ماسەلەن, قىتايدىڭ «تيانتسزين تيانحاي» كلۋبى قارجى تاپشىلىعى سالدارىنان ەل چەمپيوناتىن جالعاستىرۋدان باس تارتتى. الداعى كۇندەرى ولار بانكروتقا ۇشىراعانىن راستايتىن قۇجاتتاردى قۇزىرلى ورگاندارعا تابىستاۋدى كوزدەپ وتىر. ىرگەتاسى 2006 جىلى عانا قالانعان ايتۋلى ۇجىم بىردەن ءوزىن جاقسى قىرىنان كورسەتكەن ەدى. كوماندانىڭ باس باپكەرى بولىپ ايگىلى يتاليالىق مامان فابيو كانناۆارو تاعايىندالسا, كەزىندە وسى كلۋبتىڭ ساپىندا بەلگيالىق اكسەل ۆيتسەل مەن فرانتسيالىق انتوني مودەست جانە سوڭعى ۋاقىتتا برازيليالىق الەشاندرە پاتو سىندى لەگيونەرلەر ونەر كورسەتتى. 2017 جىلى «تيانتسزين تيانحاي» قىتاي چەمپيوناتىندا ءۇشىنشى ورىندى يەلەندى.
كەيبىر دەرەككوزدەرىنە سەنسەك, قازىرگى كەزدە «تيانتسزين تيانحايدىڭ» جالپى قارىزى 150 ميلليون ەۆرونى قۇراعان ەكەن. جاعدايدىڭ بايىبىنا بارعان ويىنشىلاردىڭ بارلىعى دا ءوز جالاقىلارىن الۋدان باس تارتقان ەدى. بىراق سونىڭ وزىندە تيانتسزين قالاسىنىڭ كومانداسىن وسى قيىندىقتان قۇتقارىپ قالۋ مۇمكىن بولمادى.
