ونىڭ مالىمدەۋىنشە, اۋعان سوعىسىندا جاراقات العان ازاماتتار 2020 جىلى پرەزيدەنت جارلىعىمەن بەكىتىلگەن ارداگەرلەر تۋرالى زاڭدا كورسەتىلگەندەي ۇلى وتان سوعىسىنىڭ ارداگەرلەرىنە تەڭەستىرىلگەن جانە زاڭ بويىنشا جەرگىلىكتى اتقارۋشى ورگان ولاردى ۇيمەن, باسقا دا الەۋمەتتىك كومەكپەن قامتاماسىز ەتۋى ءتيىس.
«اپاتتى ۇيدە تۇرىپ جاتىرمىن. باسپانا سالۋعا بىرىنشىدەن جاعدايىم جوق, ەكىنشىدەن دەنساۋلىعىم كوتەرمەيدى. جاسىم دا كەلىپ قالدى. زاڭ شەڭبەرىندە جەرگىلىكتى اكىمدىكتەن كومەك سۇراپ, ءوتىنىش حات جىبەردىم. ءتيىستى ازاماتتارعا دا جولىقتىم. بىراق ءالى ناتيجە بولماي جاتىر. قالا اكىمدىگى قولۇشىن سوزىپ, بۇل ماسەلەنى وڭ جاعىنان شەشىپ بەرەدى دەگەن ۇمىتتەمىن», دەيدى ارداگەر.
ش.قۇرالباەۆ قالالىق قۇرىلىس باسقارماسىنا ءوتىنىش حات جازعان. الايدا ونداعى ماماندار باسقارما جەكە سەكتورداعى ۇيلەردى جوندەۋگە, جاڭاسىن سالىپ بەرۋگە قۇزىرەتتى ەمەس ەكەنىن جەتكىزگەن. جاۋاپ حاتتا سونداي-اق اۋدان اكىمدىگى دەمەۋشىلەر ەسەبىنەن تۇرعىن ۇيگە جاردەم بەرە الاتىنى جايىندا جايىندا.
وسىعان بايلانىستى ءبىز ەڭبەكشى اۋدانى اكىمدىگىنە حابارلاستىق. الەۋمەتتىك ءبولىم باسشىسى عالىمجان مىرزاشەۆ بۇل جاعدايدان حاباردار ەكەنىن مالىمدەدى. اكىمدىك وسى ماسەلە بويىنشا ارداگەرمەن كەزدەسىپ, تۇرمىس جاعدايىمەن تانىسقان. بۇل رەتتە جەرگىلىكتى اتقارۋشى بيلىك الەۋمەتتىك قولداۋدىڭ ءبىر نۇسقاسىن قاراستىرىپ وتىر.
ارداگەر ءوز قالتاسىنان تاۋەلسىز باعالاۋشىلاردى جالداپ, ءۇيى تۇرۋعا جارامسىز دەگەن تولقۇجات الدىرۋى كەرەك. سول قۇجات بويىنشا كەيىن وعان اكىمدىك تاراپىنان تەگىن باسپانا بەرىلەدى.
الايدا قازىر تۇرىپ جاتقان جەكە سەكتورداعى ءۇيى مەملەكەت ەسەبىنە وتەدى. نەمەسە جاڭعىرتۋ باعدارلاماسىمەن كوكساي شاعىناۋدانىندا بۇزىلىپ جاتقان ەسكى ۇيلەردىڭ قۇرىلىس ماتەريالدارىن تەگىن جەتكىزىپ بەرۋگە اكىمدىك كەلىسكەن. بۇل ۇسىنىستى بىراق ارداگەر قابىل الماپتى. اۋداندىق اكىمدىك مامانى ش.قۇرالباەۆتى تۇرعىن ءۇي باسقارماسىنا ءۇي كەزەگىنە تۇرا المايتىنىن مالىمدەدى. سەبەبى قازىرگى باسپاناسى ءوزىنىڭ اتىندا ەكەن. ەكىنشىدەن ارداگەردىڭ تۇرمىسى ەشقانداي الەۋمەتتىك وسال توپقا جاتپايدى. مەملەكەتتىڭ تەگىن ۇيمەن قامتۋ شاراسى تەك وسىمەن عانا شەكتەلگەن. ەڭبەكشى اۋدانىندا ورنالاسقان ءىرى كاسىپورىن «پەتروقازاقستانويلپروداكتس» مۇناي وڭدەۋ زاۋىتى دەمەۋشىلىك تانىتىپ, اينالاسىنداعى ەلدى مەكەندەرگە سپورت كەشەندەرىن سالىپ بەرىپ جاتىر.
ماماننىڭ ايتۋىنشا, ينۆەستورلار بۇل جەردە جەكە سەكتورداعى ۇيلەردىڭ قۇرىلىسىن قارجىلاندىرۋعا مىندەتتى ەمەس. ولار بيزنەستىڭ الەۋمەتتىك جاۋاپكەرشىلىگى اياسىندا قوعامدىق نىساندار سالۋدى ءوز مويىندارىنا الىپ وتىر. قىسقاسى مامان اۋعان سوعىسى ارداگەرلەرىن تەگىن ۇيمەن قامتۋ زاڭ شەڭبەرىندە قاراستىرىلماعانىن مالىمدەدى.
