اقوردادا مەملەكەت باسشىسى نۇرسۇلتان نازارباەۆتىڭ توراعالىعىمەن قازاقستان رەسپۋبليكاسى قاۋىپسىزدىك كەڭەسىنىڭ وتىرىسى ءوتتى, دەپ حابارلادى پرەزيدەنتتىڭ ءباسپاسوز قىزمەتى.
اقوردادا مەملەكەت باسشىسى نۇرسۇلتان نازارباەۆتىڭ توراعالىعىمەن قازاقستان رەسپۋبليكاسى قاۋىپسىزدىك كەڭەسىنىڭ وتىرىسى ءوتتى, دەپ حابارلادى پرەزيدەنتتىڭ ءباسپاسوز قىزمەتى.
وتىرىس باستالار الدىندا وعان قاتىسۋشىلار كەڭەس وداعىنىڭ باتىرى, حالىق قاھارمانى, قازاقستان رەسپۋبليكاسىنىڭ العاشقى قورعانىس ءمينيسترى ساعادات نۇرماعامبەتوۆتى ءبىر مينۋت ۇنسىزدىكپەن ەسكە الدى.
– وتكەن سوعىستىڭ باتىرى, ناعىز جاۋىنگەر. تاۋەلسىزدىك جىلدارى ول بىزبەن بىرگە بولدى جانە ءوز وتانىن سۇيەتىن, ەڭبەكسۇيگىشتىگىمەن, تاباندىلىعىمەن, ەرجۇرەكتىلىگىمەن ەرەكشەلەنگەن ادام رەتىندە حالىقتىڭ ەسىندە قالدى. ومىرلىك تاجىريبەسىمەن ءبىزدىڭ جاس بۋىندى تاربيەلەۋگە بولاتىن جالپىحالىقتىق ماڭىزى بار تۇلعادان ايىرىلدىق, – دەدى نۇرسۇلتان نازارباەۆ.
وتىرىستا گەوساياسي ورتاداعى وزگەرىستەردى ەسكەرە وتىرىپ, قازاقستاننىڭ دامۋ ستراتەگياسىنا جانە ۇلتتىق قاۋىپسىزدىك جۇيەسىن جاڭعىرتۋ شارالارىنا قاتىستى ماسەلەلەر قارالدى.
قازاقستان پرەزيدەنتى قازىرگى الەمدە قاۋىپسىزدىككە تونگەن قاتەردىڭ ازايماي وتىرعانىن اتاپ ءوتتى. ولاردىڭ قاتارىندا تەرروريزم, الەۋمەتتىك كيكىلجىڭدەر, جالعاسىپ جاتقان ەكونوميكالىق تۇراقسىزدىق بار. وسى ورايدا مەملەكەت باسشىسى الەمدەگى احۋالدى ۇدايى نازاردا ۇستاپ, جاعدايعا وراي ۇلتتىق قاۋىپسىزدىك جۇيەسىنە جەدەل تۇزەتۋلەر ەنگىزۋ جانە بەيىمدەۋ ءۇشىن دەر كەزىندە شارالار قابىلداۋ قاجەتتىگىن اتاپ ءوتتى.
وتىرىس بارىسىندا قارالعان ماسەلەلەر بويىنشا پرەزيدەنتتىڭ كومەكشىسى ە.قازىحانوۆ, پرەزيدەنتتىڭ كومەكشىسى – ۇلتتىق قاۋىپسىزدىك كەڭەسىنىڭ حاتشىسى ق.قوجامجاروۆ ءسوز سويلەدى.
وتىرىستىڭ قورىتىندىسىندا قازاقستاندى وڭىرلىك وزگەرىستەر مەن جاھاندىق احۋالعا بەيىمدەۋگە, سونداي-اق ۇلتتىق قاۋىپسىزدىك جۇيەسىن جاڭعىرتۋعا باعىتتالعان شارالار كەشەنى ماقۇلداندى. اتاپ ايتقاندا, بىرقاتار ينستيتۋتتىق, نورماتيۆتىك-قۇقىقتىق جانە ۇيىمداستىرۋ شارالارى كوزدەلىپ وتىر.
-----------------------------------------
سۋرەتتى تۇسىرگەندەر
س.بوندارەنكو, ب.وتارباەۆ.
