تابيعاتتىڭ تىلسىمى سول, قۇرالايدىڭ سالقىنى كەزىندە ەتكە قۇمار دالا جىرتقىشى ءدال وسى ۋاقىتتا تابەتى قاشىپ, ەتكە جاقىنداي الماي قالادى ەكەن. ال بۇل ساتتە اقبوكەندەر جاپپاي تولدەپ, قۇرالايلارى اياعىنان تۇرىپ ۇلگەرەدى.
«مامىردىڭ باسى – اقبوكەندەر تولدەيتىن ۋاقىت. بۇل كەزەڭدە جىلى كۇن رايى جاڭبىرلى جانە جەلدى بولادى. بۇل كەزەڭ تەك ەكى اپتاعا سوزىلادى», دەيدى ورمان شارۋاشىلىعى جانە جانۋارلار دۇنيەسى كوميتەتىنىڭ ءباسپاسوز حاتشىسى ساكەن دىلداحمەت.
وحوتزووپرومنىڭ ينسپەكتورلارى, سونداي-اق ورمان شارۋاشىلىعى مەن جانۋارلاردىڭ اۋماقتىق ينسپەكتسياسى بوكەندەردى براكونەرلەردەن قورعاپ, باقىلاۋعا العان. ايتسە دە تابيعاتتىڭ ءوز زاڭى بار. جاڭا تۋعان دالا ەركەسىن وڭاي ءومىر كۇتىپ تۇرعان جوق. السىزدەرى ولەدى, كەيبىرى جىرتقىشقا جەم دە بولادى. تەك كۇشتىلەرى عانا امان قالادى. ادامزات جارالعالى بىرگە جاساسىپ كەلە جاتقان كيىك قانشا ءداۋىر وتسە دە قۇرىپ كەتپەي, تۇقىمىن ساقتاپ قالعاندىعىمەن ەرەكشە.
