بۇگىنگى ماقالامىزدا ءبىز گرەك-ريم كۇرەسىنەن وتكەن الەم چەمپيوناتتارىندا ەڭ كوپ جۇلدە العان بالۋاندار جايىندا اڭگىمەلەۋدى ءجون كورىپ وتىرمىز. بۇل رەتتە رەسەي باتىرى الەكساندر كارەليننىڭ الدىنا تۇسەتىن ەشكىم جوق. 1989 جىلى شۆەيتساريانىڭ مارتيني قالاسىندا اسا اۋىر سالماقتا ايقاسىپ, تۇڭعىش رەت الەم چەمپيونى اتانعان ول, قاتارىنىنان توعىز جىل بويى سول تۇعىردان تومەندەگەن جوق. سودان كەيىن «ورىس ايۋى» وستيا, ۆارنا, ستوكگولم, تامپەرە, پراگا, ۆروتسلاۆ جانە ەۆلەدە جەڭىمپاز اتاندى. سوڭعى رەت 1999 جىلى افينادا باس جۇلدەنى ولجالادى. ول كەزدە الەكساندر 32 جاستا ەدى. عاسىرلار توعىسىندا سيدنەيدە الاۋى تۇتانعان وليمپيا ويىندارىندا كۇمىس مەدالدى قاناعات تۇتقان سوڭ كارەلين ۇلكەن سپورتپەن قوش ايتىستى.
ءسىبىردىڭ ساڭلاعىنا بالۋاندىق ونەردەگى كوپتەگەن رەكورد تيەسىلى. ەڭ كەرەمەتى, داڭقتى سپورتشى 13 جىل بويى ادام بالاسىنان جەڭىلگەن ەمەس. سونىمەن قاتار, ءتۇرلى جارىستاردا ول التى جىل بويى قارسىلاستارىنا سوقىر ۇپاي دا ۇستاتپاعان ەكەن. ايتۋلى بالۋاننىڭ ودان دا باسقا تولىپ جاتقان اتاقتارى بار. بۇل كۇندەرى 53 جاستاعى الەكساندر كارەلين – رەسەيدىڭ مەملەكەتتىك دۋماسىنىڭ دەپۋتاتى.
يران ماقتانىشى حاميد سوريان الەم چەمپيوناتىندا التى مارتە التىن تۇعىردان قول بۇلعادى. جەڭىل سالماقتاردا ونەر كورسەتكەن ول 2005-2010 جانە 2014 جىلدارعى جارىستاردا جاسىنداي جارقىراپ, باس جۇلدەنى قانجىعاسىنا بايلادى. سونىمەن قاتار 34 جاستاعى سورياننىڭ ەسىمى يراننىڭ گرەك-ريم كۇرەسى شەبەرلەرى اراسىنان شىققان تۇڭعىش وليمپيادا چەمپيونى رەتىندە تاريحتا قالدى.
جوعارىدا ەسىمدەرى اتالعان قوس ساڭلاقتى باسىپ وزۋعا ميحاين نۋنەس لوپەستىڭ جاقسى مۇمكىندىگى بار. كۋبالىق قابىلان بيىل 38 جاسقا تولاتىنىنا وتىرعانىنا قاراماستان ءالى دە بابىندا, قارسى كەلگەندەردىڭ بارلىعىن قوعاداي جاپىرىپ ءجۇر. 2005-2015 جىلدار ارالىعىنداعى الەم چەمپيوناتتارىندا لوپەس 5 التىن جانە 3 كۇمىس مەدالدى ولجالادى. تاعى ءبىر ايتا كەتەرلىگى, بوستاندىق ارالىنىڭ وكىلى وليمپيا ويىندارىندا ءۇش رەت دارا شىقتى. ەگەر توكيودا توپ جارسا, ونىڭ ەسىمى سپورتتىق جەكپە-جەك تۇرلەرى بويىنشا وليمپيادانىڭ ءتورت دۇركىن چەمپيونى اتانعان تۇڭعىش بالۋان رەتىندە تاريحتا التىن ارىپتەرمەن جازىلىپ قالارى حاق.
