ءبىرىنشى كەزەكتە تەكسەرۋشى توپتار قازاقستان رەسپۋبليكاسى پرەزيدەنتىنىڭ توتەنشە جاعدايدى ەنگىزۋ ناتيجەسىندە زارداپ شەككەن حالىقتىڭ, شاعىن جانە ورتا بيزنەستىڭ قارىزدارى بويىنشا نەگىزگى بورىش پەن سىياقى سومالارىن تولەۋدى توقتاتا تۇرۋ تۋرالى تاپسىرماسىن ورىنداۋ ماسەلەسىنە نازار اۋدارماق. اۆتوكولىك كەپىلىنە نەسيە بەرۋ كومپانيالارى قاۋىمداستىعىنىڭ پرەزيدەنتى دۋلات تاستەكەەۆتىڭ ايتۋىنشا, وسىنداي تەكسەرىستەر ەلىمىزدىڭ كەيبىر وڭىرلەرىندە باستالىپ كەتتى.
̶ تەكسەرىس بارىسىندا قانداي دا ءبىر ولقىلىقتار انىقتالسا, شارالار قولدانىلاتىنى انىق. ايىپپۇل تولەنۋى يا بولماسا زاڭ تالاپتارىن بۇزعان ۇيىمداردىڭ جابىلۋى دا مۇمكىن. تەك بارلىق تالاپتاردى دۇرىس ساقتاعان ۇيىمداردىڭ بۇل تىزىمگە ىلىگىپ كەتپەگەنى دۇرىس دەپ ەسەپتەيمىن, ̶ دەيدى د.تاستەكەەۆ. ونىڭ ايتۋىنشا كەيىنگى ۋاقىتتا شاعىن قارجى ۇيىمدارىنا تەكسەرىستەر مەن قاتار, زاڭ اياسىندا شەكتەۋلەر دە قاتاڭداعان. قارجى نارىعىن رەتتەۋ جانە دامىتۋ اگەنتتىگىنە بارلىق ميكروقارجى ۇيىمدارىن باقىلاپ وتىرۋ قۇزىرەتى بەرىلدى.
̶ بيىل تىركەۋدەن وتكەن قارجى ۇيىمدارى جۇمىستىن جالعاستىرعان جاعدايدا جىلدىق مولشەرلەمەسى 56 پايىزدان اسپايتىن نەسيە بەرە الادى. ودان ارتىق بەرىلگەن نەسيە زاڭسىز دەپ تانىلادى. بۇعان دەيىن جىلدىق مولشەرلەمەنى لومباردتار 100 پايىزبەن بەرىپ كەلدى. ودان بولەك, حالىقتى قاناپ, 600-700 پايىزبەن نەسيە بەرىپ كەلگەندەر دە بار. سولاردىڭ كەسەرىنەن بارلىق شاعىن قارجى ۇيىمدارى «الاياق اتانىپ», ەندىگى بۇل سالاداعى نارىققا قاتىسۋشىلار سانى كەمۋى, باسەكەلەستىك ورتا ازايۋى مۇمكىن, ̶ دەيدى اۆتوكولىك كەپىلىنە نەسيە بەرۋ كومپانيالارى قاۋىمداستىعىنىڭ پرەزيدەنتى. ونىڭ ايتۋىنشا, جاڭا ەرەجە حالىق ءۇشىن قولايلى بولعانىمەن شاعىن قارجى ۇيىمدارى ءۇشىن ءتيىمسىز بولىپ وتىر. قويىلعان تالاپتى شاعىن ۇيىمداردىڭ كەز-كەلگەنى ورىنداي المايدى. دەسە دە, شاعىن قارجى ۇيىمدارىنىڭ قىزمەت كورسەتۋ مەرزىمى ەكىنشى دەڭگەيلى بانكتەرگە قاراعاندا جىلدام بولعاندىقتان حالىقتىڭ باسىم بولىگى لومباردتاردى جاعالايتىنى بەلگىلى. توتەنشە جاعداي كەزىندە مۇنداي ۇيىمعا جۇگىنگەندەردىڭ جارتىسىنا جۋىعىنىڭ جۇمىسسىز قالۋىنا بايلانىسىتى تولەم قابىلەتى تومەندەپ, قالدىرعان زاتتارىن الا الماعان. دەسە دە, قاۋىمداستىق پرەزيدەنتى ەلدەگى توتەنشە جاعداي كەزىندە لومباردقا جۇگىنگەندەر ءۇشىن ءوسىمپۇل ەسەپتەلىنبەيدى دەپ سەندىردى.
