– «ەمبىمۇنايگاز» اق-دا ەرىكتىلەر قىزمەتى جولعا قويىلعان. بۇل جولى كومپانيا ۇجىمى كارانتيندەگى مەديتسينا جانە پوليتسيا قىزمەتكەرلەرىنە ماتەريالدىق كومەك كورسەتۋگە قولداۋ ءبىلدىردى. وسى ماقساتتا كومپانيانىڭ باسقارۋ اپپاراتىنىڭ باسشىلىق قۇرامى مەن «مۇنايشى قىز» كلۋبىنىڭ مۇشەلەرى جەكە قاراجاتى ەسەبىنەن 1 ميلليون تەڭگەدەن استام اقشا جينادى. بۇل قاراجات جوعارىدا اتالعان سالا قىزمەتكەرلەرىن قولداۋ رەتىندە اۋدارىلادى, - دەدى «ەمبىمۇنايگاز» اق باسقارما توراعاسىنىڭ ورىنباسارى, «مۇنايشى قىز» ايەلدەر كلۋبىنىڭ توراعاسى رىستى تاسماعامبەتوۆا.
كومپانيانىڭ قوعاممەن بايلانىس قىزمەتىنىڭ حابارلاۋىنشا, بۇعان دەيىن «ەمبىمۇنايگاز» اق وبلىس اكىمدىگىنىڭ سۇرانىسىمەن اتىراۋ قالاسىنىڭ بەرەكە ىقشاماۋدانىنداعى تۇرعىن ۇيلەردە وقشاۋلانعان ازاماتتاردى تۇرمىستىق بۇيىمدارمەن, ازىق-ت ۇلىكپەن, سونداي-اق, كۇندەلىكتى تۇتىنۋعا قاجەتتى زاتتارمەن قامتاماسىز ەتۋگە دەمەۋشىلىك جاسادى. سونىمەن بىرگە, سوڭعى بەس جىلدا كومپانياداعى ەرىكتىلەر قىزمەتىنىڭ باستاماسىمەن قازاقستاندىق كوپبالالى 21 وتباسى تۇرعىن ۇيمەن قامتىلدى. ال, بىلتىر بۇل ۇجىم رەسپۋبليكالىق «ارىس. ءبىز بىرگەمىز!» اكتسياسىنا قاتىسىپ, ارىس قالاسىنداعى از قامتىلعان كوپبالالى وتباسىلاردىڭ 400-دەن استام وقۋشىسىنا مەكتەپكە قاجەتتى قۇرالدار مەن كيىم-كەشەكتەر الىپ بەرگەن ەدى. مۇنداي كومەكتى اتىراۋ قالاسى مەن اۋداندارداعى الەۋمەتتىك از قامتىلعان وتباسىلاردىڭ 70 بالاسى العان.
