1994 جىلى اقتوبەدەگى جوعارعى ازاماتتىق اۆياتسيا ۋچيليششەدە ۇشقىش-تەحنيكتەردى دايىندايتىن اسكەري اۋە كۇشتەرىنىڭ اسكەري فاكۋلتەتى اشىلعانى بەلگىلى. الايدا ەلىمىزدىڭ اۋە قورعانىس كۇشتەرىن ءبىر عانا وقۋ ورنىمەن كۇشەيتۋ جەتكىلىكسىز بولدى. ناتيجەسىندە اۋە قورعانىسى كۇشتەرىنىڭ قولباسشىسى, ارميا گەنەرالى مۇحتار التىنباەۆتىڭ اتسالىسۋىمەن ورتالىق ازيا اۋماعىنداعى وفيتسەر-ينجەنەرلەردى دايىندايتىن تۇڭعىش ءارى بىردەن-ءبىر وقۋ ورنى رەتىندە ازاماتتىق اۆياتسيا اكادەمياسى اسكەري فاكۋلتەتىنەن ءبولىنىپ شىعىپ, 2001 جىلى راديوەلەكترونيكا جانە بايلانىس اسكەري-ينجەنەرلىك ينستيتۋتى قۇرىلدى.
بۇگىندە زاماناۋي جاراقتالعان, جاتتىعۋ كەشەندەرىمەن جابدىقتالعان اۋديتوريالار مەن زەرتحانالاردا وفيتسەر-راديوينجەنەرلەر 5 ماماندىق بويىنشا ءبىلىم الۋدا. اسكەري بولىمدەردە ءدارىس بەرەتىن ۇستازداردىڭ ىشىندە 4 عىلىم دوكتورى, 10 عىلىم كانديداتى جانە 2 PhD دوكتورى بار. ماگيستر اكادەميالىق دارەجەسىنە 110 مامان يە بولسا, قىرىقتان اتسام مامان ەلىمىزدىڭ جانە شەت مەملەكەتتەردىڭ اديۋنكتۋراسى مەن ماگيستراتۋراسىندا ءبىلىم الۋدا. ال ينستيتۋت قۇرىلعاننان بەرگى ارالىقتاعى 18 جىلدا 2000-عا جۋىق لەيتەنانت ەلىمىزدىڭ اۋە قورعانىس كۇشتەرى جانە وزگە دە اسكەري قۇرىلىمدارىنىڭ قاتارىنا قىزمەتكە كەتتى.
ينستيتۋتتا ۇجىمدىق قاۋىپسىزدىك كەلىسىمىنىڭ ۇيىمى اياسىنداعى اسكەري شارتتارعا سايكەس قىرعىزستان رەسپۋبليكاسىنىڭ دا اسكەري ماماندارى دايىندالادى. كۋرسانتتار تەوريالىق ءبىلىمدى مەڭگەرگەننەن كەيىن اسكەري بايلانىس تەحنيكالارىندا, راديولوكاتسيالىق بەكەتتەردە تاجىريبەلەرىن شىڭداۋ مۇمكىندىگىنە يە.
ينستيتۋت كۋرسانتتارى مەن وفيتسەرلەر قۇرامىنىڭ وقۋ تاجىريبە الاڭدارىنداعى جەتىستىكتەرىن «سارىشاعان» مەملەكەتتىك سىناق الاڭى جانە «جاۋىنگەرلىك دوستاستىق» وقۋ-جاتتىعۋلارى بارىسىنان, سونداي-اق وتار 40-اسكەري بازاسىندا وتكىزىلگەن وقۋ-جاتتىعۋلار بارىسىنان كورۋگە بولادى. مەملەكەت كولەمىندە وتكىزىلەتىن جاۋىنگەرلىك جانە اسكەري پارادتاردا دا سالتاناتپەن ساپ تۇزەيتىن كۋرسانتتار رەسەيدىڭ ۆورونەج, سمولەنسك, سانكت-پەتەربۋرگ, ياروسلاۆ, كوستروما قالالارىندا وتكەن عىلىمي وليمپيادالارعا بەلسەندى تۇردە قاتىسىپ, ۇزدىك كورسەتكىشتەرگە قول جەتكىزۋدە. بولاشاق وفيتسەرلەر, سەرجانتتار جانە كۋرسانتتار سپورتتىڭ ءار تۇرىنەن دانيا, شۆەتسيا, ماسكەۋ, سانكت-پەتەربۋرگ, سامارا, ەكۆادور, قىرعىزستاندا وتكەن حالىقارالىق جارىستاردان جۇلدەلى ورىنداردى يەلەنىپ ءجۇر. ال 10 سپورت شەبەرىنىڭ ينستيتۋت قابىرعاسىنان شىققانى قۋانتادى.
