دەپارتامەنت وسى جىلعى ناۋرىزدىڭ باسىندا جەرگىلىكتى اتقارۋشى ورگاندارمەن بىرلەسىپ, سۋ تاسقىنى قاۋىپى باسىم اۋداندارعا قوسىمشا كۇش جۇمىلدىرۋ تۋرالى شەشىم قابىلداعان بولاتىن. ءوڭىردىڭ ءتورت اۋدانىنا ءتيىستى شارالار ۇيىمداستىرۋ ءۇشىن 142 قۇتقارۋشى جىبەرىلدى.
–توتەنشە جاعدايلار دەپارتامەنتى جەرگىلىكتى اتقارۋشى ورگاندارمەن بىرلەسىپ, سۋ تاسقىنى كەزەڭىندە اپاتتان قۇتقارۋ جۇمىستارىن جۇرگىزۋ ءۇشىن ۇلكەن كۇش جۇمىلدىردى. اتاپ ايتقاندا, 2410 ادام, 1058 تەحنيكا, 60 سۇڭگۋىرشى, 251 موتوپومپا سۋ باسۋ قاۋپى جوعارى ايماقتارعا جىبەرىلدى. اسىرەسە, بيىلعى جىلى استراحان, اتباسار, ارشالى, تسەلينوگراد اۋداندارىنداعى جاعداي اسا كۇردەلى بولدى. قۇتقارۋشىلارعا قالىپتاسقان توتەنشە جاعدايدى جويۋ مىندەتى قويىلدى. اتقارىلعان جۇمىس زايا كەتپەي, سۋ دەڭگەيى تومەندەپ, قۇتقارۋشىلار كەرى قايتۋدا. اقمولالىق قۇتقارۋشىلار مەن جەرگىلىكتى اتقارۋشى ورگانداردىڭ بىرلەسكەن ارەكەتىنىڭ ناتيجەسىندە ءبىر دە ءبىر ءۇيدى سۋ باسۋىنا جول بەرىلمەگەنىن اتاپ وتكىم كەلەدى, دەيدى اقمولا وبلىسى توتەنشە جاعدايلار دەپارتامەنتىنىڭ باستىعى الەكسەي سوۆەتوۆ.
سونداي-اق استراحان اۋدانىنداعى ستارىي كولۋتون سەلوسىنىڭ تۇرعىنى پەتر پودوكسەنوۆ جۇرتشىلىق اتىنان جازىلعان حاتىندا ەل العىسىن بىلايشا ءبىلدىرىپتى: «توتەنشە جاعداي قىزمەتكەرلەرىنە شىن جۇرەكتەن العىسىمىزدى بىلدىرەمىز.ولار تىنباستان تاۋلىك بويىنا سۋ تاسقىنىنا باقىلاۋ جاساپ, ۇيلەردىڭ اينالاسىنا قۇمنان بوگەندەر قويدى. وزەن ەرنەۋىنەن اسىپ, ۇيلەرگە تاياپ قالعان سۋعا توسقاۋىل قويىپ, قاۋىپتىڭ بەتىن قايتاردى».
تابيعات اپاتىمەن ەكى اي بويى كۇرەسىپ, جۇكتەلگەن مىندەتتەردى اسا زور جاۋاپكەرشىلىكپەن ورىنداعان قۇتقارۋشىلاردى جەرگىلىكتى اتقارۋشى ورگاندار قۇرمەت گراموتالارىمەن ماراپاتتالدى.
