زاڭ جوباسىن تالقىلاۋ بارىسىندا دەپۋتات شاۆحات وتەمىسوۆ توتەنشە جاعداي كەزىندە ازاماتتار جارامدىلىق مەرزىمى وتكەن قۇجاتتارىن جاڭارتا المايتىنىن ايتىپ, بايانداماشىدان بۇل جايدىڭ رەتىن سۇرادى. ءسوزىنىڭ دالەلى رەتىندە قازىرگى قىسىلتاياڭ شاقتا 99,5 مىڭ جەكە كۋالىكتىڭ, 68 مىڭ جۇرگىزۋشى كۋالىگىنىڭ مەرزىمى ءوتىپ كەتكەنىن العا تارتتى.
زاڭ جوباسىن تانىستىرعان ۇلتتىق ەكونوميكا ءمينيسترى رۋسلان دالەنوۆ بۇل ماسەلە بويىنشا قازىر ىشكى ىستەر مينيسترلىگى ءوز قۇزىرەتى اياسىندا قاۋلى جوباسىن ازىرلەپ جاتقانى, توتەنشە جاعداي رەجيمى كەزىندە جارامدىلىق مەرزىمى وتكەن قۇجاتتاردى ازاماتتارىمىزعا پايدالانۋ قۇقىعى بەرىلەتىنىن ايتىپ, جاۋاپ بەردى.
بۇل ءسوزدى زالدا وتىرعان ىشكى ىستەر ءمينيسترىنىڭ ورىنباسارى يۋري يلين قۇپتاپ, ءمينيستردىڭ بۇيرىعىمەن كولىك جۇرگىزۋگە رۇقسات بەرەتىن قۇجاتىنىڭ مەرزىمى ءوتىپ كەتكەن ازاماتتاردى اكىمشىلىك جاۋاپكەرشىلىككە تارتپاۋ تۋرالى تاپسىرما بەرىلگەنىن اتاپ ءوتتى. ال جەكە كۋالىك بويىنشا مەملەكەت باسشىسىنىڭ اتىنا ۇسىنىس ازىرلەنىپتى. بۇل توتەنشە جاعداي رەجيمى كەزەڭىندە وسى نورمانى پرەزيدەنت جارلىعىمەن ۇزارتۋ ءۇشىن قاجەت.
جالپى مۇنداي قۇجاتتار ءتىزىمى وتە كوپ ەكەن. مامىر ايىندا تاعى 90 مىڭداي جەكە كۋالىكتىڭ جارامدىلىق مەرزىمى بىتپەك.
ءماجىلىس توراعاسى نۇرلان نىعماتۋلين توتەنشە جاعداي رەجيمى ەنگىزىلگەن جاعدايدا ادامدار مەرزىمى وتكەن قۇجاتتارىن پايدالانۋعا مۇمكىندىك بەرەتىن مۇنداي نورمانىڭ قاجەت ەكەنىن باسا ايتتى.
