مۇحيت ازىرباەۆ ءبىرىنشى كەزەكتە «قارعالى» ىقشاماۋدانىنداعى وزەن ارناسىنىڭ جۇمىسىمەن تانىستى. وندا تۇرعىن ۇيلەردى سۋ باسپاۋى ءۇشىن كانالداردى قالپىنا كەلتىرۋ, سونداي-اق, جاياۋ جۇرگىنشىلەر تروتۋارلارىن ورناتۋ, بالالار مەن سپورت الاڭدارىن سالۋ, سىرتقى جارىقتاندىرۋ جەلىلەرىن جۇرگىزۋ, كوگالداندىرۋ جۇمىستارى جۇرگىزىلۋدە.
– بۇل اۋداننىڭ قالاعا قوسىلعانىنا كوپ بولا قويعان جوق. مۇندا جەكە تۇرعىن ءۇي قۇرىلىسى نىساندارى كوپ, ال بالالار مەن سپورت الاڭدارى, تۇرعىنداردىڭ دەمالاتىن ورىندارى تىم از. اۋدان حالىقتىڭ يگىلىگى ءۇشىن وسىنداي نىسانداردى تۇرعىزۋ ماقساتىندا جاقسى دايىندالدى, ەگەر ءبىز ويىمىزداعىنى تۇگەل ءساتتى جۇزەگە اسىراتىن بولساق, وندا مۇندا تۇرعىنداردىڭ سەرۋەندەۋىنە, جايلى ءومىر سۇرۋىنە, ۋاقىتىن ءتيىمدى وتكىزۋىنە ارنالعان دەمالىس ورىندارى كوپ بولادى. ال قازىر ءبىز بولاشاقتا وسى جۇمىستاردى قولعا الاتىن مەردىگەرلەردىڭ وسى اۋداننىڭ قاي جەرىنە قانداي دەمالىس ورىندارىن سالۋ كەرەكتىگىن ناقتىلاپ, تاعى ءبىر پىسىقتاپ جاتىرمىز, – دەپ اتاپ ءوتتى مۇحيت ازىرباەۆ.
