سول 95 جىل ۋاقىت ارالىعىندا اتالعان جارىستىڭ جالاۋى 45 مارتە جەلبىرەپ, سان ميلليون جانكۇيەر تالاي «جان الىسىپ, جان بەرىسكەن» جەكپە-جەكتەردىڭ كۋاسى بولدى. ءسوز ورايى كەلگەندە ايتا كەتەيىك, قارت قۇرلىقتىڭ باستى دوداسىنا ءبىز بەكەر توقتالىپ وتىرعان جوقپىز. كەزىندە قازاقستان كسرو-نىڭ قۇرامىندا بولعان كەزدە ءبىزدىڭ ءبىراز جۋان جۇدىرىقتى جىگىتتەرىمىز ەۋروپا چەمپيوناتتارىندا كۇش سىناستى. كەيبىرەۋىنىڭ اسىعى الشىسىنان ءتۇستى, كەيبىرەۋى ەلگە ەڭسەلەرى ءتۇسىپ ورالدى. بۇگىنگى ماقالامىزدا ءبىز سول بايراقتى باسەكەدە باق سىناعان وتانداستارىمىز جايىندا اڭگىمەلەگىمىز كەلەدى.
كەزىندە قازاقستاننىڭ كوپتەگەن مىقتى بوكسشىلارى اسا ءىرى حالىقارالىق جارىستاردان شەت قالعانىن ەگدە تارتقان جانكۇيەرلەر جاقسى بىلەدى. كەڭەس وداعىنىڭ سولاقاي ساياساتىنىڭ سالدارىنان تالاي جاقسىلارىمىز بەن جايساڭدارىمىزعا ايتۋلى دودادا باق سىناۋ باقىتى بۇيىرمادى. تەك جەتپىسىنشى جىلداردىڭ سوڭىندا عانا جەرلەستەرىمىزگە ەۋروپا چەمپيوناتىندا ونەر كورسەتۋ مۇمكىندىگى تۋدى.
1979 جىلى گەرمانيانىڭ كەلن قالاسىندا 23-مارتە ۇيىمداستىرىلعان قۇرلىق بىرىنشىلىگىنە قازاقستاننىڭ ەكى بوكسشىسى قاتىسىپ, ەكەۋى دە التىن تۇعىرعا كوتەرىلدى. اتاپ ايتساق, 60 كيلو سالماقتاعى ۆيكتور دەميانەنكو جارتىلاي فينالدا گدر وكىلى ريحارد نوۆاكوۆسكي مەن گفر-دىڭ مىقتىسى رەنە ۆەللەردەن باسىم تۇسسە, 63,5 كيلو سالماقتاعى سەرىك قوناقباەۆ شەشۋشى تۇستا نەمىس كارل-حاينتس كريۋگەر مەن يتاليالىق پاتريتسيو وليۆانى قاپى قالدىردى.
1981 جىلعى جارىستى فينليانديانىڭ تامپەرە قالاسى قابىلدادى. سۋومي ەلىنە اتتانعان سەرىك قوناقباەۆ ەكىنشى مارتە ەۋروپا چەمپيونى اتاندى. بۇل جولى قانداسىمىز 63,5 كيلو سالماق دارەجەسىندە قارسىلاس شاق كەلتىرمەدى. اقتىق ايقاستا ول ءوزىنىڭ سىرالعى قارسىلاسى كارل-حاينتس كريۋگەردى تاعى دا جەر سيپاتىپ كەتتى. 57 كيلو سالماقتا سىنعا تۇسكەن سەرىك نۇرقازوۆ قولا مەدالدى موينىنا ءىلدى. اسا شيەلەنىستى وتكەن جارتىلاي فينالدىق باسەكەدە قازاق بوكسشىسى ريحارد نوۆاكوۆسكيگە ەسە جىبەردى.
