ەكونوميكا • 28 ءساۋىر، 2020

لوگيستيكالىق قويمالاردىڭ قاجەتتىگى مەملەكەتتىك دەڭگەيدە مويىندالدى

64 رەت كورسەتىلدى

بىلتىر 150 تەڭگەدەن باستالىپ، كەيىن 80 تەڭگەگە دەيىن تومەندەگەن قىرىق قاباتتى تۇركىستاندىق فەرمەرلەر   بيىل 10 تەڭگەگە دە وتكىزە الماي وتىر.

جۇزدەگەن ديقان ءپىسىپ جەتىلگەن ءونىمىن قايدا ساتارىن بىلمەي وتىر. رەسپۋبليكاداعى ەت ەكسپورتىنىڭ باسىم بولىگى تۇركىستان وبلىسىنان جەتەدى. وڭىردە جىلىجاي شارۋاشىلىعى جولعا قويىلعان.  وڭتۇستىكتىڭ ەڭ باستى ارتىقشىلىعى – كليماتتىڭ  جىلىلىعى. ەرتە پىسكەن ءونىم كورشى ەلدەرگە، ەۋروپاعا ساتىلادى، ودان ءارى اسىپ كەتەدى. تۇركىستاننىڭ وڭتۇستىك اۋداندارىندا وسكەن  قىرىققاباتتار رەسەي اسسا، جازدا ءدامى ءتىل ۇيىرەتىن قاۋىن-قاربىز گەرمانياعا دەيىن جەتەدى. بيىلعى  جاعداي باسقاشا. قازىردىڭ وزىندە شارۋالار جيناعان ونىمدەرىن ساتا الماي وتىر. ادەتتە رەسەيگە وتكىزىپ ۇيرەنگەن ولارعا شەكارا جابىلعان سوڭ قيىن سوققان.  تۇركىستاندا 10 تەڭگەگە وتپەي تۇرعان قىرىققاباتتىڭ الماتىداعى باعاسى –180 تەڭگە.

دۇكەن يەلەرى الماتى نارىعىندا قىرىققابات از بولعاندىقتان، باعانىڭ قىمباتتاپ كەتكەنىن ايتادى. الماتى  دۇكەندەرىندە ساتىلىپ جاتقان قىرىققاباتتىڭ 70  پايىزى وزبەكستاننىڭ يمپورتى. 

تۇركىستان وبلىسىنىڭ اكىمى ومىرزاق شوكەەۆ ۇكىمەت وتىرىسىندا اتاپ وتكەندەي، قازىر فەرمەرلەر 250 مىڭ توننا قىرىققابات جينادى. ال ماقتارالداعى ديحاندار كەشەلى بەرى اكىمدىك قىزمەتكەرلەرى كىمنىڭ قانشا توننا وتكىزەتىنىن حاتقا ءتىزىپ العانىن ايتادى. تىلدەي حاتتامانىڭ قۇدىرەتىنە سەنگەن اعايىندار قىرىققاباتتىڭ بالعىندىعىن ساقتاۋ ءۇشىن ساباعىنان جۇلماي، كوزىنىڭ قاراشىعىنداي ساقتاپ وتىر.

«مۇندا 300 مىڭ توننا قىرىققابات ءوسىرىلدى، بىراق قازىر رەسەيدەن سۇرانىس كۇرت تومەندەدى، ءبىز بارلىق وبلىستارمەن مەموراندۋمدارعا قول قويدىق، بىراق ولار دا قابىلداعان جوق. بىزدە 300 مىڭ توننا قىرىققاباتتى ساتۋ پروبلەماسى بار. ەندى ءبىر كەلى قىرىققاباتتىڭ باعاسى 10-15 تەڭگەگە دەيىن تومەندەدى. مۇمكىن رەسەيلىك لوگيستيكالىق كومپانيالاردىڭ كومەگىمەن بۇل ماسەلەنى شەشۋ كەرەك شىعار؟ قازىر 250 مىڭ توننا قىرىققابات دايىن، ايتپەسە بۇل ۇلكەن ماسەلە بولادى »، - دەدى ومىرزاق شوكەەۆ.

