مۇقان تولەباەۆتىڭ «قارلىعاشى», نۇرعيسا تىلەنديەۆ پەن تۇمانباي مولداعاليەۆ تاندەمى تۋدىرعان «قۇستار ءانى», «كۋا بول», ءشامشى قالداياقوۆ پەن عافۋ قايىربەكوۆتىڭ «انا تۋرالى ءانى»...
قۇلاعىمىز تانىس اۋەندى بىردەن تانىپ, ەلتيتىنىمىز بولماسا, مۋزىكالىق ساۋاتىمىز شامالى, ساكسافونشى جىگىتتىڭ شەبەرلىگىنە باعا بەرە المايمىز. بىراق تالعامىنا ءتانتىمىز. جاس تا, كارى دە ءسال ايالداپ, قۇلاق قويىپ, قالتاسىنىڭ تۇبىندەگى بولماشى باقىرىن قاعاز جاشىككە تاستاپ جاتقانىنا قاراعاندا, كوپشىلىككە ۇنايتىن سياقتى.
ساۋدا ورتالىعىنىڭ ءبىرىنىڭ كىرەبەرىسىندە ءبىر ورىس قاريا بايان تارتىپ وتىراتىن. ول دا جۇرتتىڭ تالعامىن جاقسى ءبىلىپ العان. العاشقى قوڭىراۋ مەن سوڭعى قوڭىراۋ قارساڭىندا قازاقشا «ۇستازىمدى», ورىسشا «مەكتەپپەن قوشتاسۋ ءۆالسىن تارتىپ تۇرادى. ارۋلار كۇنىنە وراي سىيلىق الۋعا بارىپ «اناشىم» ءانىن ەستىگەنىم ەسىمدە. بىراق كەيىن ول قايىرشى قاريا كورىنبەي كەتتى. ساۋدا ءۇيىنىڭ اكىمشىلىگى قۋىپ جىبەردى مە, الدە ءوزى كەتتى مە, بىلمەيمىز.
جەراستى جولى مەن ساۋدا ءۇيىنىڭ كىرەبەرىسىنەن ەستيتىن اندەردى ەفيردەن تىڭداماعالى كوپ بولىپتى. مۋزىكالىق ارنالاردى دە ادەيى جارتى ساعاتتاي شولىپ شىققان ەدىك. حيپ-حوپ جانرىنداعى دۇنيەلەر كوپتەي كورىندى. زامانىنا قاراي تىڭدارماننىڭ تالعامى دا سول باعىتقا وزگەرگەن شىعار. بىراق قازىرگى كومپوزيتورلار تۇك شىعارمادى, بۇرىنعىلاردان بۇگىنگىگە ازىق بولارلىق مۋزىكالىق مۇرا قالمادى دەگەنگە كىم سەنەدى؟ نەگە سولاردى جاڭعىرتپاسقا؟ وسىدان ون شاقتى جىل بۇرىن ەربولات قۇدايبەرگەن «مەن قازاقپىندى» رەپ جانرىندا شىرقاپ, بۇكىل حيت-شەرۋلەردىڭ كوشىن باستاپ ەدى عوي.
ەرتەرەكتە وزبەكتىڭ ايگىلى «ياللا» ءانسامبلى قازاقتىڭ «قاراتورعاي» دەگەن ءانىن شىرقاعانى ەسىمىزدە. «تاماشاعا» قوناققا كەلگەن «ياللانىڭ» ءانىن جەرگىلىكتى قازاقتار قالاي تامسانا تىڭداپ, ءتانتى بولعانىن قازىر Youtube-تەن كورۋگە بولادى.
«قاراتورعاي» كەزىندە زاتاەۆيچتىڭ نازارىنا ءىلىنىپ, «قازاق حالقىنىڭ 1000 انىنە» ەنگەن. وتكەن عاسىردىڭ العاشقى شيرەگىندە ومىردەن وزعان شولپان وماروۆاعا تيەسىلى دەيتىن بۇل ءاندى «ياللا» قالاي تاڭداعانى بەلگىسىز. ايتەۋىر, ءسوزى مولدىرەپ قۇيىلا قالعان, سازى سىڭعىرلاعان انگە وزگەشە ىرعاق بەرىپ, شىعىستىق ناقىشقا سالعاندا ءتىپتى قۇلپىرىپ كەتتى.
كومپوزيتور, جازۋشى, پۋبليتسيست, مۋزىكاتانۋشى... ونەردىڭ سان سالاسىنا قۇلاش ۇرىپ, ەرەكشە قولتاڭباسىن قالدىرىپ كەلە جاتقان تۇلعا ءىليا جاقانوۆتى حالىق ەڭ الدىمەن كومپوزيتور دەپ تانيدى دەگەن ويدامىز. ءىليا جاقانوۆ ادامزاتتىڭ ايتماتوۆىنىڭ ء«جاميلا», «قوش بول, گۇلسارى», «شىنارىم مەنىڭ, شىرايلىم مەنىڭ» اتتى پوۆەستەرىنىڭ جەلىسى بويىنشا ء«جاميلانىڭ ءانى», «دانياردىڭ ءانى», «اسىلىم», «اسەلىم-ءانىم», ء«بيبىجان» اتتى تسيكلدىق اندەرىن شىعاردى. ولار قىرعىز-قازاققا كەڭ تاراعانى سونشالىق, ايىر قالپاقتى اعايىن كومپوزيتورعا شىڭعىس ايتماتوۆ اتىنداعى حالىقارالىق سىيلىقتى بەردى. قىرعىزستاننىڭ «دانەكەر» وردەنىمەن ماراپاتتادى. ونەردە شەكارا بولمايتىنى الميساقتان بەلگىلى عوي. توسكەيدە مالى, توسەكتە باسى قوسىلعان قازاق-قىرعىزدىڭ ادەبيەتى مەن ءانىنىڭ دە ارالاسىپ جاتقانىنىڭ ءبىر كورىنىسى وسى بولدى.
اتاقتى «دوس-مۇقاسان» اقان سەرىنىڭ «16 قىزىن» قالاي جاڭعىرتقانى دا ەسىمىزدە. «ماڭماڭگەر» دە توقسانىنشى جىلدارى ەسترادا جانرىندا شىرقالىپ ءجۇردى.
وكىنىشكە قاراي, كەيىنگى جىلدارى ءوزىمىزدىڭ التىن قورداعى جاڭعىرعان اندەردى ەمەس, وزگە ەلدەردەن كەلگەن قاڭعىرعان اندەردى ءجيى ەستيتىن بولدىق. ىرگەمىزدەگى وزبەك, قىرعىزدى ايتپاعاندا, تۇرىك, رۋمىن, اراب اندەرىن بىزدىكىلەر بارىمتالاۋدى شەبەر مەڭگەرىپ العان. وعان نامىستانبايدى. نامىستانباق تۇگىلى, تانىمال انشىلەر «جىل پلاگياتى» دەگەن ارنايى نوميناتسياعا تالاسىپ, جەڭىمپازدى جابىلىپ قۇتتىقتاپ جاتقانىن دا كوردىك. ء«وزى ۇيالماعان كىسىنىڭ بەتىن شيەدەي قىلادى» دەگەن وسى بولسا كەرەك.
بوگەنباي داڭعىلىنىڭ بويىنداعى جەر استى جولىمەن وتكەن اپتادا بىرنەشە رەت وتكەنبىز. ساكسافونشى جىگىت كورىنبەدى. كارانتيندە جاتقان شىعار دەدىك. ەفيردە ەستىمەگەن ءانىمىزدى ەڭ بولماسا جەر استى جولىنان تىڭداپ ءجۇر ەدىك.
