ايماقتار • 29 ءساۋىر، 2020

التايدا قۇنۋ فوتوتۇزاققا ءتۇستى

2618 رەت كورسەتىلدى

قاتتى اشىقسا، بۇعى-مارال، بۇلاننىڭ ءوزىن دە قورەگىنە اينالدىرادى.

ءبىر اي بۇرىن التايداعى كاتونقاراعاي مەملەكەتتىك ۇلتتىق تابيعي پاركى اۋماعىنداعى سارىمساقتى جوتاسىندا فوتوتۇزاققا تۇسىرىلگەن اق كەكىلىكتىڭ سۋرەتىن جاريالاپ ەدىك. وسى جولى نازارلارىڭىزعا ۇسىنىلىپ وتىرعان ايۋعا ۇقسايتىن قۇنۋ دەپ اتالاتىن جىرتقىش دا سول سارىمساقتىدا، سول اقپان ايىندا فوتوتۇزاققا ىلىگىپتى. فوتوتۇزاقتى قۇرعان – كاتونقاراعاي مەملەكەتتىك ۇلتتىق تابيعي پاركىنىڭ عىلىمي ءبولىمىنىڭ اعا قىزمەتكەرى ۆلاديمير ۆوروبەۆ. «بۇل قۇنى ء(وزىنىڭ ايتۋى) دەگەنىڭىز جەر تالعامايدى. تاۋدا دا، تاستا دا جۇرە بەرەدى. بويى الاسا بولعانىمەن وتە قارۋلى. تاباندارى جالپاق، بىلەكتەرى مىقتى. جازعىتۇرىم، قىس ۋاقىتىندا ارا-تۇرا كورىپ جۇرەمىز. پارك قىزمەتكەرلەرى جىرتقىشتى بۇعان دەيىن دە تالاي رەت سۋرەتكە تۇسىرگەن. بۇل – سوڭعى تۇسىرىلگەن سۋرەتى» دەيدى كاتونقاراعاي مەملەكەتتىك ۇلتتىق تابيعي پاركىنىڭ جانۋارلار الەمىن قورعاۋ جانە ءوندىرۋ ءبولىمىنىڭ باسشىسى ەرىك قاسىموۆ.

جۇرەتىن جەرىن عانا ەمەس، تاماقتى دا تالعامايتىن قۇنۋ ولەكسەنى دە جەي بەرەدى، قاتتى اشىقسا ءتىپتى، بۇعى-مارال، بۇلاننىڭ ءوزىن دە قورەگىنە اينالدىرادى دەيدى بىلەتىندەر. قۇنۋ التايدا بار بولعانىمەن ەلىمىزدە وتە سيرەك. حالىقتىڭ كوبى بۇل جىرتقىشتى نەگىزىنەن تەلەديدار ارقىلى بىلەدى. كاتونقاراعاي مەملەكەتتىك ۇلتتىق تابيعي پاركىن 100-دەن استام قۇنۋ مەكەندەيدى. 

شىعىس قازاقستان وبلىسى،

كاتونقاراعاي اۋدانى

ۇقساس جاڭالىقتار