اۋىل شارۋاشىلىعى مينيسترلىگى بۇل ماسەلە بويىنشا جۇمىس ىستەپ جاتقاندىعىن اتاپ ءوتتى.

ء«بىز رەسەي ەلشىلىگىمەن جانە ساۋدا ميسسياسىمەن جۇمىس ىستەيمىز، ولار قازىر ىزدەۋدە. بىراق رەسەيدە كارانتينگە بايلانىستى ءبارى جابىلدى. ءبىز جۇمىس ىستەپ جاتىرمىز »، - دەدى مينيستر.

ءبىز وسىعان دەيىن ەرتە كوكتەمدە وبلىس، اۋدان ورتالىقتارىنان لوگيستيكالىق ورتالىقتار اشىلۋى قاجەتتىگىن جازعانبىز. ىلە-شالا بۇل ماسەلە ۇكىمەت قابىرعاسىندا كوتەرىلىپ، لوگيستيكالىق قويمالاردىڭ قاجەتتىگى مەملەكەتتىك دەڭگەيدە مويىندالدى. ال بۇگىن ساۋدا جانە ينتەگراتسيا ءمينيسترى باقىت سۇلتانوۆ الەۋمەتتىك جەلىدەگى پاراقشاسىندا زاماناۋي كوتەرمە-تاراتۋ ورتالىقتارى (كتو) وزەگى بولۋى ءتيىس ءتيىمدى تاۋار وتكىزۋ جۇيەسىن قۇرۋدى ودان ءارى سوزۋعا بولمايتىنىن ەندى ايتتى.

ء«بىز ناۋرىز ايىندا بولعان جاعدايدان قورىتىندى جاساپ، مەملەكەتكە تيەسىلى كتو-دان ۇلتتىق جەلى قۇرۋىمىز قاجەت(بۇل تۋرالى كوپتەگەن جىلدار بويى اڭگىمە مەن داۋلار جۇرۋدە: مەملەكەت نەمەسە جەكە بيزنەس، قانداي قاراجات ەسەبىنەن جانە كىم باسقارۋعا ءتيىس). جەتەكشى ەۋروپالىق نارىقتىق ەلدەردىڭ تاجىريبەسى كورسەتكەندەي، ءبىز قازىر نارىقتاردا كورىپ وتىرعان، ناتيجەسى اسىرەسە بەلگىلى ءبىر كەزەڭدەردە (ناۋرىز ايىندا بولعانداي) بۇرمالانعان باعا بەلگىلەۋ، تاۋارلاردىڭ ادىلەتسىز ۇستەمە باعالارى جانە ناقتى ءبىر كەزەڭدە باعانىڭ نەگىزسىز ءوسۋى بولىپ تابىلاتىن وليگوپوليانى جويا الامىز» دەيدى مينيستر. 

ءمينيستردىڭ تۇسىندىرۋىنشە، ساقتاۋعا باعدارلانعان كوتەرمە-تاراتۋ ورتالىقتارىنىڭ ءبىرىنشى بەستىگى (پاۆلودار جانە الماتى وبلىستارىندا ەكەۋدەن، تۇركىستان وبلىسىندا بىرەۋ) كۇزگى ەگىندى «ۇستاۋعا» ۇلگەرۋ ءۇشىن جىلدىڭ سوڭىنا دەيىن قۇرىلادى.

«ەگەر ءبارى ءبىز جوسپارلاعانداي بولسا، وندا 2022 جىلدىڭ ورتاسىنا قاراي ەلىمىزدە زاماناۋي قۋاتتىلىقتاعى ساقتاۋ جانە قاجەتتى قۋاتتىلىقتاعى تيەپ-تۇسىرۋلەر قۇرىلاتىن بولادى» دەيدى مينيستر.

سوڭعى جاڭالىقتار

ۇقساس جاڭالىقتار