قالا بويىنشا بۇگىنگى كۇنى COVID-19-دىڭ راستالعان 1578 جاعدايى تىركەلگەن. اعىمداعى جىلدىڭ 8 مامىرىندا كوروناۆيرۋس ينفەكتسياسىن جۇقتىرعان 108 جاعداي تىركەلدى. قاۋىپتى ىندەتپەن اۋىرعانداردىڭ 92%-ى جۇقتىرعاندارمەن بايلانىستا بولعان ادامداردىڭ ىشىنەن انىقتالعان. سەبەبى, ماماندار ۆيرۋس جۇقتىرعاندارمەن قارىم-قاتىناستا بولعانداردى جەدەل, دەر كەزىندە باقىلاۋعا الىپ وتىر.
ناۋقاستاردىڭ 7%-ى سكرينينگتەن وتكەن كەزدە, 1%-ى مەديتسينالىق كومەككە جۇگىنگەن كەزدە جوسپارلى ەمدەۋگە جاتقىزۋ الدىندا انىقتالعان.
قازىرگى تاڭدا قالامىزدا پروفيلاكتيكالىق سكرينينگ ءادىسى ەنگىزىلگەن. بۇل – كوروناۆيرۋستىق ينفەكتسيانى جەدەل ءارى ساپالى, ءدال انىقتايتىن زاماناۋي ءادىس.
«مۇنداي ءادىس ەنگىزىلگەننەن بەرى, مىسالى, وتكەن ءساۋىر ايىندا كوروناۆيرۋستىق ينفەكتسيانى جۇقتىرۋ دەڭگەيى تاۋلىگىنە 6%-دان اسپاعاندىقتان, قالا ەكونوميكاسىن كەزەڭ-كەزەڭىمەن قالپىنا كەلتىرۋ ستراتەگياسى جۇزەگە اسىرىلا باستادى. كارانتيننەن قاۋىپسىز شىعۋ ءۇشىن الماتىدا ينفەكتسيانىڭ جاسىرىن وشاقتارىن بەلسەندى انىقتاۋ ماقساتىندا جاپپاي تەستىلەۋ جۇرگىزىلۋدە.
پروفيلاكتيكالىق سكرينينگ ءادىسىنىڭ بەرگەن تاعى ءبىر جاقسى ناتيجەسى, 75% ناۋقاستىڭ بويىنداعى قاتەرلى ينفەكتسيا سيمپتومسىز, وتە جەڭىل كەزەڭىندە انىقتالدى. بۇل, ارينە, سىرقاتتىڭ اسقىنۋىنىڭ الدىن الادى جانە تەز ساۋىعىپ كەتۋىنە مۇمكىندىك مول. ەكىنشىدەن, بۇل سكرينينگ بىزگە جاسىرىن ىندەت وشاقتارىن دا جەدەل انىقتاۋعا كومەكتەسىپ جاتىر.
ءبىر كۇندە انىقتالعان 108 ناۋقاستىڭ ءبارى كارانتيندە وتىرعان ادامدارمەن بايلانىستا بولعاندار. ياعني, ولار سىرتقى ورتادان, ۇيىنەن نەمەسە جۇمىس ورنىنان جۇقتىرىپ كەلمەگەندەر. ءبىز ول دەڭگەيگە جەتكىزبەدىك», – دەدى ج.بەكشين.
ءساۋىر ايىندا سانيتارلىق-ەپيدەميولوگيالىق باقىلاۋ شارالارىن كۇشەيتۋ جانە تەستىلەۋ كونتينگەنتىن كەڭەيتۋ ناتيجەسىندە جۇقتىرۋ وشاقتارى انىقتالدى. بايلانىستا بولعان بارلىق ادام دەرەۋ وقشاۋلاندى. بۇگىنگى كۇنى جۇقتىرۋ جاعدايلارى وسى توپتاعى وقشاۋلاندىرىلعان ادامداردىڭ اراسىنداعى انىقتالۋدا, دەمەك, ينفەكتسيانىڭ ودان ءارى تارالۋ جولى كەسىلدى.
قالانىڭ باس سانيتارلىق دارىگەرىنىڭ سوزىنشە, پتسر دياگنوستيكاسىنىڭ اۋقىمى, ياعني كونتينگەنتى كەڭەيتىلگەن. باستاپقى كەزەڭدە پتسر-تەست جۇرگىزەتىن 2 زەرتحانا بولعان, ال قازىر ولاردىڭ سانى 6-عا جەتتى. بۇل كوروناۆيرۋستىق ينفەكتسيانىڭ جولىن كەسۋ ءۇشىن ۇلكەن كۇش دەپ بىلەمىز. ناتيجەسىندە وزگە ايماقتارمەن سالىستىرعاندا الماتىلىقتاردىڭ پتسر-تەستتەن ءوتۋ كورسەتكىشى, ياعني قامتىلۋ دەڭگەيى رەسپۋبليكا بويىنشا العاشقى ورىندا تۇر.
الماتىدا وسى ۋاقىتقا دەيىن جالپى 85 مىڭعا جۋىق ادام كوروناۆيرۋس ينفەكتسياسىن انىقتاۋ تەستىنەن ءوتتى, ونىڭ ىشىندە 61-مىڭى پتسر ادىسىمەن, ال 24 مىڭى ەكسپەرسس-تەست بويىنشا.
«پتسر-دياگنوستيكا قازىرگىدەي سىن شاقتا بىزگە ەڭ ساپالى ءارى جەدەل, ءدال ناتيجە بەرىپ وتىرعانىن باس ايتا كەتەيىن.
بۇل ىندەت قالادا ەڭ العاش 13 ناۋرىزدا تىركەلگەنى بەلگىلى. ال قازىر الماتى اۋرۋشاڭدىق شىڭىنان ءوتتى. ۇيدەگى ىندەت وشاقتارىنىڭ سانى جانە تۇرعىندار اراسىنداعى ناۋقاستار كورسەتكىشى ازايعان. بۇل – پروفيلاكتيكالىق سكرينينگ ءادىسىنىڭ جەمىسى.
بۇدان ءارى دە قاۋىپتى ىندەتتى جۇقتىرعاندار سانىن وسىلاي دەر شاعىندا انىقتاپ, وقشاۋلاۋ جانە ولارمەن تىعىز بايلانىستا بولعان ادامدارمەن جۇمىس ىستەۋ ءادىسىن ۇستانامىز. پروفيلاكتيكالىق زاماناۋي بۇل ءادىس ينفەكتسيانىڭ سىرتقى ورتاعا تارالىپ كەتپەۋىنىڭ الدىن الادى جانە ۆيرۋستىڭ العاشى ساتىسىندا-اق انىقتالادى. بۇگىنگى تاڭدا وسىنداي جۇمىستاردىڭ ناتيجەسىندە ناۋقاستار سانىنىڭ كۇندەلىكتى ءوسۋ قارقىنى 27%-دان 5%-عا ازايعان. ياعني, ەپيدەميولوگيالىق احۋال تۇراقتالىپ كەلەدى. ءبىزدىڭ ويىمىزشا بۇل كورسەتكىش تە بارا-بارا ودان ءارى تومەندەيدى», – دەدى جانداربەك بەكشين.
