Egemen Qazaqstan گازەتىنىڭ 2020 جىلعى 27 اقپان كۇنگى №40 سانىندا جاريالانعان «ۇمىت قالعاندار كىمنەن قورقادى؟» اتتى ماقالا مەكتەپ كىتاپحاناشىلارىنىڭ ماسەلەسىن قوزعاپتى. كوتەرىلگەن ماسەلە وتە ورىندى, العىسىمىز شەكسىز. بىراق ءبىزدىڭ جانايقايىمىز, قاعاز بەتىندە عانا كوتەرىلمەي, تالقىلانىپ, ىسكە اسسا ەكەن دەيمىز. قانداي مامان يەسى بولسىن, وزدەرى وسى بۇلاقتان سۋ ءىشىپ, ءوسىپ-ونگەنىن, قولىنا مەكتەپ كىتاپحاناسىنان كىتاپ العانىن, سول كىتاپتان ءبىلىم الىپ, وسىنداي دارەجەگە جەتىپ وتىرعانىن ۇمىتپاس. مەكتەپ كىتاپحاناسى – ۇلى ماماندىق. ەڭ كوپ قازىنا كىمدە دەسە, مەكتەپ كىتاپحاناشىسىندا دەپ ايتار ەدىم. مەكتەپ ديرەكتورىنان باستاپ, كىشكەنتاي وقىرمانداردىڭ جۇرەگىن جاۋلايتىن, ەشقاشان «جوق» دەمەيتىن, ءبارىنىڭ كوڭىلىن, ءتىلىن تاباتىن, جانى ىزگى, جايساڭ جاندار عانا وسى ماماندىق يەسى بولا الادى. مەكتەپ كىتاپحاناشىسى دەگەنىمىز – اقىن, جازۋشى, ۇستاز, تاربيەشى, ادىسكەر, ءانشى, ءبيشى, پسيحولوگ.
كىتاپحاناشى ماماندىعىن ءۇش جىل, مۇعالىمدىكتى التى جىل وقىدىم. ءبارىن قوسقاندا توعىز جىل. مەن ەڭبەك ەتكەن 40 جىلدا ءبىلىم سالاسىندا كوپتەگەن وزگەرىس بولدى. مەكتەپسىز ءومىرىمىز قاراڭ قالاتىن سياقتى. قانداي كەزەڭدەردەن وتپەدىك. بارىنە شىداپ باقتىق. بىراق ەڭبەكاقى ماسەلەسىنە كەلگەندە مەكتەپ كىتاپحاناشىلارىن ۇمىتىپ كەتكەنى جانىمدى جاي تاپتىرمادى. وندا نە ءۇشىن جوعارى وقۋ ورىندارىندا وقىدىم؟ اكەم مارقۇم ايتقانداي, كۇرەكتەي ەكى ديپلومدى نە ءۇشىن الدىم, مەنى وسىنشاما جىلدان كەيىن مازاق ەتۋ ءۇشىن بە؟! مارتەبەمىزدى تۇسىرۋگە كىمنىڭ قاقىسى بار؟ مادەنيەت جانە ءبىلىم سالاسىندا قىزمەت ەتكەنىمىز ءۇشىن, مەكتەپ وقۋشىلارىن وقۋلىقپەن قامتىپ, قالالىق, مەكتەپىشىلىك ءىس-شارالاردى جوعارى دەڭگەيدە وتكىزگەنىمىز ءۇشىن بە؟
نازارباەۆ زياتكەرلىك مەكتەپتەرىنىڭ كىتاپحانالارىندا كىتاپحاناشى-پەداگوگ, كىتاپحاناشى-ادىسكەر دەگەن مارتەبە بار. ال قالا كىتاپحاناشىلارى ادىسكەر, مەڭگەرۋشى, بيبليوگراف, وقۋ ءبولىمى, ت.ب. سالالارعا بولىنە وتىرىپ, جۇمىستارى جەڭىل بولسا دا, الاتىن جالاقىلارى كوپ. ەندەشە, ءدال وسىنداي ەڭبەك ەتىپ وتىرعان مەكتەپ كىتاپحاناشىلارىنىڭ ەڭبەكاقىسىن كوتەرمەۋ كىمگە كەرەك؟ ارينە ەشقانداي مەكتەپ ديرەكتورى نەمەسە اكىمشىلىك ماعان «ەدەن جۋ» نەمەسە «بارىپ كەل, الىپ كەل» دەگەن جوق. اقشاسىن از تولەسە دە, نامىسىمدى ەشكىم قورلاعان ەمەس. الايدا ۇكىمەت مۇعالىمدەر, مادەنيەت قىزمەتكەرلەرىنىڭ جالاقىسىن ءوسىرىپ, مەكتەپ كىتاپحاناشىلارىن ۇمىتىپ كەتكەنى – ادامنىڭ اقىلىنا سىيمايتىن جايت. ياعني ءبىزدىڭ قۇقىعىمىزدى اياقاستى ەتىپ وتىر.
راس, كەيبىر كىتاپحاناشىلار جالاقىنىڭ ازدىعىنان ءوز مەكتەبىندە قوسالقى جۇمىس ىستەۋگە ءماجبۇر. ايتسە دە قازىرگى زاماندا مەكتەپ كىتاپحاناشىلارىنىڭ ەڭسەسى بيىك بولۋى ءتيىس. ءبىز ءوز ماماندىعىمىزبەن ماقتانامىز. ەندەشە, تىنىمسىز ەڭبەگىمىزگە سايكەس ەڭبەكاقىمىز دا جوعارى بولۋى كەرەك.
باحتىقان باشيبەكوۆا,
№5 گيمنازيانىڭ كىتاپحانا مەڭگەرۋشىسى
نۇر-سۇلتان
