قازاقستان • 28 ءساۋىر، 2020

گاۋحار الدامبەرگەنوۆا: ۇتىمدى ىستەر ورگە باستايدى

19 رەت كورسەتىلدى

قازاق ۇلتتىق قىزدار پەداگوگيكالىق ۋنيۆەرسيتەتىنىڭ رەكتورى، پەداگوگيكا عىلىمدارىنىڭ دوكتورى، پروفەسسور گاۋحار الدامبەرگەنوۆا قازاقستان پرەزيدەنتى قاسىم-جومارت توقاەۆتىڭ مالىمدەمەسىنە قاتىستى پىكىر ءبىلدىردى. وقۋ ورنىنىڭ باسشىسى ءوز پىكىرىن الەۋمەتتىك جەلىدەگى جەكە پاراقشالارىندا جاريالادى، دەپ حابارلادى ۋنيۆەرسيتەتتىڭ ءباسپاسوز قىزمەتى.

«بۇگىن مەملەكەت باسشىسى قاسىم-جومارت كەمەل ۇلى ەلىمىزدەگى كوروناۆيرۋس ىندەتىنە قاتىستى وتانداستارىمىزعا ارنايى مالىمدەمە جاريالادى. الەمگە، جالپى ادامزاتقا قاۋىپ ءتوندىرىپ وتىرعان دەرتتىڭ الدىن-الۋ، اۋرۋدىڭ كەڭىنەن تارالماۋىنا جول بەرمەۋ ماقساتىندا ەلىمىزدە ناقتى ءارى ۇتىمدى شارالار قولعا الىنعانى بارشاڭىزعا بەلگىلى. بۇل – ازاماتتاردىڭ دەنساۋلىعىن ساقتاپ، ولاردىڭ ءومىرىن قورعاپ قالۋ ورايىندا قابىلدانعان باتىل باستامالار ەدى.

وسىنداي قيىن-قىستاۋ ۋاقىتتا قازاقستاندىقتار ء«بىر جاعادان باس، ءبىر جەڭنەن قول شىعارىپ»، ۇيىمشىلدىق تانىتا ءبىلدى. بۇل قوعامىمىزدىڭ كەمەلدەنگەنىن ءھام جاڭعىرعانىن ايعاقتاسا كەرەك-ءتى. مىنە، پرەزيدەنت ءوز مالىمدەمەسىندە وسى جايت تۋراسىندا كەڭىنەن اتاپ ءوتتى.

سونىمەن قاتار ول كارانتين جاعدايىندا تۇراقتى تابىسىنان ايىرىلعان ەل تۇرعىندارىنا قولداۋ كورسەتىلىپ كەلە جاتقاندىعىن جانە مۇنداي يگىلىكتى ءىس الداعى ۋاقىتتا دا جالعاسىن تابا بەرەتىندىگىن تىلگە تيەك ەتتى.

مەملەكەت باسشىسى كەلەشەكتە ەل ەكونوميكاسىن قۋاتتاندىرۋ جولىنداعى قارىشتى قادامدار توڭىرەگىندە دە باياندادى. «بۇگىندە ەلىمىز دامۋدىڭ جاڭا دەڭگەيىنە قادام باسىپ وتىر. شىن مانىندە، ءبىز ەندى مۇلدە جاڭا جاعدايدا ومىر سۇرەتىن بولامىز. سوندىقتان ەكونوميكاعا جانە مەملەكەتتىك باسقارۋ جۇيەسىنە اۋقىمدى ءارى ماڭىزدى وزگەرىستەر قاجەت»، دەدى قاسىم-جومارت كەمەل ۇلى.

سونداي-اق ول جوعارى وقۋ ورىندارى، كوللەدجدەر مەن مەكتەپتەر قاشىقتان وقىتۋدى جالعاستىرا بەرەتىندىگىن مالىمدەدى.

وسى ورايدا استىن سىزىپ اتاپ وتەتىن ءبىر جايت بار.

