الەمدەگى چەرنوبىل سياقتى تاعى ءبىر قاۋىپتى ايماق تىنىق مۇحيتىندا ورنالاسقان مارشالل ارالدارى. بۇل اۋماقتا 1946 جىلدان 1960 جىلعا دەيىن امەريكانىڭ اسكەريلەرى يادرولىق قارۋ سىناعىن جۇرگىزگەن. بيكيني جانە ەنيۆەتوك ارالدارىندا 67 يادرولىق سىناق جۇرگىزىلىپ, 800-دەن استام جەرگىلىكتى تۇرعىننىڭ ومىرىنە قاۋىپ توندىرەتىن راديواكتيۆتى بولشەكتەر قالدىرعان. بيكيني قاتتى زارداپ شەككەن اۋماق سانالادى. 1946 جىلدىڭ شىلدە ايىنىڭ باسىندا بۇل ماڭدا بومبا جارىلعان. بومبا 73 ەسكىرگەن اسكەري كەمەلەردىڭ ۇستىنە تاستالعان. ال جارىلىستان كەيىن اۋاعا جەرگىلىكتى تۇرعىنداردىڭ ومىرىنە قاۋىپ توندىرەتىن راديواكتيۆتى بولشەكتەر تاراعان.
بىراق جاقىن ماڭداعى ارالدارعا قونىستاعاندارعا اقش بيلىگى بيكيني ايماعى قاۋىپسىز دەپ سەندىرۋمەن كەلەدى. الايدا, سالدارىنان 840 جەرگىلىكتى تۇرعىن قاتەرلى ىسىكتەن كوز جۇمعان. ال 7000-ى اقش-تاعى اسكەري سىناقتاردىڭ قۇربانى رەتىندە تانۋدى تالاپ ەتكەن. الايدا بۇعان قول جەتكىزگەندەردىڭ سانى 1965, بىراق ولاردىڭ تەڭ جارتىسى ءارتۇرلى اۋرۋلاردان كوز جۇمعان.
ارالدىڭ ءالى دە قاۋىپتى ەكەنىن كولۋمبيا ۋنيۆەرسيتەتىنىڭ ماماندارى دالەلدەگەن. عالىمداردىڭ پىكىرىنشە, مارشالل ارالدارى اۋماعىنداعى راديوبەلسەندى بولشەكتەردىڭ جيىنتىعى چەرنوبىلدان دا جوعارى. اۋادا, توپىراقتا تسەزي, امەريتسي جانە پلۋتوني سياقتى راديوبەلسەندى مەتاللداردىڭ بولشەكتەرى تابىلعان. بيكيني ارالىنداعى پلۋتوني جيىنتىعى چەرنوبىلدەن 1000 ەسەگە اسىپ تۇسكەن.
زەرتتەۋشىلەر بيكيني, رۋنيت, ەندجەبي, ناەن جانە ەنيۆەتوك ارالدارىنىڭ جەر بەتىندەگى ەڭ راديوبەلسەندى ايماقتار دەگەن قورىتىندىعا كەلىپ وتىر. بۇل ارالداردا ادام تۇرمايدى. 2011 جىلى ەنيۆەتوكتا 9 تۇرعىن بولسا, مارشالل ارالدارىنىڭ باسقا تۇرعىندارى اقش بيلىگىنەن دەنساۋلىق جانە ءبىلىم باعدارلامالارىنا جىلىنا 6 ملن دوللار الىپ تۇرۋعا ءماجبۇر.
