ءال-فارابي اۋدانىنىڭ اۋماعىندا سالىنىپ جاتقان بالالار الاڭشاسىنىڭ قۇرىلىسىمەن تانىسقان قالا اكىمى مۇرات ايتەنوۆ ساپاعا ايرىقشا ءمان بەرۋدى تاپسىردى. مەردىگەر كومپانيانىڭ وكىلدەرىنە تۇرعىنداردىڭ ۇيىندە وتىرعان ءساتىن ۇتىمدى پايدالانىپ, قۇرىلىستى ۋاقتىلى ءارى ساپالى اياقتاۋدى جۇكتەدى.
ءبىر قۋانارلىعى, قۇرىلىسقا قاجەتتى زاتتاردىڭ بارلىعى - وتاندىق. ءتىپتى ويىن الاڭشاسىنا توسەلەتىن رەزەڭكە توسەنىشتىڭ ءوزى شىمكەنتتە جاسالادى ەكەن.
ءال-فارابي اۋدانىنداعى 672 كوپقاباتتى تۇرعىن ءۇي الدىندا 400 اۋلا بار. ونىڭ باسىم بولىگىنە بالالار الاڭشاسى سالىنعان. 161-ىنە قاجەتتىلىك تۋىنداعان.
وسىعان وراي, مەملەكەتتىك جانە جەكەمەنشىك ارىپتەستىك اياسىندا بيىل اۋدان بويىنشا 100 بالالار الاڭشاسى سالىنۋدا. قالعانىنىڭ قۇجاتتارى قارالۋدا. بۇعان قوسا سپورت الاڭشالارى دا جوندەلمەك.
اۋدان اكىمى عابيت ماۋلەنقۇلوۆتىڭ ايتۋىنشا, اۋداندا 15 گۇلزار مەن اللەيا سالۋ جۇمىسى دا قارقىندى ءجۇرىپ جاتىر.
ساپار بارىسىندا قالا اكىمى ا.اسقاروۆ كوشەسىندەگى 9-ءۇيدىڭ قازىرگى احۋالىمەن تانىستى. تۇرعىندار وتىنىشىنە قۇلاق اسقان مۇرات ايتەنوۆ ساراپتاما جۇرگىزىپ, قاجەتتىلىك بولسا, كۇردەلى جوندەۋ جۇمىستارىن جۇرگىزۋدى جاۋاپتىلارعا جۇكتەدى.
