ايماقتار • 09 مامىر، 2020

شىعىس قازاقستان: سەمەيدە ءبىر كۇندە 10 ادام كوروناۆيرۋس ينفەكتسياسىن جۇقتىردى

1279 رەت كورسەتىلدى

تۇرعىندار ءالى دە كوپشىلىكتى شاقىرىپ، اس بەرۋ راسىمدەرىن وتكىزۋدە.

كەشە سەمەي قالاسىندا ءبىر كۇندە 10 ادامنىڭ كوروناۆيرۋس ينفەكتسياسىن جۇقتىرعانى بەلگىلى بولدى. بۇل تۋرالى وبلىس اكىمدىگىنىڭ ينستاگرام پاراقشاسى حابارلادى. «اۋىرعانداردىڭ ىشىندە 2019، 2014، 2011، 2010 جىلدارى تۋعان ءتورت بالا، 2003 جىلعى ستۋدەنت جانە 1939 جىلعى زەينەتكەر بار. سونداي-اق، 1977 جىلعى ايەل جانە 1974، 1978 جىلعى ەر ازاماتتار بار. ون وقيعانىڭ توعىزى بۇعان دەيىن اۋرۋحاناعا تۇسكەن 1963 جىلى تۋعان ازاماتپەن ءۇي وشاعى بويىنشا جاقىن بايلانىستا بولعان ناۋقاستار توبىنا جاتادى. ال 1995 جىلعى جاس جىگىتتە دەرت سكرينينگتىك تەكسەرۋ بارىسىندا انىقتالدى. قازىرگى كەزدەگى جاعداي بويىنشا شىعىس قازاقستان وبلىسىنىڭ اۋماعىندا كوروناۆيرۋس ينفەكتسياسىنىڭ 43 جاعدايى تىركەلگەن، ونىڭ ۇشەۋى سىرتتان اكەلىنگەن» دەلىنگەن حابارلامادا.

سەمەيدە قاۋىپتى ۆيرۋستى جۇقتىرعاندار نەگە كۇرت كوبەيدى؟ وبلىستىق دەنساۋلىق ساقتاۋ باسقارماسى باسشىسى ءىلياس مۇحامەدجاننىڭ پىكىرىنشە، بۇعان سەبەپ – سەمەي تۇرعىندارىنىڭ شەكتەۋ شارالارىن دۇرىس ورىنداماۋى. ء«بىزدىڭ وبلىستا انىقتالعان 43 جاعدايدىڭ 33-ءى سەمەيدە تىركەلىپ وتىر. بىرنەشە مارتە جاسالعان ەسكەرتۋلەرگە قاراماستان ادامدار كارانتين تالاپتارىن ساقتاۋدا سالعىرتتىق تانىتۋدا. ۆيرۋس جۇقتىرۋ قاۋپى جوعارى ەكەنىن ۇعىنعىسى كەلمەيدى. سەمەيگە جىبەرىلگەن ارنايى كوميسسيا قالا تۇرعىندارى كارانتين رەجيمىن ورەسكەل بۇزۋ فاكتىلەرىن انىقتادى. ازاماتتارعا تۋعان كۇنىن تويلاعان تۇرعىننىڭ كوڭىلدى كەشىنەن كەيىن اۋرۋحاناعا 7 ادامنىڭ كوروناۆيرۋس دەرتىمەن تۇسكەن جاعدايى دا ساباق بولمادى. تۇرعىندار ءالى دە كوپشىلىكتى شاقىرىپ، اس بەرۋ راسىمدەرىن وتكىزۋدە. ال شاعىن جانە ورتا بيزنەس نىساندارى وبلىستىڭ باس سانيتار دارىگەرىنىڭ قاۋلىسىنداعى قاراپايىم قاۋىپسىزدىك ەرەجەلەرىن ساقتامايدى» دەيدى باسقارما باسشىسى.

شىعىس قازاقستان وبلىسى    

سوڭعى جاڭالىقتار

دوللار ارزاندادى

قارجى • بۇگىن، 15:58

ۇقساس جاڭالىقتار