ساپار بارىسىندا ماقتاارال اۋدانىندا بولىپ, توتەنشە جاعدايدان زارداپ شەككەن اۋماقتىڭ تىنىس-تىرشىلىگىنە قانىقتى. الدىمەن, «يگىلىك» اۋىلىنداعى ت.اۋباكىروۆ اتىنداعى مەكتەپتە ورنالاسقان ەۆاكۋاتسيالىق بەكەتتىڭ جاعدايىن كورىپ, وسىنداعى تۇرعىندارمەن كەزدەستى. 214 ادام ورنالاستىرىلعان بۇل بەكەتتە قازىرگى تاڭدا زالالسىزداندىرۋ جۇمىستارى جۇيەلى جۇرگىزىلۋدە. ارنايى دارىگەرلەردىڭ كەزەكشىلىگى ۇيىمداستىرىلىپ, ازاماتتاردىڭ دەنساۋلىعى تۇراقتى باقىلاۋعا الىنعان.
سونداي-اق, كوميتەت توراعاسى سۋدان زارداپ شەككەن ورگەباس ەلدى مەكەنىنە دە ات باسىن بۇردى. تۇركىستان وبلىسى اكىمىنىڭ ورىنباسارى ق.ايتمۋحامەتوۆپەن بىرگە جينالىس وتكىزىپ, اتقارىلۋى ءتيىس ماسەلەلەرگە توقتالدى. سونىمەن قاتار, سانيتارلىق-ەپيدەميولوگيالىق احۋالدى تۇراقتاندىرۋ بويىنشا بىرقاتار تاپسىرمالار بەردى.
«اتاكەنت» اۋىلىنداعى №5 مەكتەپتە جانە 500 ادام ورنالاستىرىلعان كاسىپتىك-تەحنيكالىق مەكتەپ بازاسىنداعى ەۆاكۋاتسيالىق بەكەتتەردە تۇرعىنداردىڭ تاماقتانۋ جانە جاتىن ورىندارىنىڭ جاعدايىن كوردى. ازاماتتارمەن تىلدەسىپ, ءوتىنىش-تىلەكتەرىن تىڭدادى.
ماقتاارال اۋدانى تاۋارلار مەن كورسەتىلەتىن قىزمەتتەردىڭ قاۋىپسىزدىگى مەن ساپاسىن باقىلاۋ باسقارماسىنىڭ جۇمىسىمەن تانىسىپ, توتەنشە جاعداي كەزىندەگى شۇعىل ارەكەت ەتۋ الگوريتمى مەن ونىڭ ورىندالۋ بارىسىن باعامدادى.
وزبەكستان رەسپۋبليكاسىنداعى «ساردوبا» سۋ قويماسىنداعى اپاتتىڭ سالدارىنان ماقتاارال اۋدانىندا 845 ءۇي, ءۇش مەكتەپ, بەس بالاباقشا, ءتورت مەديتسينالىق مەكەمە جانە مادەنيەت ءۇيى سۋ استىندا قالدى. 55 كيلومەترگە جۋىق كوپىرلەر مەن جولدار شايىلىپ, 7 639 گەكتار ەگىستىكتى سۋ باستى. قازىرگى تاڭدا تۇرعىندار 10 ەۆاكۋاتسيالىق بەكەتتەرگە ورنالاستىرىلعان.
تۇرعىندارعا كومەككە 600-دەن استام ادام جۇمىلدىرىلدى. 303 پوليتسەي سۋ باسقان اۋىلداردا ۇرلىق-توناۋ ارەكەتتەرىنىڭ الدىن الۋ ءۇشىن قاداعالاۋ قىزمەتىن جۇزەگە اسىرۋدا.
زارداپ شەككەندەر قاجەتتى قورعانىس قۇرالدارىمەن: قولعاپتارمەن, ماسكالارمەن جانە انتيسەپتيكتەرمەن قامتاماسىز ەتىلگەن. قانداي دا ءبىر جۇقپالى اۋرۋلاردىڭ تارالۋىن بولدىرماۋ ءۇشىن ساقتىق شارالارى كۇشەيتىلگەن رەجيمدە جۇرگىزىلۋدە.