قورعانىس ىستەرى جونىندەگى دەپارتامەنت قىزمەتكەرى, ارداگەرلەر قوعامدىق بىرلەستىكتەرىنىڭ توراعاسى شىمكەنت قالاسىنىڭ قۇرمەتتى ازاماتى سەرىكباي ونباەۆتىڭ ايتۋىنشا, ەكىمىڭىنشى جىلدارى شىققان ۇكىمەتتىڭ №2247-ءشى قاۋلىسىندا اۋعان سوعىسى ارداگەرلەرىنە تەگىن باسپانا بەرۋ ماسەلەسى الەۋمەتتىك كومەكتەردىڭ ءبىر تەتىگى رەتىندە قاراستىرىلعان. سونىڭ اياسىندا اۋعان جەرىندە شايقاسقان قانشاما مايدانگەر ءۇيلى بولدى. الايدا 2020 جىلى 6 مامىردا شىققان ۇكىمەتتىڭ 322-6 قاۋلىسىمەن بۇل جەڭىلدىكتەر ءوزىنىڭ كۇشىن جويدى. ەسەسىنە سەمەيدەگى سىناق پوليگونىندا اسكەري مىندەتىن وتەگەن, چەرنوبىل اپاتىن جويۋعا اتسالىسقان, تاۋلى قاراباق, تاجىك-اۋعان, اۋعان سوعىسىندا بولعاندار ۇلى وتان سوعىسى ارداگەرلەرىنە تەڭەستىرىلدى.
سەرىكباي ونباەۆتىڭ مالىمدەۋىنشە, جۋىردا قازاقستان بويىنشا اۋعان سوعىسى ارداگەرلەرىنىڭ كەزەكتەن تىس جينالىسى وتكەن. وندا ۇكىمەتتىڭ بۇرىنعى قاۋلىسىن كەرى قايتارىپ, اۋعانستانداعى سوعىسقا قاتىسقان ازاماتتارعا بولەك مارتەبە بەرۋ تۋرالى ۇسىنىستار ايتىلدى. ولار ارنايى ءوتىنىش حات رەتىندە قورعانىس مينيسترلىگىنە جولداندى.
ەندىگى رەتتە ارداگەرلەر مينيسترلىكتەن قانداي جاۋاپتىڭ كەلەتىنىن كۇتىپ وتىر. قوعامدىق بىرلەستىكتەر توراعاسىنىڭ ايتۋىنشا شىمكەنتتە 886 اۋعان سوعىسى ارداگەرى بار. بىراق بەيرەسمي ولاردىڭ سانى 2.5 مىڭنان اسادى. كوپشىلىگى وتىرىك قۇجات جاساتىپ العاندار. سوندىقتان دا پرەزيدەنت ەلدە ءارتۇرلى ارداگەرلەر كوبەيىپ كەتكەنىن ماسەلە رەتىندە ايتقان بولاتىن. قازىر اۋعان جەرىندە سوعىسقان ارداگەرلەردىڭ دەرەكتەرى قورعانىس ىستەرى جونىندەگى دەپارتامەنت تاراپىنان تەكسەرىلۋ ۇستىندە. ول ءۇشىن رەسەيدىڭ پودولسك قالاسىنداعى ورتالىق اسكەري ارحيۆتەن قۇجاتتارى سۇراتىلىپ جاتىر.
جالپى شىمكەنتتە 15 اقپان – كەڭەس اسكەرىنىڭ اۋعانستاننان شىعارىلعان كۇنىنە وراي جەرگىلىكتى ءماسليحات بەكىتكەن ەرەجەگە ساي 50 ايلىق ەسەپتىك كورسەتكىش مولشەرىندە ءبىر رەتتىك سىياقى تاعايىندالعان. ال مۇگەدەكتىگى بار ارداگەرلەرگە ساۋىقتىرۋ ورتالىقتارى مەن شيپاجايلارعا تەگىن جولداما بەرىلەدى. قالالىق جۇمىسپەن قامتۋ جانە الەۋمەتتىك قورعاۋ باسقارماسىنان الىنعان مالىمەت بۇل. سونىمەن مەملەكەت تاراپىنان اۋعان جەرىندەگى مايدان جورىعىندا بولعان ازاماتتارعا وسىنداي جەڭىلدىكتەر قاراستىرىلعان.
قورىتا ايتقاندا جاستىق شاعىندا وتانعا قىزمەت ەتىپ, ءومىرىن قۇرباندىققا تىككەن ساربازدار قارتايعان شاعىندا قوعامعا كەرەكسىز بولىپ, تاسادا قالىپ كەتپەسىنشى. وسى رەتتە شاديار اعامىزدىڭ ماسەلەسى ءوزىنىڭ وڭدى شەشىمىن تابار دەگەن سەنىمدەمىز.
