قىسىلتاياڭ كەزەڭدە قىزمەت بابىن اسىرا پايدالانىپ, قىمقىرىپ قالۋدان قىمسىنبايتىندار از ەمەس ەكەن. وعان سىبايلاس جەمقورلىققا قارسى ءىس-قيمىل اگەنتتىگىنىڭ كەيىنگى فاكتىلەرى ايعاق بولىپ تۇر. اتاپ ايتساق, اگەنتتىكتىڭ سولتۇستىك قازاقستان وبلىسى بويىنشا دەپارتامەنتى پوليتسيا دەپارتامەنتىنىڭ ىشكى قاۋىپسىزدىك باسقارماسىمەن بىرلەسكەن ءىس-شارالار بارىسىندا پوليتسيانىڭ اۋداندىق ءبولىمى باسشىسىنىڭ ءبىرىنشى ورىنباسارىن ۇستادى. ول توتەنشە جاعداي كەزىندە بەلگىلەنگەن تىيىمدارعا قاراماستان, ازاماتتاردىڭ اۋدان اۋماعىندا كەدەرگىسىز ءجۇرۋى ءۇشىن 1 ملن 300 مىڭ تەڭگە كولەمىندە پارا الدى دەگەن كۇدىككە ءىلىندى.
سىبايلاس جەمقورلىققا قارسى قىزمەت پاراقورلىق, لاۋازىمدىق وكىلەتتىكتەردى اسىرا پايدالانۋ, جەزوكشەلىكپەن اينالىسۋ جانە جەڭگەتايلىق جەلىلەرىن ۇستاۋ نەمەسە ۇيىمداستىرۋ, ادام ومىرىنە, دەنساۋلىعىنا قاۋىپ توندىرەتىن ءمان-جايلار تۋرالى اقپاراتتى جاسىرۋ بويىنشا تەرگەۋ جۇرگىزىپ جاتىر. بۇل تۋرالى حاباردار بولعان قالانىڭ ءتيىستى قىزمەتتەرى 87 ادامدى وقشاۋلادى. سونىڭ ىشىندە جەزوكشەلىكپەن اينالىسۋعا ارنالعان ورىندار اشكەرە بولىپ, ەكى شەتەل ازاماتىنان كوروناۆيرۋس ينفەكتسياسى انىقتالدى.
كارانتيننىڭ قاتاڭ ساقتالۋىن قاداعالايتىنداردىڭ قارابەت بولعان وقيعاسى باسقا وڭىرلەردە دە كەزدەسىپ جاتىر. سولتۇستىك قازاقستان وبلىسىنداعى سىبايلاس جەمقورلىققا قارسى قىزمەت پەتروپاۆل قالاسى اكىمدىگىنىڭ لاۋازىمدى تۇلعاسىنا قاتىستى سوتقا دەيىنگى تەرگەۋدى باستادى. كۇدىكتى ازامات كەيبىر كولىك قۇرالدارىنىڭ پەتروپاۆل قالاسىنداعى توسقاۋىل بەكەتتەردەن كىدىرىسسىز وتۋىنە رۇقسات بەرىپ, 50 مىڭ تەڭگە العان. ول ءارى سovid-19 ىندەتىنىڭ تارالۋىن بولدىرماۋ جونىندەگى وبلىس اكىمدىگى جەدەل شتابىنىڭ مۇشەسى ەكەن.
وسىلاي ابىرويسىز اتى شىققاننىڭ ءبىرى شىمكەنت قالاسى پوليتسيا دەپارتامەنتىنىڭ جول-پاترۋلدىك پوليتسيا پولكى قىزمەتكەرى بولدى. ول كارانتين رەجىمىن ساقتاماعان الدەكىمدى جانگەلدين كوشەسى بويىنداعى ىشكى توسقاۋىل بەكەتىنەن وتكىزگەنى ءۇشىن 25 مىڭ تەڭگە پارا العان. بۇل قىزمەتكەرگە قاتىستى شىمكەنتتەگى دەپارتامەنت قىلمىستىق ءىس تەرگەپ جاتىر.
بۇعان قوسا تۇركىستان وبلىسى بويىنشا دەپارتامەنت شىمكەنت قالاسى قاراتاۋ اۋدانى پوليتسيا باسقارماسىنىڭ ۋچاسكەلىك ينسپەكتورىن سوتقا دەيىنگى تەرگەۋدى باستادى. جازىقتى پوليتسەي «تاسكەشۋ» توسقاۋىل بەكەتى ارقىلى كىرىپ-شىعۋى ءۇشىن تۇركىستان وبلىسى تۇرعىندارىنان 15 مىڭ تەڭگەدەن پارا العان.
