ۆيدەودا بالىق اۋلاۋشىلاردىڭ ۆەنتەر اتالاتىن اۋ قۇرالىمەن التىن تۇستەس بالىق ۇستاعانى تۇسىرىلگەن. بالىقشىلار دا, الەۋمەتتىك جەلىنى قولدانۋشىلار دا بالىقتى «التىن جايىن» اتاعان. شىنىمەن التىن بالىق پا, الدە...
– ءبىز دە بۇل ۆيدەونى كوردىك. ونى الماتىداعى ارىپتەستەرىمىزگە جىبەردىك. بۇل البينوس جايىن دەگەن توقتامعا كەلدىك. بالىقتى قانداي دا ءبىر اۋرۋعا ۇشىراعان دەۋگە بولمايدى. ويتكەنى, ونىڭ بەلسەندى قيمىلى بار. ال سۋ قويماسىندا ۋلانعان بولۋى مۇمكىن دەسەك, وندا وزگە بالىقتار دا ءتۇسىن وزگەرتەر ەدى. وسى تۇرعىدان ايتقاندا, بالىقتىڭ ءتۇسىن وزگەرتۋىنە تابيعي ورتانىڭ اسەرى تيمەگەن سياقتى, -دەيدى «بالىق شارۋاشىلىعى عىلىمي-وندىرىستىك ورتالىعى» جشس اتىراۋ فيليلالىنىڭ ديرەكتورى ەربولات قاديموۆ.
ونىڭ پىكىرىنشە, بۇل البينوس بالىق بولۋى مۇمكىن. ارينە, بۇعان جايىن زەرتتەۋ ارقىلى عانا ناقتى تۇجىرىم جاسالار ەدى. الايدا, قازىر التىن تۇستەس جايىن قايدا؟ سۋعا قايتا جىبەرىلدى مە, جوق پا؟ ونى ەشكىم بىلمەيدى.
ءتىپتى ۆيدەونىڭ قايدا, قاشان تۇسىرىلگەنى انىقتالعان جوق. بىراق, وندا بالىقشىلاردىڭ قازاقشا, ورىسشا سوزدەرى ەستىلەدى. سوعان قاراعاندا, ەدىل وزەنىنىڭ تومەنگى ساعاسىندا, ياعني, رەسەيدىڭ استراحان وبلىسىندا, بالكىم, اتىراۋ وبلىسىنىڭ قۇرمانعازى اۋدانى اۋماعىندا تۇسىرىلگەن شىعار. الدە قيعاش وزەنىندە مە؟
