اۋرۋحانالاردىڭ شامادان تىس جۇكتەلۋى مەن دارىگەرلەردىڭ جەتىسپەۋشىلىگى جاعدايىندا بارلىق ايەلدەر جۇكتىلىك كەزىندە جانە بوسانۋ كەزىندە كۇتىم جاساۋعا قۇقىلى. COVID-19 پاندەمياسى دەنساۋلىق ساقتاۋ جۇيەسىنە ۇلكەن سالماق سالىپ وتىر. اسىرەسە, بۇل جاعداي جۇكتى ايەلدەردىڭ جاعدايىنا قاتتى اسەر ەتىپ وتىر. يۋنيسەف وسى ورايدا داعدارىس كەزىندە بولاشاق انالاردى كۇردەلى جاعدايلار كۇتىپ تۇرعانىن ەسكەرتۋدە.
وقشاۋلاۋ, كارانتين, كومەندانتتىق ساعات, مەديتسينالىق مەكەمەلەردىڭ شامادان تىس تولۋى, مەديتسينالىق جابدىقتاردىڭ تاپشىلىعى, بىلىكتى مامانداردىڭ جەتىسپەۋشىلىگى, وسىنىڭ بارلىعى ولاردىڭ دەنساۋلىعىنا قاۋىپ توندىرەدى. يۋنيسەف اتقارۋشى ديرەكتورى گەنريەتتا فورەنىڭ ايتۋىنشا, بولاشاق انالار مەديتسينالىق مەكەمەلەرگە بارۋدان قورقادى نەمەسە مەديتسينالىق قىزمەتتەرگە دەگەن سۇرانىستىڭ جوعارى بولۋىنا جانە ولاردى وقشاۋلاۋ شارالارىنا بايلانىستى جەدەل جاردەم الا المايدى.
بولجامدارعا سايكەس, اقش-تا 16 جەلتوقسان مەن ناۋرىز ارالىعىندا 3 ملن-نان استام بالا دۇنيەگە كەلەدى. نيۋ-يوركتە بيلىك بالاما پەرزەنتحانا ورتالىقتارىن قۇرۋ باعىتىندا جۇمىس ىستەۋدە. ويتكەنى كوپتەگەن جۇكتى ايەلدەر اۋرۋحانالاردا بوسانۋدان قاۋىپتەنەدى.
پاندەميا جاريالانعاننان كەيىن 9 اي ىشىندە ءۇندىستاندا 20 ميلليوننان استام بالا تۋىلادى. وسى كەزەڭدە قىتايدا 13,5 ميلليون بالا, نيگەريادا - 6,4 ميلليون, پاكىستاندا - 5 ميلليون جانە يندونەزيادا - 4 ميلليون بالا دۇنيەگە كەلەدى. وسى ەلدەردىڭ كوپشىلىگىندە بۇرىن دا نەوناتالدىق ءولىم-ءجىتىمنىڭ جوعارى كورسەتكىشتەرى بولعان. ساراپشىلار COVID-19 جاعدايىندا ولاردىڭ ارى قاراي ءوسىپ-جەتىلۋىنىڭ قاۋپىن ەسكەرتەدى. يۋنيسەف-تە COVID-19 پاندەمياسى كەزىندە جۇكتى ايەلدەرگە كومەك كورسەتۋ بويىنشا بىرقاتار ۇسىنىستار جاريالادى.
ساراپشىلار وسى كۇردەلى كەزەڭدە انا بولۋعا دايىندالىپ جاتقان بارلىق ايەلدەرگە جانە جاڭا تۋعان نارەستەلەرگە جوعارى ساپالى كومەك كورسەتۋدى قامتاماسىز ەتۋگە شاقىرادى. ولار مەديكتەردى جانە بوساناتىن ايەلدەردى قاجەتتى جەكە قورعانىش قۇرالدارىمەن قامتاماسىز ەتۋدى, سونداي-اق دارىگەرلەر مەن اكۋشەرلەرگە مۇمكىندىگىنشە جۇكتى ايەلدەرگە ۇيگە بارۋعا جانە اسىرەسە شالعاي اۋدانداردا تۇراتىن ايەلدەر ءۇشىن تەلەكونسۋلتاتسيالار بەلسەندى تۇردە وتكىزۋگە كەڭەس بەرەدى.
