ول كەزدە قىلشىلداپ تۇرعان 25 جاسقا ەندى تولعان شاعىم. ءوزىمدى ءوزىم قايراپ كۇش جيناپ, ەكى اياققا تۇرىپ كەتۋگە تالپىندىم. بىراق بۇل ارەكەتىمنەن تۇك شىقپادى. اقىرى تاعدىردىڭ ماڭدايعا جازعانىنا كونىپ, مۇگەدەك ارباسىنا تاڭىلدىم. باسقا تۇسسە باسپاقشىل, مويىنداعانمەن مويۋعا بولمايدى. جىگىتكە ماسىلدىق جاراسپايدى, بويداعى بار جىگەرىمدى جانىپ, بەلسەندى ومىرگە ارالاسۋعا تالپىندىم. جالپى تالپىنعان ادام قانداي جاعدايدا بولماسىن مۇراتىنا جەتەدى. قازىر مۇمكىندىگى شەكتەۋلىلەر قوعامىنىڭ مۇشەسىمىن. وسى قوعامنىڭ جانىنان اشىلعان «جاستار-2016» جشس باسقارامىن. سەرىكتەستىكتەگى جىگىتتەردىڭ ءبارى ونەرلى. تەمىردى قامىرداي يلەيتىن ۇستا دا, مەتالدى ءبىر-بىرىنە جىمىن بىلدىرمەي جاپسىراتىن دانەكەرلەۋشى دە, شەبەر اعاش جونۋشى دا بار. كارانتينگە دەيىن كوپ نارسەمەن اينالىستىق. تاپسىرىس بويىنشا شاتىر دا جاپتىق, قورشاۋ, قاقپالاردىڭ نەشە ءتۇرىن جاسادىق. مەكتەپتەرگە ارناپ ۇستەل, ورىندىق, پارتا, كيىم ىلگىش سياقتى جيھازدار شىعاردىق.
جالپى ەلىمىزدە مۇكىندىگى شەكتەۋلى جاندارعا مۇمكىندىك مول. ءوز باسىم مەملەكەتتىڭ قامقورلىعىن كوپ كوردىم. سەرىكتەستىگىمىز تالاي رەت تىعىرىققا تىرەلدى. سول قيىندىقتاردىڭ ءبارىن ۇكىمەت قولداۋىنىڭ ارقاسىندا ەڭسەردىك. ماسەلەن, مەملەكەتتىك ساتىپ الۋ كونكۋرستارى كەزىندە ەڭ ءبىرىنشى كەزەكتە بىزگە باسىمدىق بەرىلەدى.
قازىر پاندەميا دەگەن بالەكەت كەلىپ تىرشىلىگىمىز ۋاقىتشا توقتاپ, كاسىبىمىز توقىراپ, اياققا تۇساۋ تۇسكەندەي بولىپ قالدىق. وبلىس كارانتينگە جابىلدى. ىندەتكە ىلىككەندەر سانى كۇن ساناپ ءوسىپ جاتىر. بىراق امال نە؟ بۇكىل ەلدىڭ باسىنا تۇسكەن اۋىرتپالىق, سوندىقتان كارانتين تالاپتارىن ساقتاپ, جۇمىسىمىزدى توقتاتىپ قويدىق. بەتپەردەمدى تاعىپ, ينۆوتاكسيگە ءمىنىپ كۇنارا جۇمىس ورنىنا بارىپ تۇرامىن. جىگىتتەرگە قوڭىراۋ شالىپ, كوڭىلدەرىن اۋلاپ, بىراۋىق اڭگىمەلەسەمىن. بارلىعى مەملەكەتتەن قارجىلاي جاردەماقى الدى. قاجەتتى ازىق-تۇلىكتەرىن دە تەگىن جەتكىزىپ بەرىپ جاتىر ەكەن. ءوز باسىم ەشتەڭەدەن تارىعىپ, قامقورلىقتان قاعاجۋ قالىپ جاتقان جوقپىن. وسىدان 10 شاقتى كۇن بۇرىن ەسەپشوتىما 50 مىڭ تەڭگە ءتۇستى. ونىڭ سىرتىندا ازىق-ت ۇلىككە دەپ قوسىمشا اقشا اۋدارىپ جاتىر. ءوزىمنىڭ اي سايىن الاتىن زەينەتاقىم بار. وسىنىڭ بارلىعى مەملەكەت تاراپىنان مۇمكىندىگى شەكتەۋلى جاندارعا جاسالىپ جاتقان ەرەكشە قامقورلىق دەپ بىلەمىن. اسىرەسە مۇمكىندىگى شەكتەۋلى جاندارعا دەگەن ەلدىڭ ىقىلاسى ىستىق, مەملەكەتىمىزدىڭ قامقورلىعى مول. مەنى وسى قۋانتادى.
رۋسلان بايعانين,
رۋدنىي قالالىق مۇمكىندىگى شەكتەۋلىلەر قوعامىنىڭ مۇشەسى
قوستاناي وبلىسى
