«قازسۋشار» ركم-ءنىڭ مالىمەتتەرىنە سايكەس, كەيبىر ەلدى مەكەندەردە سۋ دەڭگەيى ورتاشا 3-4 سانتيمەترگە تومەندەگەن. ەلدى مەكەندەردى سۋ باسۋىنىڭ الدىن الۋ ماقساتىندا اتقارىلىپ جاتقان ىستەر جالعاسىن تابۋدا. بۇل ورايدا حالىقتى قۇلاقتاندىرۋ ماقساتىندا ماقتارال اۋدانىنىڭ 15 ەلدى مەكەنىندە 38 دابىلدى ەسكەرتۋ قۇرىلعىسى ورناتىلعان. نۇرلىجول, ورگەباس, ىرىستى, جانتاقساي ەلدى مەكەندەرىندە بوگەتتەر سالىنىپ, مىرزاكەنت كەنتى باعىتىندا فيردوۋسي ەلدى مەكەنىنىڭ اۋماعىندا 3 كوللەكتور ورناتىلعان. بۇدان بولەك, ماقتاارال اۋدانى اۋماعىنان اعىن سۋدى تەز ارادا شىعارۋ ماقساتىندا وزبەكستان رەسپۋبليكاسى تاراپىنان جەتىساي اۋدانى, قوعالى ەلدى مەكەنىنىڭ ماڭىنان «ورتالىق بەتپاقدالا كوللەكتورى» ارقىلى اۆتوجول كوپىرىن اينالىپ وتەتىن كانال قازىلدى.
ۇكىمەت ساعاتىندا ماقتاارال اۋدانىنا قاتىستى بايانداما جاساپ, توتەنشە جاعداي بويىنشا اتقارىلىپ جاتقان جۇمىستارعا توقتالعان وبلىس اكىمى ومىرزاق شوكەەۆ وسىنداي دەرەكتەر كەلتىردى. اۋداندا قوعامدىق ءتارتىپتى ساقتاۋ جانە سۋ باسقان تۇرعىن ۇيلەردى مۇلكىن قورعاۋ ءۇشىن 8 بلوك - بەكەت ورناتىلىپ, پوليتسيا دەپارتامەنتىنىڭ جەكە قۇرامىنان جالپى 335 قىزمەتكەرى مەن 57 ارنايى اۆتوكولىگى جۇمىلدىرىلعان. «الدىن الا جيناقتالعان مالىمەتتەر بويىنشا كولەمى 7639 گەكتار ەگىستىك جەردى سۋ باسقان. سونىمەن قاتار, مال شىعىنى ناقتىلانۋدا. قازىرگى تاڭدا, وسى جوعارىدا اتالعان شىعىنداردى ەسەپتەپ جاتىرمىز. شىعىن كولەمى ناقتىلانىپ بولعان سوڭ, قوسىمشا باياندالاتىن بولادى», دەدى ومىرزاق شوكەەۆ.
وبلىس اكىمى بايانداماسىندا جالپى 31 606 تۇرعىن 14 ەلدى مەكەننەن ەۆاكۋاتسيالانعانىن, 7 ەلدى مەكەندە سۋ باسۋ قاۋپى ءالى دە جوعارى ەكەنىن ايتىپ ءوتتى. ال مىرزاكەنت جانە اقجول ەلدى مەكەندەردىڭ تۇرعىندارى ءوز ءۇي-جايلارىنا قايتا ورالۋدا. اۆاريالىق-قۇتقارۋ جۇمىستارىن جۇرگىزۋ ءۇشىن اۋداندا توتەنشە جاعداي جاريالانعالى بەرى 986 ادام, 10 دانا ءجۇزۋ قۇرىلعىسى, 180 دانا تەحنيكا جۇمىلدىرىلدى. سونىمەن قاتار, قىزىلوردا, جامبىل وبلىستارى مەن شىمكەنت قالاسىنان 30 ونىمدىلىگى جوعارى سۋ جيناعىش سوراپتار جەتكىزىلۋدە. بۇدان بولەك, ۇلتتىق ۇلان اسكەري بولىمىنەن 413 اسكەري قىزمەتكەر مەن 37 دانا تەحنيكا تارتىلدى. قوسىمشا الماتى قالاسىنان ۇلتتىق ۇلاننىڭ قۇتقارۋ باتالونىنان 320 اسكەري قىزمەتكەر مەن 26 دانا تەحنيكا كەلۋدە. وبلىس اكىمى, سونداي-اق كورشىلەس وبلىستار مەن كاسىپكەرلەر تاراپىنان دا ءتۇرلى كومەكتەر كورسەتىلىپ, قولداۋ ءبىلدىرىلىپ جاتقانىن جەتكىزدى.
تۇركىستان وبلىسى
