وبلىس اكىمى ومىرزاق شوكەەۆ تۇركىستاندى جاڭعىرتۋ اياسىنداعى جۇمىستار بارىسى جايلى ەسەپ العان لەزدەمەلىك ءماجىلىس وتىرىسىندا قالا اكىمى راشيد ايۋپوۆ وقۋشىلار سارايى, 7 مىڭ ورىندىق ستاديون, ۇلتتىق قولونەرشىلەر ورتالىعى, امفيتەاتر, كەرۋەن ساراي, اتتراكتسيوندار ساياباعى, باسسەينى بار سپورت كەشەنى, كەلۋ ورتالىعى, باسقارمالار مەن دەپارتامەنتتەر ءۇيىنىڭ عيماراتتارىنداعى قۇرىلىستىڭ باسىم بولىگى اياقتالعانىن جەتكىزدى. بۇگىندە ولاردىڭ اينالاسىن جاسىل جەلەككە بولەپ, اباتتاندىرۋ جۇمىستارى قىزۋ ءجۇرىپ جاتىر.
قۇرىلىس جۇمىستارى ماقتاارال اۋدانىندا دا قارقىن الا تۇسپەك. جاڭادان سالىناتىن شاعىن اۋداندا تاۋلىك بويى قۇرىلىس جۇمىستارى جۇرۋدە. قۇرىلىس الاڭىنا تارتىلعان 600-گە جۋىق جۇمىسشىنىڭ جارتىسىنان استامى جەتىساي مەن ماقتاارال اۋدانىنىڭ تۇرعىندارى. سونداي-اق اپتالىق لەزدەمەدە سۋ العان ۇيلەردىڭ, مال باسى مەن ەگىستىك القاپتارىنىڭ قۇجاتتارى جيناقتالىپ, ساراپتاما جۇمىستارى جۇرگىزىلىپ جاتقانى ايتىلدى.
