جەڭىس كۇنى قارساڭىندا, 9 مامىر كۇنى كوروناۆيرۋستىق ينفەكتسيانىڭ تارالۋىنىڭ الدىن الۋ ماقساتىندا الماتى اكىمدىگى جانىنداعى توتەنشە جاعداي رەجىمىن قامتاماسىز ەتۋ جونىندەگى جەدەل شتاب تۇرعىندارعا ادامدار كوپ جينالاتىن جەرلەرگە, مەموريالدار مەن زيراتتارعا بارۋدان باس تارتۋدى ۇسىنادى. ياعني بۇل ۇسىنىس 28 گۆاردياشى-پانفيلوۆشىلار اتىنداعى ساياباقتاعى ماڭگىلىك الاۋعا گۇل شوقتارىن قويۋ راسىمىنە دە قاتىستى ايتىلعان.
ء«بىزدىڭ اكەلەرىمىز بەن اتالارىمىزدىڭ ەرلىگى ماڭگىلىك. ءبىزدىڭ سوعىس ارداگەرلەرى مەن تىل ەڭبەككەرلەرىن وسى ايتۋلى كۇن – ۇلى جەڭىس كۇنىمەن قۇتتىقتاعىم كەلەدى جانە ولارعا مىقتى دەنساۋلىق, اشىق اسپان تىلەيمىن. وسى جىل – مەرەيتوي جىلى, ياعني ءفاشيزمدى جەڭگەن ۇلى جەڭىسكە 75 جىل, ارينە, ءبىز ونى لايىقتى قارسى الۋعا دايىندالعانبىز. بىراق وكىنىشكە قاراي, ول الەمدەگى وسىنداي قورقىنىشتى توتەنشە جاعدايعا سايكەس كەلدى. وسىعان بايلانىستى, بارلىق قالالىقتاردان, ءبىرىنشى كەزەكتە اعا بۋىن وكىلدەرىنەن ساياباقتار مەن سكۆەرلەرگە بارۋدان باس تارتۋلارىڭىزدى سۇرايمىن. ويتكەنى, ءدال قازىرگى جاعدايدا ولار قاۋىپتىڭ الدىندا تۇر, سوندىقتان دا قالالىقتاردان ارداگەرلەرمەن كەزدەسپەۋىن سۇرايمىز», – دەپ اتاپ ءوتتى الماتى قالاسىنىڭ توتەنشە جاعدايدى قامتاماسىز ەتۋ جونىندەگى جەدەل شتاب توراعاسىنىڭ ورىنباسارى ەرلان قوجاعاپانوۆ.
سونداي-اق, ول ازاماتتار كوپ جينالاتىن جەرلەردە پوليتسيا دەپارتامەنتى تاراپىنان جاياۋ جانە ءاۆتوموبيلدى پاترۋلدەۋ كۇشەيتىلەتىنىن جەتكىزدى.
وسىعان بايلانىستى, كەزەكتى رەت ازاماتتارعا كارانتين مەن سانيتارلىق-ەپيدەميولوگيالىق نورمالاردى مۇلتىكسىز ساقتاۋ تۋرالى ەسكە سالامىز. بۇل تالاپتاردى ەلەمەۋ زاڭناماعا سايكەس جاۋاپكەرشىلىككە تارتاتىنىن ۇمىتپاعان ءجون.