كۋرسانتتار پاتريوتتىق شارالاردىڭ دا بەلسەندى قاتىسۋشىسى. «پاتريوت» عىلىمي-دەباتتىق كلۋبى, «بەس قارۋ» اسكەري-پاتريوتتىق كلۋبى جانە «بارىس» اسكەري-پسيحولوگيالىق كلۋبتارى قۇرىلىپ, قالالىق جانە رەسپۋبليكالىق دەڭگەيلەردە ونەر كورسەتىپ ءجۇر. 2011 جىلدان «بايلانىس جىگىتتەرى» جانە «پرەستيج» كوڭىلدى تاپقىرلار كلۋبى جۇمىس ىستەسە, جايدارمان كۋرسانتتار ۇلتتىق ليگادا ۇزدىكتەر ساپىندا ءجۇر. جەكە قۇرام اسكەري جانە جاۋىنگەرلىك پارادتارعا قاتىسىپ, ساپتىق دايىندىعى جاعىنان ۇزدىكتەر قاتارىنان تابىلۋدا. ينستيتۋتتىڭ جەكە قۇرامى الماتى قالاسىندا وتكىزىلگەن 28-ءشى دۇنيەجۇزىلىك قىسقى ۋنيۆەرسيادا بارىسىندا قۇقىقتىق ءتارتىپتى جانە قاۋىپسىزدىكتى ساقتاۋ شارالارىنا قاتىستى.
كۋرسانتتار ينستيتۋت بازاسىندا 2017 جىلدان باستاپ وتەتىن تمد قاتىسۋشى مەملەكەتتەردىڭ جوعارعى ءبىلىم بەرۋ ۇيىمدارى كۋرسانتتارىنىڭ ماتەماتيكا پانىنەن حالىقارالىق وليمپياداسىنىڭ, سونداي-اق «كADEX» حالىقارالىق قارۋ-جاراق كورمەسىنىڭ تۇراقتى قاتىسۋشىسى.
ەلىمىزدەگى توتەنشە جاعدايلار كەزىندە ينستيتۋتتىڭ 500-گە جۋىق اسكەري قىزمەتشىلەرىنەن جاساقتالعان بولىمشەلەرىندە جالپى كولەمى 5 ملن شارشى مەتردەن استام 4000-نان اسا نىساندار, ونىڭ ىشىندە 63 مەكتەپ, 48 بالاباقشا, بالالار الاڭقايلارى, ايالدامالار, ەمحانالار جانە تەرمينال نىساندارى زارارسىزداندىرىلدى.
اسكەري ينستيتۋتتىڭ جەكە قۇرامى ءارتۇرلى قوعامدىق جانە قايىرىمدىلىق ءىس-شارالارعا اتسالىسۋدا. توتەنشە جاعداي كەزىندە رەسپۋبليكالىق #Bizbirgemiz اكتسياسى اياسىندا اسكەري-ينجەنەرلىك ينستيتۋتىنىڭ اسكەري قىزمەتشىلەرى 15 ۇوس ارداگەرى جانە 5 از قامتىلعان وتباسىنا قولداۋ كورسەتتى. Cونىمەن قاتار قارتتار ءۇيى مەن جەتىمدەر ۇيىنە بارىپ قولعابىس ەتۋ, مەرەكەلىك شارالار ۇيىمداستىرۋ, كوگالداندىرۋ, قوقىستان تازارتۋ جۇمىستارىنا بەلسەنە قاتىسىپ كەلەدى.
