جەڭىستىڭ 75 جىلدىعىنا ورايلاستىرىلعان بۇل شارا وبلىس اكىمى ماحامبەت دوسمۇحامبەتوۆ پەن اتىراۋ قالاسىنىڭ اكىمى قايرات ورازباەۆ قاتىسۋىمەن ءوتتى. اللەيانىڭ قۇرىلىسىن جۇرگىزۋگە وبلىس پەن قالا اكىمدىكتەرى باستاماشى بولىپتى. مۇندا ەكىنشى دۇنيەجۇزىلىك سوعىستا كەڭەس وداعىنىڭ باتىرى, «داڭق» وردەنىنىڭ تولىق يەگەرى اتانعان مايدانگەرلەرگە 14 بيۋست قويىلدى. ولاردىڭ قاتارىنان حالىق قاھارمانى حيۋاز دوسپانوۆا مەن «داڭق» وردەنىنىڭ تاعى ءبىر تولىق يەگەرى ساقاپ قىزىلوۆتىڭ ەسىمى ورىن الدى. بيۋست قولادان قۇيىلىپ, تۇعىرتاسى گرانيتتەن جاسالىپتى.
– «جەڭىس» ساياباعى ءار جىلدارى جەڭىس كۇنى قارساڭىندا جاڭارتىلىپ كەلەدى. بيىل ساياباقتىڭ اۋماعى كەڭەيتىلىپ, كۇردەلى جوندەۋ جۇمىستارى جاسالىپ جاتىر. ساياباقتىڭ جانىنا 1000-عا جۋىق الما اعاشى وتىرعىزىلدى. ەندى 3800 شارشى مەتر گازون توسەلۋدە, – دەيدى اتىراۋ قالاسىنىڭ اكىمى قايرات ورازباەۆ.
ال «تاعزىم» اللەياسىنا جەرگىلىكتى كاسىپكەرلەر دەمەۋشىلىك جاسادى.
