قازاقستاندىق گرەك-ريم كۇرەسىنىڭ شەبەرى نۇرماحان تىناليەۆ (سۋرەتتە سول جاقتا) ۆەنگريانىڭ استاناسى – بۋداپەشت قالاسىندا مارەگە جەتكەن الەم چەمپيوناتىندا 120 كيلوعا دەيىنگى سالماقتا قولا مەدالعا قول جەتكىزدى.
قازاقستاندىق گرەك-ريم كۇرەسىنىڭ شەبەرى نۇرماحان تىناليەۆ (سۋرەتتە سول جاقتا) ۆەنگريانىڭ استاناسى – بۋداپەشت قالاسىندا مارەگە جەتكەن الەم چەمپيوناتىندا 120 كيلوعا دەيىنگى سالماقتا قولا مەدالعا قول جەتكىزدى.
ءبىزدىڭ جەرلەسىمىز بىرىنشىلىكتە ءۇشىنشى ورىن ءۇشىن تالاستى الاڭ يەسى – ۆەنگر اتلەتى ميحال ديك-باردوشپەن وتكىزىپ, 5:0 ەسەبىمەن جەڭىسكە جەتتى. ايتا كەتۋ كەرەك, نۇرماحان بۇل ەسەپتى بەلدەسۋدىڭ ءبىرىنشى كەزەڭىندە-اق قامتاماسىز ەتكەن. ال ەكىنشى كەزەڭدە وسى ارتىقشىلىقتى سول كۇيى ۇستاپ قالدى. ناتيجەسىندە قولا مەدالدى موينىنا تاقتى. سونىڭ ارقاسىندا قازاقستان قۇراماسىنىڭ بۋداپەشتتە ءبىرىنىڭ سوڭىنان ءبىرى وتكەن ەركىن كۇرەس, ايەلدەر كۇرەسى جانە گرەك-ريم كۇرەسى سىندى سايىستاردا العان قولا مەدالدارىنىڭ سانى ەكىگە جەتتى. مۇنىڭ الدىندا بۇل بيىكتى 63 كيلوعا دەيىنگى سالماقتاعى جەرلەسىمىز ەكاتەرينا لاريونوۆا باعىندىرعان بولاتىن.
وسىمەن نۇرماحان تىناليەۆ ءۇشىنشى مارتە الەمنىڭ قولا جۇلدەگەرى اتانىپ وتىر. ول بۇعان دەيىن 2010 جىلى ماسكەۋدە, 2011 جىلى ىستامبۇلدا 120 كيلوعا دەيىنگى سالماقتا ءۇشىنشى تۇعىردان كورىنىپ ەدى. سونىڭ ىشىندە نۇرماحاننىڭ 2010 جىلى شيرەك فينالدا بەيجىڭ وليمپياداسىنىڭ جەڭىمپازى, الەمنىڭ ەكى دۇركىن چەمپيونى حاسان باروەۆتى 3:1 ەتىپ جەڭىپ, ونى جۇلدەسىز قالدىرعانى ەشقاشان ۇمىتىلمايتىن ايتۋلى ايقاستاردىڭ ءبىرى بولدى. مۇنىڭ سوڭىنان كۋبالىق وليمپيادا چەمپيونى لوپەسكە جول بەرىپ الۋى عانا ءبىزدىڭ اتلەتتى فينالعا جەتكىزبەدى. ەسەسىنە, ءۇشىنشى ورىن ءۇشىن شايقاستا چەحتىڭ ۇكىلەگەن ءۇمىتى مارك شۆەتستى «شايناپ تاستاعان».
بالۋان نۇرماحان تىناليەۆتىڭ بۇلاردان دا باسقا سپورتتىق جەتىستىكتەرى بارشىلىق. ايتالىق, ول 2010 جىلى قىتايدىڭ گۋانچجوۋ قالاسىندا وتكەن ازيا ويىندارىنىڭ چەمپيونى اتانسا, 2013 جىلى قازاندا جالاۋ كوتەرگەن بۇكىلالەمدىك ۋنيۆەرسيادانىڭ قولا جۇلدەسىن ەنشىلەدى. سونىمەن بىرگە, سپورت ماماندارى اراسىندا قاشاننان «كىشى الەم چەمپيوناتى» اتانىپ جۇرگەن ي.پوددۋبنىي اتىنداعى حالىقارالىق ءتۋرنيردىڭ 2010 جىلى رەسەيدىڭ تيۋمەن قالاسىندا ءۇشىنشى ورىندى جەڭىپ العان.
دامير قوجامقۇل.
