بۇل باعىتتا الماتى وبلىسىندا دا ءتيىستى شارا قولعا الىنعان. ەسەپ بويىنشا, وڭىردەگى 248 395 تۇرعىن كوممۋنالدىق قىزمەت شىعىنى ءۇشىن وتەماقى الۋشىلاردىڭ ساناتىنا كىرگەن. ياعني, تۇتىنۋشىنىڭ اتىندا كوممۋنالدىق قىزمەت ءتۇرىن پايدالاناتىنىن راستايتىن ەسەپشوت بولعان كەزدە بارلىق شىعىن وتەلەدى. كوممۋنالدىق قىزمەتتەر بويىنشا قاراجاتتى وتەۋ ءۇشىن تۇتىنۋشى جەكە سايكەستەندىرۋ ءنومىرىن, الەۋمەتتىك مارتەبەسىن جانە ەسەپشوتىنىڭ دەرەكتەرىن كورسەتە وتىرىپ, اقپاراتتىق جۇيە ارقىلى, بولماعان جاعدايدا call-ورتالىق ارقىلى ءوتىنىم بەرەدى. ءوتىنىم العان كۇننەن باستاپ بەس جۇمىس كۇنىنەن كەشىكتىرمەي تۇتىنۋشىنىڭ ەسەپشوتىنا قاراجات اۋدارىلادى. ال ۇكىمەت تاراپىنان بەلگىلەنگەن كومەك الاتىن ارنايى ساناتتاعى جەكە تۇلعالار ءتيىستى ورىنعا ءوتىنىش جازۋى كەرەك. بۇل توپقا جاتاتىن ازاماتتاردىڭ ءبىر ايلىق كوممۋنالدىق شىعىندارىن وتەۋ ءۇشىن 15 مىڭ تەڭگە كولەمىندە تولەم مولشەرى بەلگىلەنگەن.
جالپى, الداعى ەكى ايداعى كوممۋنالدىق شىعىنداردى وتەۋدى قارجىلاندىرۋ ءۇشىن رەسپۋبليكالىق بيۋدجەتتەن 7,5 ملرد تەڭگە قاراجات قاراستىرىلعان. ال وبلىس اۋماعىنداعى تۇرعىندارعا ءتۇرلى مەنشىكتەگى 138 مەكەمە كوممۋنالدىق قىزمەت كورسەتەدى. وسىلايشا, مەملەكەت باسشىسى قاسىم-جومارت توقاەۆتىڭ كوروناۆيرۋس ىندەتىمەن كۇرەسۋ جانە داعدارىسقا قارسى قابىلدانعان شاراعا وراي بەرگەن تاپسىرماسى الماتى وبلىسىندا ناقتى ىستە كورىنىس تاۋىپ وتىر.
ايتپاقشى, وبلىس تۇرعىندارىنىڭ 1 ءساۋىر مەن 30 ماۋسىم ارالىعىندا تۇتىنعان كوممۋنالدىق قىزمەتى ءۇشىن الىناتىن اقى تومەنگى تاريفپەن ەسەپتەلەتىن بولدى. مۇنداي شەشىمدى ۇلتتىق ەكونوميكا مينيسترلىگى تابيعي مونوپوليالاردى رەتتەۋ كوميتەتىنىڭ الماتى وبلىسى بويىنشا دەپارتامەنتى قابىلداعان ەدى. ياعني, تالدىقورعان قالاسىنداعى «جەتىسۋ سۋ قۇبىرى» مەكەمەسى تازا سۋدىڭ 1 شارشى مەترى ءۇشىن تولەنەتىن اقىنى 8 پايىزعا تومەندەتسە, «تالدىقورعانجىلۋسەرۆيس» كومپانياسى 1 گكال جىلۋدىڭ باعاسىن جانە ىستىق سۋ ءۇشىن الىناتىن اقىنى دا 10 پايىزعا ارزانداتتى. ال «الماتىگازسەرۆيس» حولدينگى وبلىستىڭ الماتى قالاسى ماڭىنداعى اۋداندارىنىڭ تۇرعىندارى تۇتىناتىن گاز باعاسىن 24,39 تەڭگەدەن 24,11 تەڭگەگە دەيىن تۇسىرەدى. سونداي-اق بارلىق اۋدانداعى جىلۋ, سۋ, كوگىلدىر وتىن جانە قۋات كوزىن تاراتاتىن كومپانيالار اتالعان مەرزىم ارالىعىنداعى تولەم ءتاريفىن 1 پايىزدان 10 پايىزعا دەيىن تومەندەتىپ, تۇرعىندارعا جەڭىلدىك جاساۋى ءتيىس. جانە كومپانيالار توتەنشە جاعداي كەزەڭىندەگى بەرەشەك ءۇشىن تۇرعىن ءۇي-كوممۋنالدىق قىزمەتتەرىن توقتاتپايتىن بولدى.
الماتى وبلىسى
