توتەنشە جاعداي كەزىندەگى ماسەلەلەردى كەڭىنەن ءسوز ەتكەن داريعا نازارباەۆا مەديتسينا سالاسىن دامىتۋعا ارنايى توقتالىپ, مەملەكەت باسشىسى قاسىم-جومارت توقاەۆتىڭ شەشىمىمەن بۇل سالا اۋقىمدى مەملەكەتتىك قولداۋعا يە بولاتىنىن اتاپ ءوتتى.
– پرەزيدەنت حالىقتىڭ دەنساۋلىعىن قورعاۋ جۇيەسىن جاقسارتۋ جونىندەگى ناقتى ۇسىنىستاردى قاراستىرا وتىرىپ, حالىق دەنساۋلىعى مەن دەنساۋلىق ساقتاۋ جۇيەسى تۋرالى جاڭا كودەكس قابىلداۋدى تاپسىردى. وسى اسا ماڭىزدى قۇجاتپەن ءبىز جاقىن ارادا جۇمىستى باستايمىز. جاڭا كودەكستىڭ جوباسىمەن جۇمىس ىستەۋ كەزىندە سەناتورلار وسى سالانىڭ توتەنشە جاعداي كەزىندەگى پروبلەمالىق ماسەلەلەرىن ەسكەرگەنى دۇرىس دەپ سانايمىن. بۇل تۇستا تاعى قانداي ماسەلەگە نازار اۋدارعان ورىندى؟ پاندەميا قوعامنىڭ ارتىقشىلىقتارى مەن دامۋ قۇندىلىقتارىن تۇبەگەيلى وزگەرتتى. ازاماتتاردىڭ ءومىرى مەن دەنساۋلىعىن ساقتاۋ ارقاشان مەملەكەتتىك ساياساتتىڭ نەگىزگى ماسەلەسى بولىپ كەلگەن, بىراق بۇل مىندەت قازىرگىدەي وتكىر بولعان ەمەس. وسىدان كەلىپ بارشا قوعام ەلىمىزدەگى مەديتسينانى دامىتۋ ستراتەگياسىنا ايرىقشا نازار اۋدارىپ وتىر, – دەدى سەنات توراعاسى.
داريعا نازارباەۆا ەلىمىزدىڭ جۇيە قالىپتاستىرۋشى كاسىپورىندار ءتىزىمىنىڭ جوباسىن شىققانىن ايتا كەلىپ, ونىڭ ىشىندە مەديتسينالىق ماسكا نەمەسە دەزينفەكتسيا قۇرالدارىن شىعاراتىن تىم بولماعاندا ءبىر كاسىپورىن بولماعانىنا ءمان بەردى. وسى رەتتە ول ورتاعا «پرەزيدەنتتىڭ تاپسىرماسى بويىنشا وتاندىق تەست-جۇيەلەرىن, يممۋندى بيولوگيالىق پرەپاراتتاردى وندىرەتىن, كورونوۆيرۋس ينفەكتسياسىنا قارسى ۆاكتسينا شىعارۋعا دايىن كاسىپورىندار قايدا؟» دەگەن سۇراق تاستادى؟
داريعا نازارباەۆا قىسىلتاياڭ كەزەڭنىڭ باسقا دا ماسەلەلەرىنە توقتالىپ, ءسوزىنىڭ سوڭىندا پارلامەنت بارلىق دەڭگەيدەگى بيلىك ورگاندارىنىڭ توتەنشە جاعدايداعى ارەكەتتەرىنە ەگجەي-تەگجەيلى تالداۋ جۇرگىزىپ, جۇيەلى قورىتىندى شىعارۋ كەرەك ەكەنىن اتاپ ءوتتى.