بۇگىندە ءبىلىم جانە عىلىم ءمينيسترى اسحات قانات ۇلى مەن ول باسقارىپ وتىرعان ۆەدومستۆو ۇجىمىنىڭ ۇتىمدى ۇيىمداستىرۋىنىڭ ناتيجەسىندە ەلىمىزدە قاشىقتان وقىتۋ جۇيەلى جۇرگىزىلۋدە. اتقارىلعان ىستەر از ەمەس. بار نارسەنى بار دەگەن ءلازىم بولاتىن شىعار دەپ ويلايمىن.

ەلىمىزدە توتەنشە جاعداي جاريالانعان ۋاقىتتان باستاپ قازاق ۇلتتىق قىزدار پەداگوگيكالىق ۋنيۆەرسيتەتى دە بىرقاتار جوبالاردى جۇزەگە اسىرىپ كەلەدى.

بىرىنشىدەن، ستۋدەنتتەر، ماگيسترانتتار مەن دوكتورانتتارعا ءبىلىم بەرۋ ۇزدىكسىز ىسكە اسىرىلۋدا. بۇل ورايدا وقۋ ورنىنىڭ پروفەسسور-وقىتۋشىلار قۇرامىنىڭ ەرەن ەڭبەگىن ەرەكشە اتاپ وتكىم كەلەدى.

ەكىنشىدەن، ءبىلىم الۋشىلارعا جەدەلدەتىلگەن ادىستەمەلىك كومەك كورسەتۋ ماقساتىندا «اكادەميالىق ساعات» جوباسى باستاۋ الدى. ماقسات – ۋنيۆەرسيتەتتىڭ وقىتۋشىلارى، ءبىلىم الۋشىلارى جانە اكىمشىلىك قىزمەتكەرلەرىمەن قاشىقتان وقۋ بويىنشا تىعىز بايلانىس جاساۋ. «اكادەميالىق ساعات» كەزىندە ءبىلىم الۋشىلار پرورەكتورلارعا، دەكاندارعا، كافەدرا مەڭگەرۋشىلەرىنە قاشىقتان وقىتۋ بارىسىندا تۋىنداپ جاتقان سۇراقتاردى قويا الادى.

ۇشىنشىدەن، «تسيفرلى ۆولونتەر» جوباسى. ول پروفەسسور-وقىتۋشىلارعا ادىستەمەلىك جانە اقپاراتتىق كومەك كورسەتۋگە باعىتتالعان.

تورتىنشىدەن، ۋنيۆەرسيتەتتە پسيحولوگيالىق قولداۋ قىزمەتى اشىلدى. وقۋ ورنىنىڭ بىلىكتى پسيحولوگ ماماندارىنان قۇرىلعان توپ كارانتين ۋاقىتىندا ەل تۇرعىندارىن قولداۋ ماقساتىندا جانە ءوز-ءوزىن وقشاۋلاۋ سيتۋاتسياسىندا سترەسستىك جاعدايعا ءتۇسۋدىڭ الدىن الۋ بويىنشا كەڭەستەر بەرەدى. قىزمەتتەردىڭ بارلىعى تەگىن. بارلىق اقپاراتتار ۋنيۆەرسيتەتتىڭ رەسمي ينتەرنەت رەسۋرسى مەن الەۋمەتتىك جەلىدەگى رەسمي پاراقشالارىندا جاريالانعان.

ءسوزىمدى مەملەكەت باسشىسىنىڭ ەستە ۇستارلىق مىنا ءبىر سوزىمەن اياقتاعىم كەلىپ وتىر: «بۇل داعدارىس بىرلىگى بەكەم، ەلىن سۇيەتىن وتانشىل جۇرت ەكەنىمىزدى كورسەتتى.  قاشاندا وسىلاي ۇلت بولىپ ۇيىسا بىلسەك، بارلىق ماقساتىمىزعا قول جەتكىزەمىز. وعان ەشقانداي كۇمان جوق.  ەلدىڭ قامى ءۇشىن باستاعان ءىسىمىز قايىرلى بولادى دەپ سەنەمىن!  حالقىمىز  «بەرەكە باسى – بىرلىكتە» دەيدى.  جۇدىرىقتاي جۇمىلساق، كەز كەلگەن قيىندىقتى جەڭەمىز!»، – دەپ جازدى گاۋحار الدامبەرگەنوۆا.

سوڭعى جاڭالىقتار

ۇقساس جاڭالىقتار