ايماقتار • 30 ءساۋىر، 2020

پاۆلودار قالاسىنداعى NIS وقۋشىسى بۇكىلسىبىرلىك وليمپيادادا جەڭىمپاز اتاندى

64 رەت كورسەتىلدى

پاۆلودار قالاسىنداعى حيميا-بيولوگيا باعىتىنداعى نازارباەۆ زياتكەرلىك مەكتەبىنىڭ 11-سىنىپ وقۋشىسى دىنمۇحاممەد ورازباەۆ بۇكىلسىبىرلىك اشىق وقۋشىلار وليمپياداسىندا بيولوگيا ءپانى بويىنشا جۇلدەلى ءى ورىندى يەلەندى.

رەسەيدىڭ ءسىبىر، قيىر شىعىستىڭ قالالارى مەن قازاقستاننىڭ مىڭداعان وقۋشىلارى باق تالاسقان وليمپيادانىڭ 3-ءشى كەزەڭىنەن دە دىنمۇحاممەد مۇدىرمەي ءوتتى. اقتىق كەزەڭگە قاتىسۋ ءۇشىن اعىمداعى جىلدىڭ 8-ءشى ناۋرىزىندا رەسەيدىڭ ومبى قالاسىنا بارىپ، ءوز ءبىلىمىن كورسەتتى. وتكەن جىلى اتالمىش ءبىلىم دوداسىنان ول جۇلدەلى 2-ءشى ورىندى يەلەنسە، وسى جىلى جەڭىمپاز اتاعىن الىپ وتىر.

- وليمپيادالارعا 8-سىنىپتان باستاپ تىڭعىلىقتى دايىندالىپ، قاتىسا باستادىم، - دەيدى دىنمۇحاممەد ورازباەۆ. - اسىرەسە بيولوگيا ءپانىن ەرەكشە جاقسى كورەمىن. بولاشاقتا مەديتسينا سالاسىنىڭ مامانى بولعىم كەلەدى. مەن نازارباەۆ زياتكەرلىك مەكتەبىنىڭ وقۋشىسى بولعانىمدى ماقتان ەتەمىن. سەبەبى وسى وقۋ ورداسىنا تۇسكەننەن باستاپ مەن ءوزىمنىڭ سۇيىكتى پاندەرىمدى تەرەڭدەتە وقي باستادىم. وعان قوسا، مىقتى ۇستازداردان ءتالىم الۋدامىن. سوندىقتان وسى جەتىستىكتەرىمنىڭ ءبىر ۇلەسى التىن ۇيامنىڭ، ۇستازىم ءارى جەتەكشىم مۇحيت اۋتاەۆقا، سونداي-اق اتا-انام مەن دوستارىمنىڭ قولداۋىنىڭ ارقاسى دەر ەدىم. دىنمۇحاممەد ورازباەۆ ءتورت جىلدان بەرى جەلىلىك، رەسپۋبليكالىق وليمپيادالاردىڭ جەڭىمپازى. سونداي-اق بۇكىلرەسەيلىك، بۇكىلسىبىرلىك وليمپيادالاردا كۇمىس، قولا مەدال يەگەرى اتانىپ ۇلگەرگەن. ايتا كەتەرلىگى، ول ناۋرىز ايىنىڭ سوڭىندا لومونوسوۆ وليمپياداسىندا جۇلدەلى 2-ءشى ورىندى، بۇكىلرەسەيلىك وليمپيادادا 3-ءشى ورىندى جەڭىپ الدى.

سوڭعى جاڭالىقتار

اراق اۋرۋدان ايىقتىرمايدى

كوروناۆيرۋس • كەشە

ۇقساس جاڭالىقتار