قازىر الەۋمەتتىك جەلىلەردى پاراقتاي قالساڭىز «نەبارى ون مىڭ تەڭگەگە كولىك ۇتىپ ال», «بەس مىڭ تەڭگەگە بيلەت ساتىپ الىپ باسپانالى بول» دەگەن سىڭايداعى جارنامالاردان كوز سۇرىنەدى. اسىرەسە بۇل ءىستى زاڭ شەڭبەرىندە جۇزەگە اسىرۋعا بولادى دەگەننەن بەرى لوتەرەيا ويناتىپ پايدا تابۋدى ماقسات ەتكەندەردىڭ جاڭبىردان كەيىنگى ساڭىراۋقۇلاقتاي كوبەيگەنى كوپكە ءمالىم. ولاردىڭ كوش باسىندا ەسىمى ەلگە بەلگىلى ونەر ادامدارى مەن تانىمال بلوگەرلەر بار. ۋاقىت وتە كەلە وڭاي بيزنەسكە بوي ۇيرەتكەن ۇيىمداستىرۋشىلار, ۇتىس بيلەتتەرىن ەلگە بەلگىلى ادامداردىڭ اتىنان جاريالاپ, جارناماسى ءۇشىن ولارعا قوماقتى قاراجات تولەيتىن بولعان.
دامىعان مەملەكەتتەردە بۇعان دەيىن-اق ءورىسىن كەڭگە جايعانىمەن, باستاپقىدا ءبىزدىڭ قوعام ءۇشىن بۇل كورىنىس تاڭسىق بوپ كورىنگەنى راس. جارناماسى جەر جارعان مۇنداي ۇتىس ويىندارىنا جۇرت ۇدەرە قاتىسىپ جاتتى. ارمانى تاۋسىلمايتىن قاي ادام وڭاي ولجاعا قارىق بولۋدى قالاماسىن. قوعامدا جاپپاي بەلەڭ العان بۇل ۇردىسكە قارسى ءۇن قاتقان ءبىردى-ەكىلى ازاماتتار «بايدىڭ اسىن قىزعانعان بايقۇس» بولىپ شىعا كەلدى. قىسقاسى, ميلليونداعان اۋديتورياسى بار بلوگەرلەر مەن جۇلدىزدى انشىلەر مۇنداي سىني پىكىرلەرگە دەس بەرە قويعان جوق. ءدىن قىزمەتكەرلەرى دە مۇنىڭ شاريعات رۋحىنا تەرىس ارەكەت ەكەنىن جارىسا جازىپ, ايتۋداي-اق ايتتى. بىراق ناتيجە بولمادى.
جوعارىدا تىلگە تيەك ەتكەن, وقيعاعا ورالايىق. قۇزىرلى ورىننىڭ ءباسپاسوز قىزمەتى مالىمدەگەندەي, اتالعان توپ بيىلعى جىلدىڭ 23 اقپانى مەن 23 ءساۋىرى ارالىعىندا قۇندى ۇتىس سىيلىقتارىن - ياعني 4 اۆتوكولىك (2 سەدان جانە 2 جول تالعامايتىن دجيپ), الماتى قالاسىندا ءبىر بولمەلى پاتەر جانە باسقا دا تۇرمىستىق تەحنيكانى ويناتپاق بولىپ, جالعان لوتەرەيا ويىنىن ۇيىمداستىرعان. الايدا, جوعارىدا كورسەتىلگەن قۇندى سىيلىقتار بولماعان. ولار باعىن سىناماق بولعان بۇقارانى سەندىرۋ ءۇشىن ءتورت بىردەي اۆتوكولىكتى جەكە تۇلعالاردان جالعا العاندىعى بەلگىلى بولدى. ەڭ سوراقىسى, الەۋمەتتىك جەلىلەردە جۇرگىزىلگەن جارناما ارقىلى قۇنى 9 900 تەڭگە تۇراتىن 20 مىڭ دانادان استام ويىن بيلەتى ساتىلعان. ينستاگرام پاراقشاداعى تىكەلەي جەلى ارقىلى كوپتىڭ كوز الدىندا وربىگەن ويىندا ۇيىمداستىرۋشىلار الدىن الا بەلگىلەنگەن ۇتىس بيلەتتەرى ەنگىزىلىپتى.
«الماتىدا 12 ادام ءبىر عيماراتقا جينالىپ ۇتىس ويىنىن ۇيىمداستىرعان. لوتەرەيا ويىنىن وتكىزگەندەر توتەنشە جاعداي شەكتەۋىن بۇزعانى ءۇشىن اكىمشىلىك كودەكستىڭ 476-بابى بويىنشا جاۋاپكەرشىلىككە تارتىلدى. جينالعاندار ونلاين ترانسلياتسيا جۇرگىزگەن. قازىرگى تاڭدا, قىلمىستىق كودەكستىڭ 190-بابىنىڭ 2-بولىگى 1-تارماعى بويىنشا (الاياقتىق, ادامدار توبىنىڭ الدىن الا ءسوز بايلاسۋى) بىرقاتار ازاماتقا قاتىستى سوتقا دەيىنگى تەرگەۋ امالدارى جۇرگىزىلىپ جاتىر», - دەپ حابارلادى الماتى قالالىق ەكونوميكالىق تەرگەۋ دەپارتامەنتىنىڭ ءباسپاسوز قىزمەتى.
«اڭقاۋ ەلگە ارامزا مولدا» بولعاندار زاڭ الدىنا جاۋاپ بەرە جاتار. اتالعان ماسەلەلە قوعام تالقىسىنا تاستالعاندا «قايىرىمدىلىق ماقساتتى كوزدەدىك» دەپ اقتالاتىندار از ەمەس. دەگەنمەن, بىرجاقتى پىكىر ايتۋدان اۋلاقپىز. ءادىلى اللاعا ءمالىم. الايدا مۇنداي ارزان ىسكە اۋەستەنگەندەر زاڭعا دا, ارعا دا سۇيەنسە دەيسىڭ.
