ايماقتار • 27 ءساۋىر، 2020

قاراعاندى وبلىسى: كارانتيننىڭ كەزەكتى «قىزىقتارى»

337 رەت كورسەتىلدى

قاراعاندى وبلىسىندا كارانتين ءتارتىبىنىڭ كۇشەيگەنىنە قاراماستان، ىندەتتىڭ شەڭگەلىنە ىلىككەندەر ازايار ەمەس. بۇگىنگى كۇندى ساناعاندا، «جامان تۇماۋ» جۇقتىرعاندار سانى 128 ادامعا جەتتى. ازىرگە داتكە قۋات بولىپ تۇرعانى، بۇگىن التى ادام اۋرۋحانادان ايىعىپ شىقتى. ساناپ بەرسەك، وبلىستاعى جازىلعانداردىڭ سانى 43 ادام بولىپتى. شۇكىر... مىنە، قۋانىشى مەن رەنىشى وسىلاي الماسقان كارانتيننىڭ «قىزىعى» مەن «شىجىعى» دا تاۋسىلار ەمەس.

كارانتيندە قىز الىپ قاشقان

«مەن ۇرلىق قىلعاندا اي جارىق بولادى» دەگەن ءسوز قاراعاندى وبلىسىنداعى بۇقار جىراۋ اۋدانىنىڭ تۇرعىنىنا قاراتا ايتىلعان با دەپ قالاسىڭ.

ۆۆ

الگى سابازدىڭ وزىنە دە وبال جوق. ءسوز بايلاسقان قالىڭدىعىن زاماننىڭ تىنىش كەزىندە ەمەس، تۋرا كارانتيننىڭ قىزعان شاعىندا الىپ قاشام دەپ باسى داۋعا قالدى.

وقيعا بىلاي بولعان ەكەن: كومەكەي اۋليە اتىنداعى اۋداندا تۇراتىن بۇل سۇربويداق ءوزىنىڭ جەكەمەنشىك «اۋدي» ماركالى كولىگىنىڭ جۇكسالعىشىنا 34 جاستاعى قالىڭدىعىن ەكى بۇكتەپ تىققان دا، سانيتارلىق بلوك-بەكەتتەن زىپ بەرىپ ءوتىپ كەتپەكشى بولعان عوي...

توتەنشە جاعدايدىڭ ءتارتىبى قاتاڭ: جىگىت تە، قالىڭدىق تا 27 مىڭ 780 تەڭگە ايىپپۇل ارقالاپ، ۇيلەرىنە قايتىپتى. وتقا ماي قۇيىلماعان... وتاۋ تىگۋ دە كەيىنگە قالعانعا ۇقسايدى...

 

ماسكانىڭ باسقا «ماقساتى»

كارانتينننىڭ كەزىندە قانى جەرگە تامباي تۇرعان ءبىر زات بولسا، ول – مەديتسينالىق ماسكا. امال جوق، ادامنىڭ تاعدىرى وسى ءبىر جاپىراق شۇبەرەككە بايلاندى دا قالدى...

پپپ

بىرەۋ بۇل بەتپەردەنى «بالەكەتتى» جۇقتىرىپ المايىن دەپ تاقسا، قاراعاندىلىق ەكى تۇرعىن ماسكانى باسقا ماقساتقا پايدالانعان ەكەن. ولار قارا ماتادان تىگىلگەن بەتپەردە كيىپ، كەنشىلەر استاناسىنداعى سۋپەرماركەتتەردىڭ بىرىنە تۇسكەن. باۋكەسپە ۇرىلار دابىلقاققىشتى ەبىن تاۋىپ ءسوندىرىپ، كاسسادا قالعان اقشانى كوك تيىنىن دا قالدىرماي ۇپتەپ كەتىپتى.

راس، ۇرىلاردىڭ دۇكەن ىشىندەگى ء«ىسى» بەينە كامەراعا ءتۇسىپ قالعان ەكەن. بىراق، ءىز كەسۋشىلەر تۇمشالاعان ماسكانىڭ كەسىرىنەن ولاردىڭ ءتۇر-ءتۇسىن انىقتاي الماي وتىر.

 

كارانتين ەگيپەت ەمەس...

ەگيپەتتە بولىپ، ەستەن كەتپەس دەمالىس كۇندەرىن وتكىزىپ قايتقان قاراعاندىلىق جۇپ دارىگەرلەردىڭ تەكسەرۋدەن ءوتۋ كەرەكتىگىن ايتقان ەسكەرتپەسىن قۇلاققا دا قىستىرماعان. ناقتىراق ايتقاندا، ولار اۋرۋحاناعا بارىپ، ءتارتىپ بويىنشا ەكى اپتاعا سوزىلاتىن كارانتينگە جاتۋدان باس تارتقان. قىسقاسى، «باسىمىزدى قاتىرماڭدار، ءبىز ساۋمىز»، دەگەن عوي...

پپ

ايتقانعا كونبەگەن سوڭ امال بار ما، ءتارتىپ ساقشىلارى مەن دارىگەرلەر الگىلەرگە وكىمەتتىڭ قۇرىعىنىڭ قانشالىقتى ۇزىن ەكەندىگىن كورسەتكەن. ەگيپەتتەن كەلگەن ەكەۋ تۇراتىن كوپقاباتتى ۇيگە ءورت سوندىرگىش ماشينانى تىرەپ قويعان دا، ساتىسىن بالكونعا ءبىر-اق كىرگىزگەن عوي.

سوندا عانا جاراسىمدى جۇپ كەرەك-جاراعىن جىلدام جيىپ، پاتەردەن اتىپ شىققان. توتەنشە جاعدايدىڭ تارتىبىمەن ويناۋعا بولمايدى!

 

 

قاراعاندى وبلىسى

سوڭعى جاڭالىقتار

ۇقساس جاڭالىقتار