كەزىندە رەسەيدىڭ تۋى استىندا ونەر كورسەتكەن تاعى ءبىر ءدۇلدۇل گوگي كوگۋاشۆيلي 1993-1999 جىلدار ارالىعىندا وتكەن دۇنيەجۇزىلىك دودالاردا بەس رەت دارالانىپ, ءبىر مارتە قولا مەدالدى موينىنا ءىلدى. ول – گرۋزيانىڭ كۋتايسي قالاسىنىڭ تۋماسى. توقسانىنشى جىلداردىڭ باسىندا ماسكەۋگە قونىس اۋداردى. ءبىر وكىنىشتىسى, تالاي جىل بويى 90 جانە 97 كيلو سالماق دارەجەلەرىندە تورتكۇل دۇنيەنىڭ تەڭدەسسىزى اتانىپ كەلگەن گوگيگە وليمپيادادا توپ جارۋ باقىتى بۇيىرمادى. ول تەك بارسەلونادا قولا مەدالدى يەلەنۋمەن عانا شەكتەلدى. قازىرگى كەزدە 46 جاستاعى كوگۋاشۆيلي رەسەي ۇلتتىق قۇراماسىنىڭ باس باپكەرى قىزمەتىن اتقارادى.
تاعى ءتورت بالۋاننىڭ الەم چەمپيوناتىنىڭ بەس دۇركىن چەمپيونى دەگەن مارتەبەلى اتاقتارى بار. سولاردىڭ اراسىنان ۆالەري رەزانتسەۆتى بولە-جارا اتاساق, ەش ايىبى جوق دەپ ويلايمىز. سەبەبى ول – ءبىزدىڭ جەرلەسىمىز. رەزانتسەۆ رەسەيدىڭ تۋلا وبلىسىندا تۋىپ-وسكەنىمەن, جالىنداعان جاستىق شاعى قازاقستاندا ءوتتى.
جالپى, رەزانتسەۆتىڭ سپورتقا كەلۋ تاريحى دا قىزىق. ونى ايگىلى باپكەر ۆاديم پسارەۆ الماتىداعى كوپ كوشەلەردىڭ بىرىندە كەزدەيسوق كەزىكتىرىپ قالادى. جولدىڭ جيەگىندە قۇرىلىس جۇمىستارىن جۇرگىزىپ جاتقان ءبىر توپ ادامنىڭ اراسىنان بۇلشىق ەتتەرى ويناقتاعان, شومبال ءارى شىمىر جىگىتكە قىراعى ماماننىڭ بىردەن كوزى تۇسەدى. شىلدەنىڭ شىلىڭگىر ىستىعىندا ول زىلدەي تاستاردى وپ-وڭاي كوتەرىپ, رەت-رەتىمەن ورىندارىنا جايعاستىرىپ جاتادى. سوعان تاڭدانعان باپكەر ونى كۇرەسپەن اينالىسۋعا ۇگىتتەيدى. ۋاقىت وزا رەزانتسەۆتىڭ اتاعى الىسقا جايىلعانى بەلگىلى. جەتپىسىنشى جىلدارى ول 90 كيلو سالماقتا بەلدەسىپ, وليمپيادانىڭ ەكى, ەۋروپانىڭ ءۇش جانە الەمنىڭ بەس دۇركىن چەمپيونى اتاندى. بۇل كۇندەرى 73 جاستاعى ۆالەري گريگورەۆيچ ماسكەۋدە تۇرادى.
سونىمەن قاتار الەمدىك دودادا بەس رەت دارالانعان بالۋاندار قاتارىندا بولگاريانىڭ ماقتانىشى الەكساندر توموۆ پەن كسرو-نىڭ قوس ساڭلاعى – نيكولاي بالبوشين جانە ۆيكتور يگۋمەنوۆ بار. بۇل كۇندەرى 77 جاستان اسقان يگۋمەنوۆ 1966-1971 جىلدار ارالىعىندا اتوي سالدى. توموۆ پەن بالبوشين تۇيدەي قۇرداس. ەكەۋى دە 1949 جىلى تۋعان. جەتپىستەن اسقان ارداگەرلەر وتكەن عاسىردىڭ جەتپىسىنشى جىلدارى جاسىنداي جارقىلداسا, ەگدە تارتقان جانكۇيەرلەردىڭ ولاردى ۇمىتا قويماعانى انىق.
