سىبايلاس جەمقورلىققا قارسى ءىس-قيمىل اگەنتتىگىنىڭ تۇركىستان وبلىسى بويىنشا دەپارتامەنتىنىڭ جانىنان قۇرىلعان «ساپالى جول» جوباسى اياسىندا سوزاق اۋدانىنىڭ اۆتوكولىك جولدارىنا كەشەندى مونيتورينگ جۇمىستارى جۇرگىزىلگەن. اۆتوموبيل جولدارىنىڭ ساپاسىنا ساراپتاما جۇرگىزۋ ارقىلى جولداردى توسەۋ مەن جوندەۋ كەزىندە تۋىندايتىن سىبايلاس جەمقورلىق كۇقىقبۇزۋشىلىقتارىنىڭ الدىن الۋ جانە بيۋدجەت قاراجاتىنا سالىنعان جولدارعا تۇرعىندار تاراپىنان قوعامدىق باقىلاۋدى كۇشەيتۋ ماقساتىندا جۇرگىزىلگەن مونيتورينگ بارىسىندا تاستى اۋىلىنداعى باۋىرجان جانە جامبىل كوشەلەرىنىڭ تەگىستىگى, اسفالت - بەتون جامىلعىسىنىڭ بەتكى جاعىنىڭ بۇزىلۋ دەرەكتەرى مەن ونىڭ قالىڭدىعى سمەتالىق قۇجاتقا سايكەس كەلمەيتىندىگى بەلگىلى بولدى. سونداي-اق شولاققورعان اۋىلىندا ورنالاسقان جامبىل, №30, №32 جانە ا.مۇقانوۆ كوشەلەرىنە جۇرگىزىلگەن ارنايى باقىلاۋ جۇمىستارى كەزىندە كوشە قيىلىستارىنىڭ بىرىكتىرىلگەن تۇستارىنىڭ شاشىلۋ دەرەكتەرى مەن جول توسەلىمىنىڭ قالىڭدىعى بىركەلكى ەمەستىگى انىقتالدى. سالىنعان جولداردىڭ ساپاسى سىن كوتەرمەيتىنىن انىقتاعان ماماندار مەردىگەر جۇمىسىنداعى كەمشىلىكتەر بويىنشا اكت ءتۇزىپ, مەردىگەر مەكەمە باسشىلارىنا قايتا جوندەۋدەن وتكىزۋگە ۇسىنىستار بەردى.
ايتا كەتەلىك, قوعامدىق باقىلاۋ جۇمىستارىنا سوزاق اۋدانى اكىمىنىڭ ورىنباسارى ب.الماعانبەت, سىبايلاس جەمقورلىققا قارسى ءىس-قيمىل اگەنتتىگىنىڭ تۇركىستان وبلىسى بويىنشا دەپارتامەنتى باسشىسىنىڭ ءبىرىنشى ورىنباسارى م.قارعاباي مەن دەپارتامەنتتىڭ پرەۆەنتسيا باسقارماسىنىڭ باسشىسى ع.جۇندىباەۆ, اۋداندىق ارنايى مونيتورينگتىك توپ مۇشەلەرى جانە وبلىستىق «ۇلتتىق جول اكتيۆتەرى ساپاسى ورتالىعىنىڭ» رمك ماماندارى مەن جاۋاپتى مەردىگەر كومپانيانىڭ باسشىلارى قاتىسقان. الداعى ۋاقىتتا دا بارلىق قالا, اۋدانداردىڭ جولدارى باقىلاۋعا الىنىپ, جەرگىلىكتى ماڭىزى بار اۆتوموبيل جولدارىنا جىلجىمالى جول زەرتحانالىق كولىكتەرى ارقىلى تەكسەرۋ جۇمىستارى جۇيەلى تۇردە جۇرگىزىلمەك.
