مۇنى بىلتىر دا, بيىل دا بالىقتىڭ قىرىلۋىمەن بايلانىستىرىپ وتىرمىز. اتىراۋ وبلىسىنداعى پريمورسكي كانالىندا بالىقتىڭ ولگەنى 21 ساۋىردە بەلگىلى بولعان ەدى. كاسپي تەڭىزىنىڭ جايىق وزەنىنە قۇيار ساعاسىنداعى كانال بويىنان باستاپقىدا 1 تونناداي بالىق ولەكسەسى جيناپ الىندى. ودان كەيىن 4 تونناداي ءولى بالىق تاعى جينالدى.
وسىعان وراي كانال سۋىنان, توپىراقتان سىناما الىنىپ, زەرتحاناعا جولداندى. مامانداردىڭ بولجامىنا سايكەس, سۋدان الىنعان العاشقى سىنامادا وتتەگىنىڭ شەكتى مولشەردەن ەكى ەسەدەي از ەكەنى انىقتالدى. سۋ قۇرامىنان زياندى قوسپالار مەن مۇناي ونىمدەرىنىڭ قالدىعى كەزدەسپەدى.
«قازگيدرومەت» رمك-نىڭ حابارلاۋىنشا, 27 ساۋىردە «اقجايىق» مەملەكەتتىك تابيعي رەزەرۆاتىنىڭ اۋماعىنداعى پريمورسك كانالىندا بالىقتاردىڭ ءولۋ فاكتىسى قايتا انىقتالۋىنا بايلانىستى اتىراۋ وبلىسى بويىنشا فيليالىنىڭ قىزمەتكەرلەرى ءۇشىنشى رەت سۋ سىنامالارىن جوسپاردان تىس ىرىكتەۋ ۇيىمداستىرىلىپتى.
– گيدرولوگيالىق دەرەكتەر بويىنشا 26-27 ءساۋىر ارالىعىندا جايىق وزەنى سۋىنىڭ دەڭگەيى 2020 جىلعى 25 ساۋىردەگى سۋ دەڭگەيىنىڭ كوتەرىلۋىنەن كەيىن تومەندەۋى بايقالادى (تاۋلىك ىشىندەگى سۋ دەڭگەيى 5-17 سم تومەندەدى).
سۋ ساپاسىن تالداۋ باستى يوندار, بيوگەندى, ورگانيكالىق جانە ورگانيكالىق ەمەس زاتتار, اۋىر مەتالداردى قوسا العاندا, 39 كورسەتكىش بويىنشا جۇرگىزىلەدى. تالداۋ ناتيجەلەرى بويىنشا سۋ لايلانعان, سۋدىڭ تەمپەراتۋراسى 15-17ºس شەگىندە, سۋتەگى كورسەتكىشى – 6,97- 7,48, ەرىگەن وتتەگى – 7,1-7,2 مگ/دم3, وتتەگىمەن قانىعۋ – 71,7- 73,8 %, مولدىرلىگى –5,5-7,0 سم, ءتۇسى –19,5-20 گرادۋس, تابيعي سۋعا ءتوزىمدى ەمەس ءيىس تابىلعان جوق. سۋ ساپاسىنىڭ بىرىڭعاي جىكتەمەسىنىڭ شەكتى نورماسىنىڭ اسىپ كەتۋى جالپى تەمىر بويىنشا – 0,5 مگ/دم3 (1,7 ەسە اسىپ كەتۋ) پريمورسك كانالى ىرىكتەۋ نۇكتەسىندە, «اقجايىق» بەكەتىنەن اعىس بويىنشا 6 كم تومەن, ەكىنشى نۇكتەدە نورما شەگىندە تىركەلدى, -دەپ حابارلادى «قازگيدرومەت» رمك.
