بيىل اقمولا وبلىسىندا 5 300 تۇرعىن ءۇي سالىنادى

بيىل ءى توقساندا وبلىستا تۇرعىن ءۇي قۇرىلىسىنا 13,9 ملرد تەڭگە ينۆەستيتسيا سالىنىپ, 151 مىڭ شارشى مەتر نەمەسە 1348 تۇرعىن ءۇي پايدالانۋعا بەرىلدى. بۇل 2019 جىلدىڭ سايكەس كەزەڭىمەن سالىستىرعاندا 3,7% كوپ.

«نۇرلى جەر» مەملەكەتتىك باعدارلاماسى شەڭبەرىندە بيىل وبلىستا ينجەنەرلىك-كوممۋنيكاتسيالىق ينفراقۇرىلىم جانە تۇرعىن ءۇي قۇرىلىسى سالاسىندا 10,4 ملرد تەڭگە سوماسىندا 49 جوبا ىسكە اسىرىلىپ, 595 جۇمىس ورنى اشىلادى.

جالپى اۋدانى 49,4 مىڭ شارشى مەتر بولاتىن جالعا بەرىلەتىن جانە كرەديتتىك تۇرعىن ءۇي نەمەسە 1002 پاتەردى پايدالانۋعا بەرۋ جوسپارلانعان.  ونىڭ ىشىندە ساتىپ الۋ قۇقىعىنسىز جالعا بەرىلەتىن ۇي قۇرىلىسىنا 2,9 ملرد تەڭگە جۇمسالىپ, 21 جوبا ىسكە اسىرىلادى. بيىلعى ءى توقساندا اكىمدىككە 178,7 ملن تەڭگە اۋدارىلىپ, ونىڭ 77,2% يگەرىلگەن. 13,9 مىڭ شارشى مەتر جالعا بەرىلەتىن تۇرعىن ءۇيدى نەمەسە 290 پاتەردى پايدالانۋعا بەرۋ جوسپارلانسا, ەسەپتى كەزەڭدە ونىڭ 150 پاتەرى سالىندى. جالعا بەرىلەتىن تۇرعىن ءۇي قۇرىلىسىندا 202 جۇمىس ورنى اشىلادى.

كرەديتتىك تۇرعىن ءۇي قۇرىلىسىندا 13 جوبانى ىسكە اسىرۋ ءۇشىن 5,6 ملرد تەڭگە قاراستىرىلعان. ءى توقساندا 1,2 ملرد تەڭگە مولشەرىندە وبليگاتسيالار شىعارىلدى. 35,5 مىڭ شارشى مەتر تۇرعىن ءۇيدى نەمەسە 712 پاتەردى پايدالانۋعا بەرۋ جوسپارلانعان. 250 جۇمىس ورنى اشىلادى.

سونداي-اق «نۇرلى جەر» مەملەكەتتىك باعدارلاماسى اياسىندا  2%-دىق نەسيە بەرىلەتىن «باقىتتى وتباسى» باعدارلاماسىن ىسكە اسىرۋعا بيىل رەسپۋبليكالىق بيۋدجەتتەن 181 تۇرعىن ءۇي ءۇشىن 1,8 ملرد تەڭگە قاراستىرىلعان.

تۇرعىن ءۇي قۇرىلىسى اۋداندارىنا ينجەنەرلىك-كوممۋنيكاتسيالىق ينفراقۇرىلىم جۇرگىزۋ ءۇشىن 15 جوبا ىسكە اسىرىلادى. وعان 1,9 ملرد تەڭگە جۇمسالىپ, 143 جۇمىس ورنى اشىلادى.