تۇركىستانداعى قۇرىلىس جانە جول جوندەۋ جۇمىستارىن تەكسەرگەن وبلىس اكىمى ومىرزاق شوكەەۆ قالانى دامىتۋ, كوركەيتۋ اياسىندا سالىنىپ جاتقان نىسانداردىڭ ماڭىزدى ەكەنىن ايتىپ, جۇمىسشىلار سانىن كوبەيتۋدى جاۋاپتى ماماندارعا تاپسىردى. قالانىڭ باستى كوشەلەرىنىڭ ءبىرى ب. ساتتارحانوۆ داڭعىلىنىڭ ەكى شەتىندە ۇزىننان سالىنىپ جاتقان جەلىلىك ساياباق - سۋبۇرقاقتار, ەرەكشە ديزايندى لاندشافتار جانە يرريگاتسيالىق ارىقشالارىمەن ەرەكشەلەنبەك. سونىمەن قاتار, ورتاشا جوندەۋ جۇمىستارى جۇرگىزىلەتىن 100-گە تارتا كوشەنىڭ 26-نا تاسجول سالىنسا, 22-دە جۇمىستار ءجۇرىپ جاتىر. جالپى 48 كوشەدە جولدىڭ ىرگەسىن نىعىزداۋ, كارىز جۇيەسى قۇدىقشالارىنىڭ دەڭگەيىن كوتەرۋ سىندى جۇمىستار جۇرگىزىلۋدە.
سونداي-اق وبلىس اكىمى ب. ساتتارحانوۆ داڭعىلى جانە داڭعىلدىڭ ىشكى جولى, جىبەك جولى, ورازگەلدى داتقا, بوگەن, ساپارباي بولىس, كەلىنشەكتاۋ, شويىنبەت بي, سىرىم باتىر, اقان سەرى, مايلىقوجا, جۇينەكي كوشەلەرىن ارالىپ, وندا اتقارىلىپ جاتقان ىستەردى پىسىقتادى. جاۋاپتى باسشىلارعا بىرقاتار تاپسىرما بەردى.
