مىسالى, بيىلدىڭ العاشقى 3 ايىندا ءبىلىم بەرۋ سالاسىندا تىركەلگەن 16 قىلمىستىق قۇقىق بۇزۋشىلىق بويىنشا ءبىر تۇلعا قىلمىستىق جاۋاپكەرشىلىككە تارتىلعان. بۇل تۋرالى سىبايلاس جەمقورلىققا قارسى ءىس-قيمىل اگەنتتىگىنىڭ تۇركىستان وبلىسى بويىنشا دەپارتامەنتى باستاماسىمەن وبلىسقا قاراستى ءبىلىم بەرۋ ۇيىمدارىنىڭ باسشىلارىمەن وتكەن ونلاين-كونفەرەنتسيادا ايتىلدى. دەپارتامەنت باسشىسىنىڭ ءبىرىنشى ورىنباسارى ميراس قارعاباي وڭىردەگى ءبىلىم بەرۋ مەكەمەلەرىندە ءجيى كەزدەسەتىن سىبايلاس جەمقورلىق دەرەكتەرىنىڭ تۋىنداۋ سەبەپتەرىنە توقتالدى. مەكتەپتەردە زاڭسىز اقشا جيناۋ دەرەكتەرى نەگىزىنەن, ءتيىستى مەكەمەلەر جۇرگىزەتىن جىل سايىنعى تەكسەرۋلەر كەزىندە مەكتەپ ديرەكتورلارىنا سالىنعان ايىپپۇلداردان تۋىندايتىنى جانە ايىپپۇل سوماسىنىڭ ەداۋىر كوپ مولشەردە بولۋىنا بايلانىستى مۇعالىمدەر مەن اتا-انالاردان جينالاتىنى زەردەلەۋ بارىسىندا انىقتالعان.
كونفەرەنتسيادا اۋداندىق, قالالىق ءبىلىم بولىمدەرىنىڭ باسشىلارى مەن مەكتەپ ديرەكتورلارىنا زاڭسىز اقشا جيناۋ دەرەكتەرىن بولدىرماۋ بويىنشا اقپاراتتىق - اعارتۋ جۇمىستارى جۇرگىزىلىپ, وبلىسقا قاراستى ءبىلىم بەرۋ مەكەمەلەرى دەپارتامەنتتىڭ تىكەلەي باقىلاۋىندا ەكەندىگى ەسكەرتىلدى. ال وبلىستىق ادامي الەۋەتتى دامىتۋ باسقارماسىنىڭ باسشىسى راحىمبەك جولاەۆ ءبىلىم بولىمدەرىنىڭ باسشىلارىنا سىبايلاس جەمقورلىققا جول بەرمەۋ بويىنشا بىرقاتار مىندەتتەر جۇكتەدى.
تۇركىستان وبلىسى
