ەل اۋماعىندا توتەنشە جاعداي رەجيمى توقتاتىلعانىمەن, كارانتيندىك ساقتىق شارالارى تولىق اتقارىلۋى ءتيىس. ارنايى بريفينگ بارىسىندا وڭىردەگى قوعامدىق كولىك قوزعالىسى, ساۋدا ورىندارىنىڭ, قىزمەت كورسەتۋ نىساندارىنىڭ, بالاباقشالار مەن وزگە دە نىسانداردىڭ جۇمىس كەستەسى ءمالىم بولدى.
قازىرگى تاڭدا 20 مىڭنان استام اقمولالىق كوروناۆيرۋستى انىقتاۋعا تەست تاپسىرعان. زەرتتەۋ قورىتىندىسى بويىنشا 110 ازاماتتىڭ اۋرۋعا شالدىققانى راستالدى. ونىڭ 96-سى تسەلينوگراد اۋدانىندا تىركەلگەن. وتكەن اپتادا وبلىس بويىنشا ۆيرۋستىڭ تارالۋ دەڭگەيى 1,3 پايىزدى قۇراعان. جالپى بۇل كورسەتكىش 3 پايىزدان تومەن دەڭگەيدە ساقتالىپ وتىر. بۇل وبلىستاعى ەديمەميولوگيالىق جاعدايدىڭ تۇراقتى ەكەندىگىن ايعاقتايدى.
– ۆيرۋستىڭ تۇبەگەيلى جويىلماۋى سالدارىنان بۇل تالاپتار ساقتالىپ وتىر. ءالى دە اۋرۋ جۇقتىرۋ دەرەكتەرى تىركەلۋدە. بۇل تالاپتاردى ساقتاۋ كۇندەلىكتى ءومىر تارتىبىنە ەنۋى ءتيىس. ەگەر ساقتىق شارالارى ءتيىستى دەڭگەيدە بولماسا, اۋرۋدىڭ ءورشۋ قاۋپى بار. جالپى, ۆيرۋستىق اۋرۋلاردىڭ مەرزىمدىك سيپاتقا يە ەكەنى بەلگىلى. سوندىقتان, كۇز ايلارىندا كاروناۆيرۋستىڭ ءورشۋ قاۋپى بار,–دەيدى وبلىستىڭ باس سانيتارلىق دارىگەرى ايناگۇل مۋسينا.
وڭىردە 70 بلوك-بەكەت قىزمەتىن جالعاستىرادى. ەلدى مەكەندەرگە كەلىپ-كەتۋشى تۇرعىندار «قولداۋ», «سەرگەك» جۇيەلەرىنىڭ كومەگىمەن رۇقسات قۇجاتتارىن الۋى ءتيىس. توتەنشە جاعداي رەجيمى توقتاتىلعانىمەن, كارانتين شارالارى ساقتالادى. ياعني, تۇرعىندار سانيتارلىق تالاپتاردى تولىق ساقتاۋى ءتيىس.
– مامانداردىڭ بولجامى بويىنشا ۆيرۋستىڭ تارالۋىنىڭ جوعارعى شەگى ءالى تولىق وتكەن جوق. بىرقاتار وڭىرلەردە اۋرۋ تارالۋى ءالى دە ءورشىپ تۇر. جاعدايدىڭ باقىلاۋدان شىعىپ كەتۋى مۇمكىن. اۋرۋدىڭ ءورشۋى ورىن العان جاعدايدا وبلىستىڭ مەديتسينا مەكەمەلەرىندە قاجەتتى قۇرال-جابدىقتار جەتكىلىكتى,–دەيدى ايناگۇل مۋسينا.
جۋىق ارادا بالاباقشالار اشىلادى دەپ كۇتىلۋدە. مەكتەپكە دەيىنگى ءبىلىم بەرۋ مەكەمەلەرىندە دەزينفەكتسيالاۋ شارالارى مەن كارانتين تالاپتارى تولىق ورىندالادى. توپتاعى بۇلدىرشىندەر سانى دا 15-تەن اسپاۋى ءتيىس. بۇدان بىلاي, اۋماعى 2 مىڭ شارشى مەترگە دەيىنگى ساۋدا ورىندارى كەشكى ساعات التىعا دەيىن جۇمىس ىستەيدى. سپورت جانە مادەنيەت نىساندارى, حالىققا قىزمەت كورسەتۋ ورتالىقتارى دا قىزمەتىن جانداندىرادى. قوعامدىق ورىنداردا 2 مەترلىك الەۋمەتتىك اراقاشىقتىق ساقتالۋى ءتيىس.