قازاق بوكسىنىڭ مىقتىلىعىن تۇبەگەيلى مويىنداعان كسرو قۇراماسىنىڭ باپكەرلەرى 1983 جىلى بولگاريانىڭ ۆارناسىندا جالاۋى جەلبىرەگەن جارىسقا بەس جەرلەسىمىزدى اپاردى. ولاردىڭ بارلىعى دا جەڭىس تۇعىرىنان قول بۇلعادى. فينالدا رينگ قوجايىنى پلامەن كامۋروۆتى جەڭگەن سەرىك نۇرقازوۆ (57 كيلو) باس جۇلدەنى ولجالاسا, بەيبىت ەسجانوۆ (48 كيلو), راشيد كابيروۆ (51 كيلو), ۆيكتور دەميانەنكو (60 كيلو) جانە الەكساندر ميروشنيچەنكو (+91 كيلو) قولاعا قول سوزدى.
1985 جىلعى بايراقتى باسەكە بۋداپەشتتە ءوتتى. ماجارستاننىڭ باس شاھارىنا ساپار شەككەن قازاقستاننىڭ جالعىز ورەنى كارىمجان ءابدىراحمانوۆ (48 كيلو) قولا مەدالدى ەنشىلەدى. باستاپقى باسەكەلەردە فينليانديا مەن رۋمىنيانىڭ وكىلىن ۇتقان ونىڭ جارتىلاي فينالدا نەمىس جىگىتى رەنە برايتبارتقا ءالى جەتپەدى.
1987 جىلى تۋريندەگى (يتاليا) جارىسقا قازاقستاننان ەشكىم بارمادى. 1989 جىلى افيناعا يگور رۋجنيكوۆ (63,5 كيلو) پەن الەكساندر ميروشنيچەنكو (+91 كيلو) اتتاندى. العاشقىسى التىن السا, ەكىنشىسى قولا مەدالدى يەمدەندى. 1991 جىلى سيدنەيدە بولات تەمىروۆ (51 كيلو) باق سىنادى. بىراق شيرەك فينالدا ماجارستاندىق يشتۆان كوۆاچقا جول بەرگەن قانداسىمىز جۇلدەگەرلەر ساناتىنا قوسىلا المادى.
وسىلايشا, ەۋروپا چەمپيوناتىندا كۇش سىناسقان قازاقستاندىقتار اراسىنان ءبىر عانا بوكسشىمىزدىڭ جۇلدەگە قول جەتكىزە الماعانىن بايقايمىز. قالعاندارىنىڭ بارلىعى دا جەڭىس تۇعىرىنا كوتەرىلدى. تارقاتىپ ايتساق, وتانداستارىمىز 5 التىن جانە 7 كۇمىس مەدال ولجالاعان ەكەن. بارلىعى – 12 جۇلدە!
كسرو ىدىراعاننان كەيىن قازاقستان قۇراماسى ازيا بىرىنشىلىگىنە قاتىسا باستادى. بۇل رەتتە وتاندىق بىلعارى قولعاپ شەبەرلەرىمىز وزدەرىنىڭ مىقتىلىعىن تۇبەگەيلى مويىنداتىپ, سارى قۇرلىقتاعى ەڭ بەلدى كوماندالاردىڭ ءبىرى ءارى بىرەگەيىنە اينالدى. جالپى ەسەپتە دە جەرلەستەرىمىزدىڭ سان مارتە توپ جارعانىن جانكۇيەرلەر جاقسى بىلەدى. دەسەك تە قازاقتىڭ جۋان جۇدىرىقتى جىگىتتەرىنىڭ تابىسى وسىمەن عانا شەكتەلىپ قالعان جوق. 1993 جىلى بۋرسادا وتكەن ەۋروپا چەمپيوناتىندا تۇركيانىڭ تۋى استىندا ونەر كورسەتكەن قانداسىمىز نۇرحان سۇلەيمەن ۇلى باس جۇلدەنى ولجالاسا, 1996 جانە 1998 جىلدارى ول كۇمىس مەدالدى كەۋدەسىندە جارقىراتتى.
