اتالعان زاڭ جوباسى «الەۋمەتتىك-ەكونوميكالىق تۇراقتىلىقتى قامتاماسىز ەتۋ جونىندەگى شارالار تۋرالى» 2020 جىلعى 16 ناۋرىزداعى مەملەكەت باسشىسىنىڭ جارلىعىن ورىنداۋ ماقساتىندا ازىرلەندى. قۇجات الەۋمەتتىك-ەكونوميكالىق تۇراقتىلىقتى قامتاماسىز ەتۋ ءۇشىن توتەنشە جاعداي كەزەڭىندە جەدەل شارالار قابىلداۋ مۇمكىندىگىن كۇشەيتۋدى كوزدەيدى.
زاڭ جوباسىن دەپۋتاتتار نازارىنا ۇلتتىق ەكونوميكا ءمينيسترى رۋسلان دالەنوۆ ۇسىندى.
–زاڭ جوباسىندا توتەنشە جاعداي كەزەڭىندە مەملەكەتتىك باسقارۋدىڭ جۇمىس ىستەۋ مەحانيزمى بەلگىلەنەدى. ول ءۇشىن «توتەنشە جاعداي تۋرالى» جانە «قۇقىقتىق اكتىلەر تۋرالى» زاڭدارعا تۇزەتۋلەر ەنگىزىلەدى. اتاپ ايتقاندا, «توتەنشە جاعداي تۋرالى» زاڭ توتەنشە جاعداي كەزەڭىندە زاڭنامانىڭ جەكەلەگەن سالالارىنىڭ قولدانىلۋ ەرەكشەلىكتەرىمەن تولىقتىرىلادى. زاڭ جوباسىندا ولارعا 14 سالا جاتقىزىلادى: سالىقتىق, بيۋدجەتتىك, كەدەندىك, بانكتىك, ەڭبەك, مونوپولياعا قارسى زاڭناما; دەنساۋلىق, مەملەكەتتىك ساتىپ الۋ, ۆاليۋتالىق رەتتەۋ تۋرالى زاڭناما; الەۋمەتتىك قورعاۋ, مەملەكەتتىك م ۇلىك, مەملەكەتتىك باقىلاۋ جانە قاداعالاۋ سالاسىندا; سونداي-اق ەلدىڭ حالىقارالىق مىندەتتەمەلەرىن ىسكە اسىرۋ, – دەدى ر.دالەنوۆ.
ءمينيستردىڭ ايتۋىنشا, توتەنشە جاعداي كەزىندە قابىلدانعان قۇقىقتىق اكتىلەر بۇل كەزەڭ اياقتالعانعا دەيىن قولدانىلادى. ولاردىڭ قاتارىنا وزگە قولدانىلۋ مەرزىمى بەلگىلەنگەن اكتىلەر كىرمەيدى.
