«مەملەكەت باسشىسى ءوز جولداۋىندا اتاپ وتكەندەي, بەلسەندى ازاماتتىق قوعامدى قالىپتاستىرۋ ءۇشىن ۇكىمەتتىك ەمەس ۇيىمداردىڭ ءرولى ماڭىزدى. ءبىزدىڭ بۇل ءماجىلىسىمىزدىڭ ماقساتى – قازىرگى شەشىمىن كۇتكەن ماسەلەلەردى تالقىلاۋ, بۇعان دەيىن قول جەتكىزگەن جەتىستىكتەرىمىز قايسى, ال كارانتينگە بايلانىستى قاي تۇستا تەجەلىپ قالدىق, قاي ماسەلەنى جەدەل شەشۋىمىز قاجەت, سولاردى انىقتاۋ جانە جىل سوڭىنا دەيىنگى بىرلەسكەن جوسپارىمىزدى ناقتىلاۋ», – دەپ اتاپ ءوتتى ە.باباقۇماروۆ.
ول سونداي-اق, ۇەۇ وكىلدەرىنە بۇگىنگى پاندەميا جاعدايىندا حالىقتى قولداۋ تۇرعىسىندا اتقارىپ جاتقان جۇمىستارى ءۇشىن العىسىن ءبىلدىردى.
كەزدەسۋ بارىسىندا حالىقتىڭ الەۋمەتتىك وسال توپتارىنا قولداۋ كورسەتۋ تەتىكتەرى, رۋحاني دامىتۋ تۇرعىسىنداعى ماسەلەلەردى نىعايتۋ, سونداي-اق ءبىلىم بەرۋ جانە دەنساۋلىق ساقتاۋ جۇيەلەرى تۋرالى ءسوز بولدى.
بۇگىندە الماتىدا 4 مىڭنان استام ۇەۇ (رەسپۋبليكا بويىنشا جالپى سانىنىڭ 20%-ى) تىركەلگەن.
الماتى قالاسى قوعامدىق دامۋ باسقارماسىنىڭ باسشىسى دياس ەسداۋلەتوۆ اعىمداعى جىلى ۇەۇ-مەن بىرلەسىپ جاستار ساياساتى, قوعامدىق كەلىسىم جانە جالپىۇلتتىق بىرلىك, الەۋمەتتىك ءال-اۋقات, جاسىل ەكونوميكا جانە ت.ب. سالالاردا 65 الەۋمەتتىك جوبانى ىسكە اسىرۋ جوسپارلانعانىن باياندادى. ۇەۇ-مەن بىرلەسكەن جوبالار نەگىزىنەن جاستاردىڭ باستامالارىنا قولداۋ كورسەتۋگە, تاريحي وتانىنا ورالعان قانداس باۋىرلارمەن جۇمىس ىستەۋگە, تۇزەتۋ مەكەمەلەرىنەن ورالعان ادامداردى ومىرگە قايتا بەيىمدەۋگە, ايەلدەر كوشباسشىلىعى مەكتەپتەرىن دامىتۋعا جانە وتباسىلىق قۇندىلىقتاردى ناسيحاتتاۋعا باعىتتالعان.
الماتى قالاسى الەۋمەتتىك ءال-اۋقات باسقارماسى باسشىسىنىڭ ورىنباسارى ءلاززات جەتىباەۆا دا ۇەۇ-مەن ىنتىماقتاستىق تۋرالى ءبىراز ماسەلەنى باياندادى. ونىڭ سوزىنشە, ۇكىمەتتىك ەمەس ۇيىمدارمەن مۇمكىندىگى شەكتەۋلى جاندارعا الەۋمەتتىك قولداۋ كورسەتۋ بويىنشا كەلىسىم-شارتتار جاسالعان. مۇنداي جوبالار اراسىندا «ينۆاتاكسي», جەكە الەۋمەتتىك كومەكشىنىڭ جانە ىمداۋ ءتىلى قىزمەتتەرى بار. بۇل باعىتتاعى جۇمىستار ناتيجەلى جالعاسۋدا.
ءوز كەزەگىندە ءسوز العان ۇەۇ وكىلدەرى قۇقىق قورعاۋ, مەديا سالالارىنداعى جاڭا جوبالار بويىنشا, قوسىمشا قاجەتتىلىگى بار تۇلعالاردى قولداۋ, سونداي-اق, تۋبەركۋلەز, قانت ديابەتى, جۇقتىرىلعان يممۋن تاپشىلىعى سيندرومى اۋرۋلارىنىڭ الدىن الۋ, ايەلدەر مەن بالالاردى قورعاۋ جانە ت.ب. الەۋمەتتىك تاقىرىپتار تۇرعىسىنداعى ۇسىنىستارىن ايتتى.
كەزدەسۋ بارىسىندا الماتى قالاسى قوعامدىق كەڭەسىنىڭ مۇشەسى, «اقپاراتتىق-رەسۋرستىق ورتالىعى» قق-نىڭ ديرەكتورى التىناي كوبەەۆا, «رەۆانش الەۋمەتتىك كومەك قورى» ورتالىعىنىڭ جەتەكشىسى ەلەنا بيلوكون, «ايتۆ-مەن ءومىر سۇرەتىن ادامداردىڭ قازاقستاندىق وداعى» زتب-نىڭ ادۆوكاتسيا جونىندەگى مامانى وكسانا يبراگيموۆا, «راۆنىي-راۆنومۋ پليۋس» قوعامدىق بىرلەستىگىنىڭ اتقارۋشى ديرەكتورى ليۋدميلا پولياكوۆا, «مۇگەدەك بالالاردىڭ اتا-انالارى قاۋىمداستىعى» جشس ءتورايىمى ءاسيا احتانوۆا, «امان-ساۋلىق» قوعامدىق قورىنىڭ پرەزيدەنتى باقىت تۇمەنوۆا, ICAP ورتالىعىنىڭ ورتالىق ازيا بويىنشا وڭىرلىك ديرەكتورى اننا دەريابينا, «Reliance» قوعامدىق قورىنىڭ نەگىزىن سالۋشى ساۋلە الپىسوۆا, تۋبەركۋلەز ماسەلەلەرى جونىندەگى ۇلتتىق ورتالىق جانىنداعى ايتۆ, جيتس, تۋبەركۋلەز جانە بەزگەككە قارسى كۇرەس تۋرالى جاھاندىق قور جوباسىنىڭ ديرەكتورى شاحيمۋرات يسمايلوۆ جانە ت.ب. ءوز ويلارىن ورتاعا سالدى. جالپى, بۇل ونلاين-كەزدەسۋگە 40 ۇەۇ-نىڭ وكىلدەرى قاتىستى.
كەزدەسۋدى تۇيىندەگەن الماتى قالاسى اكىمىنىڭ ورىنباسارى ەرجان باباقۇماروۆ بۇل جۇزدەسۋدىڭ ماڭىزدىلىعىن اتاپ ءوتىپ, ايتىلعان ۇسىنىستاردى زەردەلەۋ جانە پىسىقتاۋ جونىندە بىرقاتار ناقتى تاپسىرمالار بەردى. قالالىق باسقارمالارعا بارلىق ۇەۇ-مەن ءوزارا ءىس-قيمىلدى كۇشەيتۋ جانە جەكەلەگەن باعىتتار بويىنشا سالالىق كەزدەسۋلەر وتكىزۋ جۇكتەلدى.