سونىمەن قاتار توتەنشە جاعداي كەزىندە باسقا دا سىبايلاس جەمقورلىق فاكتىلەرى تىركەلىپ جاتىر. ونىڭ كوبى ءتۇرلى امال-شارعىمەن بيۋدجەت قاراجاتىن جىمقىرىپ قالعاندارعا قاتىستى بولىپ تۇر. مىسالى, قوستاناي وبلىسىنىڭ التىنسارين اۋدانى اكىمىنىڭ ورىنباسارى قىزمەت بابىن اسىرا پايدالانىپ, وزىنە باعىنىشتى قىزمەتكەرلەردى اۋىل ىشىندەگى جولداردى قاردان تازارتۋ جۇمىستارىن جۇرگىزۋگە جانە كوممەرتسيالىق ۇيىممەن مەملەكەتتىك ساتىپ الۋلار تۋرالى جالعان كەلىسىمشارت جاساسۋعا ماجبۇرلەگەن.
اتالعان وبلىستا جولدا ءتارتىپ بۇزعان ادامنان اكىمشىلىك جاۋاپكەرشىلىككە تارتپاعانى ءۇشىن 20 مىڭ تەڭگە دامەتكەن اۋداندىق پوليتسيا ءبولىمىنىڭ جول-كولىك ينسپەكتورىنا قاتىستى دا جەمقورلىق قىلمىسى تىركەلدى.
الماتى وبلىسىندا جەمقورلىقپەن شاتىلعان بىرنەشە لاۋازىمدى تۇلعا انىقتالدى. تالعار اۋدانى بەسقاينار اۋىلدىق وكرۋگىنىڭ اكىمى «ىلە-الاتاۋ مەملەكەتتىك ۇلتتىق تابيعي پاركى» رمم جەرىنەن ۋچاسكەنى زاڭسىز ءبولىپ بەرۋگە سەپتەسسە, وسى اۋداننىڭ پانفيلوۆ اۋىلدىق وكرۋگىنىڭ بۇرىنعى اكىمى 2017 جىلى كافە جانە مەيرامحانا سالۋ ارقىلى اتالعان اۋىلدىق وكرۋگتە جەر ۋچاسكەلەرىن زاڭسىز ساتۋ ناتيجەسىندە الىنعان قاراجاتتى زاڭداستىرعان.
«ەڭبەكشىقازاق جۇمىسپەن قامتۋ ورتالىعى» قمك باسشىسى ناتيجەلى جۇمىسپەن قامتۋدىڭ جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان «ەڭبەك» مەملەكەتتىك باعدارلاماسى اياسىندا 2018-2019 جىلدارى جۇمىسسىز ازاماتتاردى جالعان جۇمىسقا تۇرعىزۋى ءۇشىن شارۋا قوجالىقتارىنىڭ شوتىنا اۋدارۋ ارقىلى بيۋدجەت قاراجاتىنان 12,9 ملن تەڭگەنى جىمقىرعان.
بۇل اتالعان فاكتىلەر بويىنشا سىبايلاس جەمقورلىققا قارسى ءىس-قيمىل اگەنتتىگىنىڭ الماتى وبلىسى بويىنشا دەپارتامەنتى سوتقا دەيىنگى تەرگەۋ جۇرگىزىپ جاتىر.
سونداي-اق الماتى قالاسىندا قىتاي ازاماتىنا قاتىستى قىلمىستىق قۋدالاۋدى توقتاتۋ سىلتاۋىمەن 10 مىڭ دوللار العان جەدەل ارەكەت ەتۋ ارنايى وتريادىنىڭ اعا ينسپەكتورى, شىمكەنت قالاسىندا مال دارىگەرىنىڭ دەلدالدىعى ارقىلى تاماق ونىمدەرىن ساتۋمەن اينالىساتىن جەكە كاسىپكەرلەردەن 10 مىڭ تەڭگەگە دەيىن پارا العان مەملەكەتتىك ۆەتەريناريالىق-سانيتاريالىق ينسپەكتورى, باتىس قازاقستان وبلىسىندا اڭشىلىق مىلتىقتى الىپ جۇرۋگە جانە ساقتاۋعا رۇقساتتى جەدەلدەتىپ بەرگەنى ءۇشىن 70 مىڭ تەڭگە العان ورال قالاسىنىڭ پوليتسيا باسقارماسى قىزمەتكەرى جانە قاراعاندى وبلىسىندا تاراپتاردىڭ تاتۋلاسۋى ءۇشىن كۇدىكتىنىڭ مۇددەسىنە قىلمىستىق ءىستى زاڭسىز توقتاتپاق بولعان وساكاروۆ اۋداندىق پوليتسيا ءبولىمىنىڭ تەرگەۋشىسى ۇستالدى.
ىندەت كۇشەيىپ, شەكتەۋلەر شەگىنە شىققان شاقتا حالىقتىڭ قاۋىپسىزدىگى ءۇشىن الدىڭعى شەپتە قىزمەت ەتىپ جۇرگەندەردىڭ ابىرويىنا وسىنداي بارماق باستى, كوز قىستى ارەكەتتەر سىزات تۇسەرەدى. قازاقستان رەسپۋبليكاسى قىلمىستىق كودەكسىنىڭ 54-بابى 11-تارماعىنىڭ 1-بولىگىنە سايكەس, توتەنشە جاعداي كەزىندە قىلمىستىق قۇقىق بۇزۋشىلىق جاساۋ قىلمىستىق جاۋاپكەرشىلىك پەن جازانى اۋىرلاتاتىن ءمان-جاي دەپ تانىلادى.
