زاڭ جوباسىنا جاۋاپتى سەناتور س.ەڭسەگەنوۆ «قازاقستان رەسپۋبليكاسىندا بەيبىت جينالىستاردى ۇيىمداستىرۋ جانە وتكىزۋ ءتارتىبى تۋرالى» زاڭىنىڭ جوباسىن ازىرلەۋ كەزىندە حالىقارالىق تاجىريبەلەر مۇقيات زەردەلەنىپ, ەسكەرىلگەنىن اتاپ ءوتتى. سەناتور سونداي-اق بۇل زاڭ جوبالارى قازاقستان رەسپۋبليكاسى ازاماتتارىنىڭ كونستيتۋتسيادا بەكىتىلگەن بەيبىت جانە قارۋسىز جينالىپ, پيكەتكە شىعۋ, جينالىس, ميتينگىلەر, دەمونستراتسيا جانە شەرۋ وتكىزۋ كەزىندەگى تۋىندايتىن قوعامدىق قاتىناستاردى رەتتەۋگە باعىتتالعانىن جەتكىزدى.
«زاڭدا بەيبىت جينالىستاردى ۇيىمداستىرۋ جانە وتكىزۋدىڭ نەگىزگى قاعيداتتارى بەلگىلەنگەن. ولار بىرىنشىدەن زاڭدىلىق, بەيبىت جينالىستارعا ازاماتتاردىڭ قاتىسۋىنىڭ ەرىكتىلىگى, بەيبىت جينالىستار وتكىزۋ كەزىندە كۇش قولدانباۋ سيپاتىندا بولۋى, بەيبىت جينالىستاردى وتكىزۋ پايداسىنا پرەزۋمپتسياسى جانە تاراپتاردىڭ جاۋاپكەرشىلىگى, مەملەكەتتىك قاۋىپسىزدىكتى, قوعامدىق ءتارتىپتى, دەنساۋلىق ساقتاۋدى, باسقا ادامداردىڭ قۇقىقتارى مەن بوستاندىقتارىن قامتاماسىز ەتۋى», - دەدى س.ەڭسەگەنوۆ.
سونىمەن بىرگە زاڭ جوباسىندا بەيبىت جينالىستار تۇرلەرىن وتكىزۋگە قاتىستى ەرەجەلەر بەلگىلەنگەن. ياعني, پيكەتكە شىعۋ, جينالىس جانە ميتينگى وتكىزۋ ءۇشىن جەرگىلىكتى اتقارۋشى ورگانداردىڭ كەلىسىمى قاجەت ەتىلمەيدى. بەيبىت نىساندا وتەتىن شارالار بويىنشا جەرگىلىكتى اتقارۋشى ورگاندارعا حابارلاما عانا جولدانادى. ال ميتينگى جانە شەرۋ وتكىزۋ ءۇشىن جەرگىلىكتى اتقارۋشى ورگاندارعا كەلىسىم الۋ ءۇشىن ءوتىنىش بەرىلەدى.
سەناتور زاڭ جوباسىندا بەيبىت جينالىستاردى وتكىزۋگە قاتىستى حابارلاما, ءوتىنىش بەرۋ جانە ولاردى قاراۋ مەرزىمى ناقتىلانعانىن ايتا كەلىپ, جەرگىلىكتى وكىلدى ورگاندار بەيبىت جينالىستاردى وتكىزۋ ءۇشىن ارنايى ورىن بەلگىلەۋى قاجەت ەكەنىن جانە ول ورىندار ەلدى مەكەندەردىڭ شەتىندە ەمەس, ورتالىقتارىندا بولۋى زاڭدا ناقتى جازىلعانىن حابارلادى.
س.ەڭسەگەنوۆ «قازاقستان رەسپۋبليكاسىندا بەيبىت جينالىستاردى ۇيىمداستىرۋ جانە وتكىزۋ ءتارتىبى تۋرالى» زاڭ جوباسىنا قوسىمشا ىلەسپە زاڭ دا دايىندالعانىن اتاپ ءوتتى. «ىلەسپە زاڭ قولدانىستاعى زاڭناماعا وزگەرىستەر مەن تولىقتىرۋلار ەنگىزۋدى كوزدەيدى. ياعني, 3 كودەكس پەن 8 زاڭعا وزگەرىستەر ەنگىزىلەدى. بۇل ەنگىزىلەتىن وزگەرىستەر «قازاقستان رەسپۋبليكاسىندا بەيبىت جينالىستاردى ۇيىمداستىرۋ جانە وتكىزۋ ءتارتىبى تۋرالى» زاڭدا كوزدەلگەن شارالاردى ىسكە اسىرۋعا باعىتتالعان», - دەدى سەناتور.
