وڭتۇستىك شاھاردا 4 كۇن بويى ءورتتىڭ سوندىرىلمەگەنىن ايتىپ شاعىمدانعان قالا تۇرعىندارىنىڭ جازباسىندا «كەڭساي-1 زيراتىنىڭ ماڭىنداعى قوقىس ءۇيىندىسى ورتەنىپ جاتىر. بۇل قوقىستى زيرات جۇمىسشىلارى ۇيگەن. ءتورت كۇن بويى ءتۇتىن شىعىپ جاتىر. سارسەنباەۆ كوشەسىندە تۇراتىن تۇرعىندارعا تىنىس الۋ وتە قيىن. ءورتتى سوندىرمەي-اق, قوقىستى شىعارماسا بولمايدى. قالاداعى ورتە قارسى قىزمەتكە حابارلاستىق. بىراق, ناتيجە جوق» دەلىنگەن.
الەۋمەتتىك جەلىدەگى ساۋالعا قالالىق تجد وكىلدەرى جاۋاپ بەرىپ, ءورت باستالعان كۇننەن بەرگى جۇمىستاردى حرونولوگيالىق ءتارتىپ بويىنشا اتاپ ءوتتى.
«قازاقستان رەسپۋبليكاسىنىڭ زاڭناماسىنا سايكەس 101 جەلىسىنە تۇسكەن قوڭىراۋعا مىندەتتى تۇردە جاۋاپ بەرىلەدى. دەپارتامەنتكە كەلىپ تۇسكەن بارلىق حابارلاما بويىنشا ارەكەت ەتەدى. 8 مامىردا ساعات 22:30-دا 101 نومىرىنە حابارلاسقان تۇرعىندار «كەڭساي-1» مۇسىلمان زيراتىنىڭ قاسىندا ءورت باستالعانىن ايتتى. وقيعا ورنىنا ءورت سوندىرۋشىلەر جەتۋى قيىن بولدى. ءورت سوندىرۋشىلەر كەلگەندە اۋدانى 50 شارشى مەتر اۋماق ورتەنىپ جاتقان. ءورتتى سوندىرۋگە 10 ادام, 2 اۆتوتسيستەرنا جۇمىلدىرىلدى. ءورت تۇنگى ساعات 00:22 مينۋتتا ءسوندىرىلدى», - دەلىنگەن تجد ءباسپاسوز دەرەگىندە.
دەپارتامەنت وكىلدەرى سونىمەن بىرگە 9 مامىردا جاۋىن جاۋعاندىقتان ول ماڭدا ءتۇتىن شىقپاعانىن اتاپ ءوتتى. 11 مامىردا 20:31 مينۋتتا سول اۋداننىڭ تۇرعىنى 101 ديسپەتچەرىنە «كەڭساي-1» مۇسىلمان زيراتىندا ءورت باستالعانى تۋرالى دەرەكتەردى نازارعا الدى. ءورت سوندىرۋشىلەر وقيعا ورنىنا جاياۋ جەتۋگە ءماجبۇر بولدى. بەلگىلى بولعانداي, ول جەردە دە قوقىس ورتەنگەن. اۋدانى 50 شارشى مەتر ءورت تۇنگى ساعات 21:17-دە ءسوندىرىلدى.
بۇل ءورتتى سوندىرۋگە 6 ادام مەن 1 كولىك جۇمىلدىرىلدى. ال 12 مامىردا ساعات 11:53-تە تاعى مۇسىلمان زيراتىندا ءورت شىققانى تۋرالى حابارلاما تۇسكەن. وقيعا ورنىنا بارعاندا ءورت سوندىرۋشىلەر ورتەنگەن جەر شوقتانىپ بىقسىپ جاتقانىن كورگەن. تۇتىندەگەن 30 شارشى مەتر اۋماق ساعات 12:26-دا ءسوندىرىلدى. توتەنشە جاعدايدان ەشكىم جاپا شەكپەگەن.
