ەندى وبلىس تۇرعىندارى قاجەتتىلىككە بايلانىستى بىرقاتار جەڭىلدىك شاراسىن پايدالان الادى. اتاپ ايتقاندا, ادامدارعا ساعات 05.00-20.00 ارالىعىندا راستايتىن قۇجات ۇسىنۋ ارقىلى باۋ-باقشاعا, ساياجايلارعا بارۋعا رۇحسات ەتىلدى. وسى باعىتتارعا جۇرەتىن قوعامدىق جانە جەكە كولىكتەرگە سالىنعان تىيىم الىنىپ تاستالدى. باۋ-باقشا سەرىكتەستىكتەرىنە, ساياجايلارعا باراتىن قوعامدىق كولىكتەر ساعات 05.00-دەن 20.00-گە دەيىن جۇرەتىن بولادى. بىراق, باعباندارعا ءوز ساياجايلارىندا قوناق شاقىرۋعا, ءىس-شارا وتكىزۋگە تىيىم سالىنادى. ولار جۇمىس بارىسىندا 2 مەترلىك ارا قاشىقتىقتى ساقتاپ, مەديتسينالىق ماسكالار تاعىپ, انتيسەپتيكتەر پايدالانۋدى جالعاستىرۋى ءتيىس. سونداي-اق, ازاماتتارعا اۋلا ىشىندەگى اۋماقتار مەن بالالار الاڭدارىندا ساعات 09.00 مەن 20.00 ارالىعىندا سەرۋەندەۋگە رۇقسات ەتىلەدى. وبلىس تۇرعىندارى ءبىر-بىرىمەن قول الىسپاۋى ءتيىس, ادامدار اراسىنداعى 2 مەترلىك قاشىقتىقتى ساقتاپ, مەديتسينالىق ماسكالار تاعىپ, انتيسەپتيكتەر پايدالانا بەرۋى كەرەك.
ال COVID-19 ينفەكتسياسىنىڭ تىركەلۋىنە بايلانىستى كارانتيننىڭ كۇشەيتىلگەن رەجيمى ەنگىزىلگەن ەلدى مەكەندەر مەن نىساندار اۋماعىندا قوزعالىسقا سالىنعان تىيىم ساقتالادى. جاڭا قاۋلىعا سايكەس اۆتوجۋ, تەحنيكالىق قىزمەت كورسەتۋ ستانتسيالارى, دوڭگەلەك جوندەۋ قىزمەتى ساعات 10.00-دەن 20.00 ارالىعىندا ءوز جۇمىستارىن جالعاستىرا الادى. سول سياقتى تاڭەرتەڭگى 09.00-دەن كەشكى 16.00 ارالىعىندا حيميالىق تازارتۋ, كىر جۋ ورىندارى دا جۇمىستارىنا كىرىسەدى. زاڭ قىزمەتىن كورسەتەتىن سۋبەكتىلەر مەن نوتاريۋستار تاپسىرىس بويىنشا ساعات 10.00-نان 20.00-گە دەيىن جۇمىس ىستەيدى.
مۇنان بولەك, اۆتوبولشەكتەر ساتاتىن, قۇرىلىس ماتەريالدارىن ساۋدالايتىن جەكە تۇرعان دۇكەندەر دە ساعات 09.00 مەن 18.00 ارالىعىندا اشىق بولادى. ەكىنشى دەڭگەيلى بانكتەر مەن ولارعا قاراستى اقشا ايىرباستاۋ پۋنكتتەرى, نەسيەلىك سەرىكتەستىكتەر, ميكروقارجىلىق ۇيىمدار قالىپتى رەجيمدە جۇمىستارىن جالعاستىرادى. كۇزەت قىزمەتى ۇيىمدارى, جولدار مەن كوپىرلەردى كۇتىپ-ساقتايتىن, سونىڭ ىشىندە تەمىر جولداردا قىزمەت كورسەتەتىن نىساندار دا جۇمىسقا كىرىسەدى. بۇل رەتتە كارانتين كەزىندە جۇمىس ىستەيتىن نىساندار سانيتارلىق-دەزينفەكتسيالىق تالاپتاردى قاتاڭ ساقتاۋى ءتيىس.
