رۋحانيات • 09 مامىر, 2020

ءبىز ءۇشىن ەڭ ۇلكەن سىيلىق

242 رەت
كورسەتىلدى
3 مين
وقۋ ءۇشىن

كۇنى كەشە پرەزيدەنتتىڭ پارمەنىمەن «ارداگەرلەر تۋرالى» زاڭ قابىلدانعانىن وقىدىم. ايتۋلى زاڭدا سانى ازايىپ, ساپتان شىققان ءبىز سەكىلدى سوعىس ارداگەرلەرىن, بەينەتپەن بەلدەسىپ, تىلدا تىنىمسىز تەر توككەن بەينەتكەرلەردى بارىنشا قولداۋعا ارنالعان وڭ باستامالار بار ەكەن. بۇل ۇلى جەڭىس مەرەكەسىنىڭ 75 جىلدىق تويى اياسىندا كوڭىلىمىزگە قۋانىش سىيلاعان ايرىقشا جايتتىڭ ءبىرى بولدى.

جاڭا زاڭ اياسىندا اردا­گەرلەردى الەۋمەتتىك تۇرعىدان قول­داۋ بارىنشا كۇشەيتىلىپ وتىر. كومەك كورسەتىلەتىندەردىڭ سانا­تى دا كەڭەيىپ, مەملەكەت تا­راپىنان كورسەتىلەتىن جەڭىل­دىكتەر دە جۇيەلەنىپتى. ۇلى وتان سوعىسىنان بولەك, اۋعان­ستانداعى, سونداي-اق باسقا مەملە­كەت­تەردىڭ اۋماقتارىنداعى ۇرىس-قي­مىلدارىنا قاتىسقان اسكەري قىز­مەتكەرلەرگە دە جاڭا زاڭ دەم بەرىپ وتىرعان كورىنەدى. العىس­تان باسقا نە ايتامىز. جىل سا­يىن جەرگىلىكتى بيلىك وكىلدەرى حال-قەدىرلەرىنىڭ جەتكەنىنشە قار­جىلاي كومەگىن كورسەتىپ, سىي-سيا­پاتىن الدىمىزعا توسادى. قايدا بارساق تا «مايدانگەر اتا كەلە جاتىر» دەپ قۇراق ۇشىپ قارسى الادى. مۇنىڭ ءوزى كوڭىلگە مەدەت. قارتتارىن قادىرلەگەن حالىقتىڭ بولاشاعى جارقىن. ارداگەرلەردىڭ ەسىمىن ەلگە مۇرا, ۇرپاققا ۇران قىلىپ وتىرعان سالاماتتى ۇرپاقتان اينالاسىڭ. وتكەنگە قۇرمەت كورسەتۋ – بولاشاققا باستايتىن جارقىن قادام.

تالاي تاعدىردى قان قاقساتقان سۇراپىل سوعىس قانشا ۋاقىت وتسە دە ءبىزدىڭ جادىمىزدان وشكەن جوق. قولىمىزداعى كۇرەگىمىزدى قارۋعا ايىرباستاپ, مايدانعا اتتان­عانىمىزعا دا عاسىرعا جۋىقتاپتى. ەل باسىنا ەكىتالاي كۇن تۋعاندا سايدىڭ تاسىنداي ازاماتتار ساپقا تۇرىپ, ۇرپاق بولاشاعى ءۇشىن جانىن وققا بايلادى. جىل ساناپ قارۋلاستارىمنىڭ قاتارى سيرەپ بارادى. قانشاما بوزداقتىڭ ءۇمىتى مايدان دالاسىندا ماڭگى ءسوندى. ەڭ وكىنىشتىسى, سولاردىڭ كەيبىرى ارتىنا ءىز دە تاس­تاپ ۇلگەرگەن جوق. جاندارى پەيىش تورىندە شالقىسىن دەگەننەن باسقا ايتارىمىز جوق. ۇرپاق ولاردىڭ ەرەن ەرلىگىن ۇمىتپاسا يگى.

قۇدايدىڭ بەرگەن قۋاتىمەن بيىل 101 جاسقا قادام باسىپ وتىر­مىن. مەيىرىمى شەكسىز جارات­قان ۇرپاعىمنىڭ ورتاسىندا ۇلى جەڭىس تويىنىڭ 75 جىلدىق مەرەكەسىن قارسى الۋعا دا جەتكىزىپ وتىر. تەك جەڭىس كۇنىندە عانا ەمەس, ءتۇرلى مەرەكەلەردە بىزگە قۇر­مەت كورسەتىپ, كەزدەسۋلەرگە شاقى­رادى. تىلشىلەر قاۋىمى ماقالا دايىنداپ, سۇحباتتاسادى. سوعىس­تان كەلىپ, زەينەتكە شىققانعا دە­يىنگى بار ءومىرىمدى ۇستازدىق جولعا ارناعان اداممىن. بۇگىندە سول بەينەتتىڭ زەينەتىن كورىپ وتىرعان جايىم بار. 

ءبىز كورگەن زوبالاڭدى ۇرپا­عى­مىز مۇلدە كورمەسە ەكەن. بەي­بىت­شىلىك بەسىگىندە تەربەلگەن تاۋەل­سىز ەلدىڭ ۇلاندارى باقىتتى بولسىن. ۇلتتىق تامىرىنان اجى­را­ماي, ەلدىك پەن ەرلىكتى, كەڭدىك پەن ورلىكتى كەمەل كەلەشەككە جەت­كىزسىن. زاماندار وتەر, ەل جاڭارار, ۇرپاق الماسار. بىراق ءبىر نارسە ەشقاشان وشپەيدى. ول – ۇلتقا, مەملەكەتكە ادال قىزمەت ەتۋ.

 

بايتۇما  تۇراروۆ,

ۇلى وتان سوعىسىنىڭ ارداگەرى, ۇلاعاتتى ۇستاز

 

سوڭعى جاڭالىقتار