرعانىمىز ۇيات بولار دەگەندەي, بالكاشين اۋىلىنىڭ زەينەتكەرلەرى روزا جۋباسوۆا, بايان احمەتوۆا, ليۋدميلا كوستۋلينا, زينايدا توتاكاەۆالار ءۇش جۇزدەن استام بەتپەردە تىگىپ, جەرلەستەرىنە تەگىن تاراتتى. وسى مىسالداردان-اق ەل ىشىندەگى بىرلىكتىڭ بەكەم ەكەندىگىنە كوز جەتكىزۋگە بولادى. ال بىرلىك بار جەردە تىرلىكتىڭ بار ەكەندىگى الميساقتان بەلگىلى.
اقمولا وبلىسى,
ساندىقتاۋ اۋدانى
