ايرىقشا مەرەكە بيىل بەس قۇرلىقتان 100-دەن استام بالانىڭ باسىن قوسقان ونلاين كونفەرەنتسيا فورماتىندا وتكىزىلدى. ونلاين ترانسلياتسيانى ءبىر ساتتە تۇركيا جانە ءازىربايجان ەلدەرىنىڭ ءبىلىم مينيسترلەرى, 50 ەلدىڭ وكىلەتتى ەلشىلەرى, سونداي-اق, الەمنىڭ تۇكپىر-تۇكپىرىنەن 150 مىڭعا جۋىق كورەرمەن تاماشالادى.
حالىقارالىق مەكتەپتىڭ 4 «ا» سىنىپ وقۋشىلارى الديار تۋماشينوۆ پەن ابۋلحاير قۋانىش 23 ەلدىڭ بالالارىمەن قوسىلىپ «Hayat Bayram Olsa» اتتى تۇرىك ءانىن شىرقادى.
وسى ورايدا ەلوردامىزدىڭ تورىندە وتىرىپ, كۇللى الەمگە تەبىرەنە ءان شىرقاعان زياتكەرلەرىمىز قۋانىشىمەن ءبولىسىپ, پىكىر بىلدىرگەن ەدى:
– مەرەكەگە وراي الەمنىڭ ءار ەلىندەگى ءوزىمىز سەكىلدى بالالارمەن ءان ايتۋ تۋرالى ۇسىنىس تۇسكەندە قاتتى قۋاندىم. بىردەن كەلىسىمىمدى بەردىم. تۇرىك ءتىلى قازاق تىلىنە ۇقساس بولعاندىقتان, ءاننىڭ ءماتىنى ەش قيىندىق تۋعىزعان جوق. ءارى بۇرىننان تانىس ءانىمىزدىڭ ءساتتى شىعاتىنىنا كامىل سەندىم. كوپتەگەن مەملەكەتتىڭ بالالارى ونلاين كونفەرەنتسيادا باس قوسادى, قازاقستانىمىزدىڭ ءبىر نىشانى بايقالىپ تۇرسىن دەپ ۇلتتىق ناقىشتاعى كەۋدەشەمدى كيىپ الدىم, – دەيدى الديار تۋماشينوۆ.
ال ابۋلحاير قۋانىشتىڭ ايتۋىنشا, مۇنداي الەمدىك دەڭگەيدەگى ۇلكەن شاراعا قاتىسۋ – شاتتىق سىيلاپ قانا قويمايدى, جاۋاپكەرشىلىكتى دە تالاپ ەتەدى:
– ونلاين وتەتىن كونفەرەنتسياعا ۇلكەن جاۋاپكەرشىلىكپەن دايىندالدىم. ءاننىڭ ءسوزىن بىرنەشە مارتە قايتالاپ, مۋزىكاسىنا سالىپ شىرقاپ تا كوردىم. سونىمەن قاتار, قاتىسۋشى رەتىندە ءوزىمدى قالاي تانىستىراتىنىمدى ويلاستىردىم. جانىما ەگەمەندىگىمىز بەن تۇتاستىعىمىزدىڭ سيمۆولى كوك تۋىمىزدى قويىپ, كۇش-قۋات العانداي بولدىم. ناتيجەسىندە, ءاندى ءبارىمىز بىرگە ءساتتى شىرقاپ, بالالار مەرەكەسىن اتاپ وتۋگە ۇلەسىمىزدى قوستىق, – دەيدى زياتكەر.
بۇل حالىقارالىق مەكتەپتىڭ نۇر-سۇلتان قالاسىنداعى يۋنۋس ەمرە اتىنداعى تۇرىك مادەنيەت ورتالىعى ۇيىمداستىرعان اۋقىمدى شارالارعا العاش قاتىسۋى ەمەس. سەبەبى, ءبىلىم ورداسى بۇعان دەيىن دە حالىقارالىق باكالاۆريات باعدارلاماسى اياسىندا بىرلەسىپ جۇمىستار اتقارعان. بۇل جونىندە حالىقارالىق مەكتەپتىڭ باستاۋىش سىنىپ مۇعالىمى اديا ۋۆاليەۆا وي بولىسكەن بولاتىن:
– يۋنۋس ەمرە ينستيتۋتىمەن ءبىز وتكەن جىلدان بەرى بايلانىس جاساپ كەلەمىز. بىلتىرعى وقۋ جىلىندا حالىقارالىق باكالاۆريات باعدارلاماسىنىڭ «الەم حالىقتارىنىڭ سالت-داستۇرلەرى» ءيۋنيتى بويىنشا ينستيتۋتقا بالالارمەن ارنايى بارىپ, تۇرىك حالقىنىڭ مادەنيەتىمەن, ادەت-عۇرىپتارىمەن, تاريحىمەن تانىسقان بولاتىنبىز. بالالاردىڭ بۇگىندە الەمدىك دەڭگەيدەگى شارالارعا قاتىسىپ, وزگە ەلدىڭ ءتىلى مەن مادەنيەتىن سىيلاۋى, تۇپتەپ كەلگەندە مەكتەپ قابىرعاسىندا بەرىلەتىن تەرەڭ ءبىلىم مەن تاربيەنىڭ ناتيجەسى ەكەندىگى انىق. ءبىزدىڭ مەكتەبىمىز – جوعارى ادامگەرشىلىك قۇندىلىقتارى قالىپتاسقان, ءوز ەلىنىڭ مادەنيەتىن باعالاي بىلەتىن جانە وزگەلەردىڭ مادەنيەتىن قۇرمەتتەيتىن, ءومىر بويى ءبىلىم الا وتىرىپ, الەمدى وركەندەتۋگە ۇلەس قوسۋعا دايىن, دەنى ساۋ, زياتكەر, شىعارماشىل, تابىستى تۇلعانى تاربيەلەۋ ميسسياسىن قالتقىسىز ورىنداپ كەلەدى دەپ سەنىممەن ايتا الامىن دەيدى, – ۇستاز.
نۇر-سۇلتان قالاسىنداعى يۋنۋس ەمرە ينستيتۋتى تۇرىك مادەنيەت ورتالىعىنىڭ رەسمي بولىمشەسى بولىپ تابىلادى. بۇگىندە اتالمىش ورتالىقتىڭ شەتەلدەردە 50-گە تارتا مادەني ينستيتۋتتارى بوي كوتەرگەن. ينستيتۋت ءبىلىم بەرۋ ورتالىقتارىندا تۇرىك ءتىلىن ۇيرەتۋمەن قاتار, ءار ەلدەگى مەكتەپتەرمەن, ءبىلىم وشاقتارىمەن اكادەميالىق ىنتىماقتاستىق ورناتىپ, الەمدىك دەڭگەيدەگى شارالاردىڭ ۇيىمداستىرىلۋىنا مۇرىندىق بولىپ كەلەدى. ونى دالەلى – بۇگىنگى ۇلتتىق ەگەمەندىك جانە بالالار مەرەكەسى.
الماتى
